bahaar aae to khud hi laala o nargis bataa deinge — Sikandar Ali Wajd

der se aa rahi hai yaad tiri
kyaa tujhe yaad aa rahaa huun main

ahl-e-himmat ko balaaon pe hansi aati hai
nang-e-hasti hai musibat mein pareshaan honaa

dil ki basti ajiib basti hai
ye ujaDne ke baa'd basti hai

tamiz-e-khvaab-o-haqiqat hai shart-e-bedaari
khayaal-e-azmat-e-maazi ko chhoD haal ko dekh

khudaa shaahid hai mere bhulne vaale ba-juz tere
mujhe takhliq-e-aalam raaegaan maalum hoti hai

jaane vaale kabhi nahin aate
jaane vaalon ki yaad aati hai

main baDaa ho gayaa huun magar bachpanaa
mere dil se kabhi bhi gayaa hi nahin

badalte vaqt ne badle mizaaj bhi kaise
tiri adaa bhi gai meraa baankpan bhi gayaa

'saif' andaaz-e-bayaan rang badal detaa hai
varna duniyaa mein koi baat nai baat nahin

ye sach hai rang badaltaa thaa vo har ik lamha
magar vahi to bahut kaamyaab chehraa thaa

ik manzar mein ik dhundle se aks mein chhup ke ro lein
ham kis khvaab mein aankhein mundein kis mein aankhein kholein

kyaa jaaniye kyaa soch ke afsurda huaa dil
main ne to koi baat puraani nahin likkhi