badan kaa bojh uThaanaa bhi ab muhaal huaa — Umar Farooq

uTThe jo tere dar se to duniyaa simaT gai
baiThe the tere dar pe zamaana liye hue

mujhe kharid rahe hain mire sabhi apne
main bik to jaaun magar saamne to aae koi

mire maalik mujhe is khaak se be-ghar na karnaa
mohabbat ke safar mein chalte chalte thak gayaa huun main

hamein to TuuTi hui kashtiyaan nahin dikhtin
hamaare ghar se hi dariyaa dikhaai detaa hai

ab ku-e-sanam chaar qadam hi kaa safar hai
kuchh aur masaafat ko Thahar kyuun nahin jaate

kyon tasavvur mein ji rahaa huun main
jab haqiqat mein mar hi jaanaa hai

apni anaa ki aaj bhi taskin ham ne ki
ji bhar ke us ke husn ki tauhin ham ne ki

vo kuchh muskuraanaa vo kuchh jheinp jaanaa
javaani adaaein sikhaati hain kyaa kyaa

raushni ke liye dil jalaanaa paDaa
kaisi zulmat baDhi tere jaane ke baad

kabhu ronaa kabhu hansnaa kabhu hairaan ho jaanaa
mohabbat kyaa bhale-change ko divaana banaati hai

aakhir ik roz to paivand-e-zamin honaa hai
jaama-e-zist nayaa aur puraanaa kaisaa