kisi ke saath milaa huun baDi mohabbat se — Zahoor Chohan

aakhiri baar mulaaqaat to kar li hai magar
silsila apni mohabbat kaa kahaan aakhiri hai

rahtaa huun main jitnaa saath sab ke
lagtaa hai akelaa ho gayaa huun

main apne aap mein taqsim hone lagtaa huun
use kaho ki mire saamne na aayaa kare

kabhi kabhi to miraa ghar bhi mujh se puchhtaa hai
ki is jahaan mein koi teraa ghar bhi hai ki nahin

inhi jhuke hue peDon se guftugu hai miri
janaab mere buzurgon se guftugu hai miri

puuri ho jaati agar koi kahaani hoti
ye mohabbat hai miyaan is mein kasak rahti hai

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

husn jalva dikhaa gayaa apnaa
ishq baiThaa rahaa udaas kahin

nigaah-e-shauq agar dil ki tarjumaan ho jaae
to zarra zarra mohabbat kaa raaz-daan ho jaae

pyaar kaa pahlaa khat likhne mein vaqt to lagtaa hai
nae parindon ko uDne mein vaqt to lagtaa hai

tujhe main ghaur se dekhun main tujh se pyaar karun
ai mere but tu mire but-kadon se baahar aa