mire maalik mujhe is khaak se be-ghar na karnaa — Umar Farooq

uTThe jo tere dar se to duniyaa simaT gai
baiThe the tere dar pe zamaana liye hue

mujhe kharid rahe hain mire sabhi apne
main bik to jaaun magar saamne to aae koi

badan kaa bojh uThaanaa bhi ab muhaal huaa
jo khud se haar ke baiThe to phir ye haal huaa

hamein to TuuTi hui kashtiyaan nahin dikhtin
hamaare ghar se hi dariyaa dikhaai detaa hai

ab ku-e-sanam chaar qadam hi kaa safar hai
kuchh aur masaafat ko Thahar kyuun nahin jaate

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

husn jalva dikhaa gayaa apnaa
ishq baiThaa rahaa udaas kahin

thak gayaa hai dil-e-vahshi miraa fariyaad se bhi
ji bahaltaa nahin ai dost tiri yaad se bhi

jaane kab kaise giraftaar-e-mohabbat hue ham
jaane kab Dhal gae iqraar mein inkaar ke rang