vo multafit the ham hi bayaan kar sake na haal — Ummaturrauf Nasreen

main ne betaab ho ke haath baDhaae
us ne betaab ho ke chuum liye

tumhaari yaad baDi khush-gavaar thi lekin
dil-e-hazin ke liye talkhiyaan baDhaa bhi gai

dekhiye ab na yaad aaiye aap
aaj kal aap se khafaa huun main

kyaa tumhein ahd-e-mohabbat ke vo lamhe yaad hain
jab nigaahein bolti thiin aur ham khaamosh the

muravvat mein hone lagaa hai izaafa
mohabbat mein aane lagi hai kami

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

yuun to maujud apne ghar mein hai
aadmi mustaqil safar mein hai

safar mein aise kai marhale bhi aate hain
har ek moD pe kuchh log chhuT jaate hain

yaar bhi raah ki divaar samajhte hain mujhe
main samajhtaa thaa mire yaar samajhte hain mujhe

saath jo de na sakaa raah-e-vafaa mein apnaa
be-iraada bhi use yaad kiyaa hai barson