sirat na ho to aariz-o-rukhsaar sab ghalat — Zaheer Kashmiri

aah ye mahki hui shaamein ye logon ke hujum
dil ko kuchh biiti hui tanhaaiyaan yaad aa gaiin

hamein khabar hai ki ham hain charaagh-e-aakhir-e-shab
hamaare baa'd andheraa nahin ujaalaa hai

koi dastak koi aahaT na shanaasaa aavaaz
khaak uDti hai dar-e-dil pe bayaabaan ki tarah

farz barson ki ibaadat kaa adaa ho jaise
but ko yuun puuj rahe hain ki khudaa ho jaise

apne gale mein apni hi baanhon ko Daaliye
jiine kaa ab to ek yahi Dhang rah gayaa

kul kaaenaat fikr se aazaad ho gai
insaan misaal-e-dast-e-tah-e-sang rah gayaa

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

shor din ko nahin sone detaa
shab ko sannaaTaa jagaa detaa hai

itni siyaah-raat mein itni si raushni
ye chaand vo nahin miraa mahtaab aur hai

ek din vo zarron ko aaftaab kar leinge
dhuup ke jo khvaahaan hain raat ke andhere mein

is balaa ko to khudaa jald kare shahr-badar
kaale paani ko ravaana shab-e-hijraan ho jaae