ye sikhaayaa hai dosti ne hamein — Sudarshan Faakir

dil to rotaa rahe aur aankh se aansu na bahe
ishq ki aisi rivaayaat ne dil toD diyaa

har taraf ziist ki raahon mein kaDi dhuup hai dost
bas tiri yaad ke saae hain panaahon ki tarah

tere jaane mein aur aane mein
ham ne sadiyon kaa faasla dekhaa

mere dukh ki koi davaa na karo
mujh ko mujh se abhi judaa na karo

meraa qaatil hi meraa munsif hai
kyaa mire haq mein faisla degaa

rone vaalon se kaho un kaa bhi ronaa ro lein
jin ko majburi-e-haalaat ne rone na diyaa

jab ki pahlu se yaar uThtaa hai
dard be-ikhtiyaar uThtaa hai

baat aati hai doston ki jab
mujh ko dushman 'aziz lagte hain

yaar bhalaa kitni baaton par hansnaa hai
hanste-hanste ham paagal ho sakte hain

jiteinge na ham se baazi-e-ishq
aghyaar ke piT paDeinge paanse

pyaar hi pyaar hai sab log baraabar hain yahaan
mai-kade mein koi chhoTaa na baDaa jaam uThaa

gali ke baahar tamaam manzar badal gae the
jo saaya-e-ku-e-yaar utraa to main ne dekhaa