har ek lamha tiri yaad mein basar karnaa — Zubair Amrohvi

gham to gham hi raheinge 'zubair'
gham ke unvaan badal jaaeinge

kitne chehron ke rang zard paDe
aaj sach bol kar himaaqat ki

ek hi ghar ke rahne vaale ek hi aangan ek hi duvaar
jaane kyuun baDhti jaati hai nafrat bhaai bhaai mein

mere khvaabon ke jharokon ko sajaate rahiye
na sahi vasl magar yaad to aate rahiye

sab ko ham bhuul gae josh-e-junun mein lekin
ik tiri yaad thi aisi jo bhulaai na gai

shaayad kisi ne yaad kiyaa hai hamein 'adaa'
kyon varna ashk maail-e-tufaan hai aaj phir

main inhimaak mein ye kis maqaam tak pahunchaa
tujhe hi bhuul gayaa tujh ko yaad karte hue

vo din gae ki 'daagh' thi har dam buton ki yaad
paDhte hain paanch vaqt ki ab to namaaz ham

umr sayyaad ki guzri isi jaasusi mein
gul ko naama na kare murgh-e-giraftaar-e-ravaan