zamin mere sajde se tharraa gai — Siraj Faisal Khan

main kahkashaaon mein khushiyaan talaashne niklaa
mire sitaare meraa chaand sab udaas rahe

bichhaD jaaeinge ham donon zamin par
ye us ne aasmaan par likh diyaa hai

vasl mein suukh gai hai miri sochon ki zamin
hijr aae to miri soch ko shaadaab kare

likkhaa hai taarikh ke safhe safhe par ye
shaahon ko bhi daas banaayaa jaa saktaa hai

us ke dil ki aag ThanDi paD gai
mujh ko shohrat mil gai ilzaam se

aaj meri ik ghazal ne us ke honTon ko chhuaa
aaj pahli baar apni shaairi achchhi lagi

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

gham hai na ab khushi hai na ummid hai na yaas
sab se najaat paae zamaane guzar gae

na jaane us ne khule aasmaan mein kyaa dekhaa
parinda phir se jahaan-e-qafas mein lauT aayaa