tere jaane mein aur aane mein — Sudarshan Faakir

dil to rotaa rahe aur aankh se aansu na bahe
ishq ki aisi rivaayaat ne dil toD diyaa

har taraf ziist ki raahon mein kaDi dhuup hai dost
bas tiri yaad ke saae hain panaahon ki tarah

ye sikhaayaa hai dosti ne hamein
dost ban kar kabhi vafaa na karo

mere dukh ki koi davaa na karo
mujh ko mujh se abhi judaa na karo

meraa qaatil hi meraa munsif hai
kyaa mire haq mein faisla degaa

rone vaalon se kaho un kaa bhi ronaa ro lein
jin ko majburi-e-haalaat ne rone na diyaa

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

dard thaa haijaan thaa par aankh mein aansu na the
jaise dil tak aate aate haadisa kam paD gayaa

main bhari saDkon pe bhi be-chaap chalne lag gayaa
ghar mein soe log mere zehn par yuun chhaa gae

main khoe jaataa huun tanhaaiyon ki vusat mein
dar-e-khayaal dar-e-laa-makaan hai yaa kuchh aur