ye bhi to ik dalil hai us ke vajud ki — Unknown

log kaanTon se bach ke chalte hain
main ne phulon se zakhm khaae hain

dil TuTne se thoDi si taklif to hui
lekin tamaam umr ko aaraam ho gayaa

duniyaa mein vahi shakhs hai taazim ke qaabil
jis shakhs ne haalaat kaa rukh moD diyaa ho

miri namaaz-e-janaaza paDhi hai ghairon ne
mare the jin ke liye vo rahe vazu karte

ye hamin hain ki tiraa dard chhupaa kar dil mein
kaam duniyaa ke ba-dastur kiye jaate hain

jin ke kirdaar se aati ho sadaaqat ki mahak
un ki tadris se patthar bhi pighal sakte hain

main baDaa ho gayaa huun magar bachpanaa
mere dil se kabhi bhi gayaa hi nahin

'saif' andaaz-e-bayaan rang badal detaa hai
varna duniyaa mein koi baat nai baat nahin

naadaan meraa dil bahak jaae na kahin
shaanon pe gesuon ko bikheraa na kijiye

hadaf jis kaa faqat dil ho main aise tiir ke qurbaan
badan jis se na ghaael ho main us shamshir ke qurbaan

is dilbari ki shaan ke qurbaan jaaiye
ab dil-dahi ko aae hain jab dil nahin rahaa

meri koshish to yahi hai ki ye maasum rahe
aur dil hai ki samajhdaar huaa jaataa hai