dekhiye ab na yaad aaiye aap — Ummaturrauf Nasreen

main ne betaab ho ke haath baDhaae
us ne betaab ho ke chuum liye

tumhaari yaad baDi khush-gavaar thi lekin
dil-e-hazin ke liye talkhiyaan baDhaa bhi gai

kyaa tumhein ahd-e-mohabbat ke vo lamhe yaad hain
jab nigaahein bolti thiin aur ham khaamosh the

muravvat mein hone lagaa hai izaafa
mohabbat mein aane lagi hai kami

vo multafit the ham hi bayaan kar sake na haal
manzil ke paas aa ke qadam Dagmagaa gae

mere khvaabon ke jharokon ko sajaate rahiye
na sahi vasl magar yaad to aate rahiye

sab ko ham bhuul gae josh-e-junun mein lekin
ik tiri yaad thi aisi jo bhulaai na gai

dil mein ghuT ghuT kar inhein rahte zamaana ho gayaa
meri fariyaadein bhi ab aamaada-e-fariyaad hain

yaad karne ki vo shiddat kho gai jaane kahaan
ab kisi ko hichkiyaan bhi der tak aati nahin

sipah-saalaar ke jab haath kaanpein to sipaahi bhi
ziyaada der phir maidaan mein Thahraa nahin karte

dil ko dil se raah hai to jis tarah se ham tujhe
yaad karte hain kare yuun hi hamein bhi yaad tu