dil to rotaa rahe aur aankh se aansu na bahe — Sudarshan Faakir

har taraf ziist ki raahon mein kaDi dhuup hai dost
bas tiri yaad ke saae hain panaahon ki tarah

tere jaane mein aur aane mein
ham ne sadiyon kaa faasla dekhaa

ye sikhaayaa hai dosti ne hamein
dost ban kar kabhi vafaa na karo

mere dukh ki koi davaa na karo
mujh ko mujh se abhi judaa na karo

meraa qaatil hi meraa munsif hai
kyaa mire haq mein faisla degaa

rone vaalon se kaho un kaa bhi ronaa ro lein
jin ko majburi-e-haalaat ne rone na diyaa

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

de nishaani koi aisi ki sadaa yaad rahe
zakhm ki baat hai kyaa zakhm to bhar jaaeinge

shahr vaale nazar aate hain mohazzab mujh ko
yahaan har shakhs hai ik dard kaa divaan liye