jaane vaale kabhi nahin aate — Sikandar Ali Wajd

der se aa rahi hai yaad tiri
kyaa tujhe yaad aa rahaa huun main

ahl-e-himmat ko balaaon pe hansi aati hai
nang-e-hasti hai musibat mein pareshaan honaa

dil ki basti ajiib basti hai
ye ujaDne ke baa'd basti hai

tamiz-e-khvaab-o-haqiqat hai shart-e-bedaari
khayaal-e-azmat-e-maazi ko chhoD haal ko dekh

bahaar aae to khud hi laala o nargis bataa deinge
khizaan ke daur mein dilkash gulistaanon pe kyaa guzri

khudaa shaahid hai mere bhulne vaale ba-juz tere
mujhe takhliq-e-aalam raaegaan maalum hoti hai

mere khvaabon ke jharokon ko sajaate rahiye
na sahi vasl magar yaad to aate rahiye

sab ko ham bhuul gae josh-e-junun mein lekin
ik tiri yaad thi aisi jo bhulaai na gai

tu mujh se mere zamaanon kaa puchhti hai to sun!
tiraa junun, tiraa saudaa, tiri talab, tiri yaad

har rukh hai kahin apne khad-o-khaal se baahar
har lafz hai kuchh apne maaani se ziyaada

naqaab-e-shab mein chhup kar kis ki yaad aai samajhte hain
ishaare ham tire ai sham-e-tanhaai samajhte hain

aaj kuchh mehrbaan hai sayyaad
kyaa nasheman bhi ho gayaa barbaad