tere rone ki khabar rakhti hain aankhein meri — Shakeel Azmi

tumhaari maut ne maaraa hai jite-ji ham ko
hamaari jaan bhi goyaa tumhaari jaan mein thi

kuchh dinon ke liye manzar se agar haT jaao
zindagi bhar ki shanaasaai chali jaati hai

isi khataa pe bujhaae gae charaagh mire
main jaantaa thaa bahut kuchh havaa ke baare mein

ghar ke divaar-o-dar pe shaam hi se
nazm likhtaa huaa hai sannaaTaa

haar ho jaati hai jab maan liyaa jaataa hai
jiit tab hoti hai jab Thaan liyaa jaataa hai

mujh ko bikhraayaa gayaa aur sameTaa bhi gayaa
jaane ab kyaa miri miTTi se khudaa chaahtaa hai

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

de kar naved-e-naghma-e-gham saaz-e-ishq ko
TuuTe hue dilon ki sadaa ho gae ho tum

koi bhi pechidgi haael nahin anvar-'sadid'
zindagi hai saamne manzar-ba-manzar aur main

jo phuul jhaD gae the jo aansu bikhar gae
khaak-e-chaman se un kaa pataa puchhtaa rahaa