ham se mai-kash jo tauba kar baiThein — Shakeel Badayuni

unhein apne dil ki khabrein mire dil se mil rahi hain
main jo un se ruuTh jaaun to payaam tak na pahunche

zaraa naqaab-e-hasin rukh se tum ulaT denaa
ham apne dida-o-dil kaa ghurur dekheinge

kaafi hai mire dil ki tasalli ko yahi baat
aap aa na sake aap kaa paighaam to aayaa

lamhe udaas udaas fazaaein ghuTi ghuTi
duniyaa agar yahi hai to duniyaa se bach ke chal

miri zindagi pe na muskuraa mujhe zindagi kaa alam nahin
jise tere gham se ho vaasta vo khizaan bahaar se kam nahin

kal raat zindagi se mulaaqaat ho gai
lab thartharaa rahe the magar baat ho gai

na tum hosh mein ho na ham hosh mein hain
chalo mai-kade mein vahin baat hogi

sau fasaad ek ishq mein uTThe
boyaa ik tukhm uge hazaar darakht

kisi ke zakhm par chaahat se paTTi kaun baandhegaa
agar bahnein nahin hongi to raakhi kaun baandhegaa

koi saaghar pe saaghar pi rahaa hai koi tishna hai
murattab is tarah aain-e-mai-khaana nahin hotaa

tumhaari yaad nikalti nahin mire dil se
nasha chhalaktaa nahin hai sharaab se baahar

'ghaalib' chhuTi sharaab par ab bhi kabhi kabhi
piitaa huun roz-e-abr o shab-e-maahtaab mein