Ghazal

"vasl ki shab thi aur ujaale kar rakkhe the jism o jaan sab us ke havaale kar rakkhe the jaise ye pahlaa aur aakhiri mel huaa ho haal to donon ne behaale kar rakkhe the khoj rahe the ruuh ko jismon ke raste se taur-tariqe paagalon vaale kar rakkhe the ham se naa-daanon ne ishq ki barkat hi se kaise kaise kaam niraale kar rakkhe the vo bhi thaa kuchh halke halke se make-up mein baal apne ham ne bhi kaale kar rakkhe the apne aap hi aayaa thaa phir marham ban kar jis ne hamaare dil mein chhaale kar rakkhe the 'haidar' apni taasirein le aae aakhir hijr mein ham ne jitne naale kar rakkhe the"

"dilon mein dushmanon ke is tarah Dar bol uThte hain gavaahi ko chhupaate hain to manzar bol uThte hain miri sachchaai meri be-gunaahi sab pe zaahir hai ki ab jangal kuein sahraa samundar bol uThte hain vo patthar-dil sahi lekin hamaaraa bhi ye daavaa hai hamaare lab jinhein chhu lein vo patthar bol uThte hain badal jaate hain ik lamhe mein hi taarikh ke dhaare kabhi jo mauj mein aa kar qalandar bol uThte hain ye kyaa jaadu hai vo jab bhi mire milne ko aataa hai khushi se ghar ke sab divaar aur dar bol uThte hain zabaan-e-haq kisi ke jabr se bhi ruk nahin sakti ki neze ki ani par bhi Tange sar bol uThte hain labon ki qaid se kyaa farq aayaa dil ki baaton mein ki saare lafz aankhon se ubhar kar bol uThte hain ajab ahl-e-sitam ahl-e-vafaa mein Than gai 'haidar' sitam karte hain vo aur ye mukarrar bol uThte hain"

"fasl-e-gham ki jab nau-khezi ho jaati hai dard ki maujon mein bhi tezi ho jaati hai paani mein bhi chaand sitaare ug aate hain aankh se dil tak vo zarkhezi ho jaati hai andar ke jangal se aa jaati hain yaadein aur fazaa mein sandal-bezi ho jaati hai khushiyaan gham mein bilkul ghul-mil si jaati hain aur nashaat mein gham-angezi ho jaati hai shirin se lahje mein bhar jaati hai talkhi hila-jui jab parvezi ho jaati hai be-had power jis ko bhi mil jaae us ki tarz yazidi yaa changezi ho jaati hai ghazlon mein vaise to sach kahtaa huun lekin kuchh na kuchh to rang-aamezi ho jaati hai husn tumhaaraa to hai sach aur khair saraapaa ham se hi bas shar-angezi ho jaati hai zaahir kaa parda haTne vaali manzil par saalik se bhi bad-parhezi ho jaati hai 'rumi' ko 'haidar' jab bhi paDhne lagtaa huun baatin ki duniyaa tabrezi ho jaati hai"

"'ajib karb-o-balaa ki hai raat aankhon mein sisakti pyaas labon par furaat aankhon mein tumhein to gardish-e-dauraan ne raund Daalaa hai rahi na koi bhi pahli si baat aankhon mein qataar-vaar sitaaron ki jagmagaahaT se sajaa ke laae hain gham ki baraat aankhon mein phir us ko daaman-e-dil mein kahaan kahaan rakkhein sameT sakte hain jo kaaenaat aankhon mein bikhar gae hain milan ke tamaam din 'haidar' Thahar gai hai judaai ki raat aankhon mein"

"tumhaare ishq mein kis kis tarah kharaab hue rahaa na aalam-e-hijraan na vasl-yaab hue bas itni baat thi do din kabhi na mil paaein kahin pe tapte hue thal kahin chanaab hue ajab sazaa hai ki mere duaaon vaale huruf na mustarad hue ab tak na mustajaab hue zihaanatein thiin tiri yaa anaaDi-pan apnaa savaal vasl se pahle hi laa-javaab hue haqiqat itni hai us ke mire taalluq ki kisi ke dukh the mire naam intisaab hue jise samajhte the sahraa vo ik samundar thaa khilaa vo shakhs to ham kaise aab aab hue na aayaa Dhang hamein koi ishq kaa 'haidar' na dil ke zakhmon ke ham se kabhi hisaab hue"

"ik khvaab ki jo aankh bhigone ke liye hai ik yaad ki siine mein chubhone ke liye hai ik zakhm ki sab zakhm bhulaa Daale hain jis ne ik gham ki jo taa-umr bhulaane ke liye hai ik ruuh ki sonaa hai magar mail bhari bhi ik aag isi mail ko dhone ke liye hai aankhon mein abhi dhuul si lamhon ki jami hai dil mein koi sailaab saa rone ke liye hai dil ko to bahut pahle se dhaDkaa saa lagaa thaa paanaa tiraa shaayad tujhe khone ke liye hai kashti kaa ye hachkolaa ye mallaah kaa chakkar kashti ko nahin mujh ko Dubone ke liye hai taqdir se laD saktaa hai koi kahaan 'haidar' vo haadsa honaa hai jo hone ke liye hai"

"mere us ke darmiyaan jo faasla rakkhaa gayaa us ke tai karne ko bhi ik raasta rakkhaa gayaa 'aks kho jaaein agar halkaa saa kankar bhi gire paaniyon mein ek aisaa aainaa rakkhaa gayaa sab taqaaze vaise puure ho gae insaaf ke bas faqat mahfuz meraa faisla rakkhaa gayaa naa-rasaai ki aziyyat hi rahi apnaa nasib mil gai ruhein to jismon ko judaa rakkhaa gayaa bhar ke aankhon mein sulagte khvaab us ki yaad ke mujh ko sote mein bhi 'haidar' jaagtaa rakkhaa gayaa"

"mire badan pe tire vasl ke gulaab lage ye meri aankhon pe kis rut mein kaise khvaab lage na puuraa soch sakun chhu sakun na paDh paaun kabhi vo chaand kabhi gul kabhi kitaab lage nahin milaa thaa to barson guzar gae yunhi par ab to us ke binaa har ghaDi azaab lage ye mere jism pe kaisaa khumaar chhaayaa hai tumhaare jism mein shaamil mujhe sharaab lage hamein to achchhaa hi lagtaa rahegaa vo 'haidar' balaa se ham use achchhe lage kharaab lage"

"kisi bhi lafz kaa jaadu asar nahin kartaa vo apne dil ki mujhe bhi khabar nahin kartaa banaa huaa hai ba-zaahir vo be-taalluq bhi jo mujh ko soche binaa din basar nahin kartaa Thaharne bhi nahin detaa hai apne dil mein mujhe mohabbatein bhi miri dil-ba-dar nahin kartaa labon mein jis ke mohabbat kaa ism-e-aazam hai na-jaane pyaar ko vo kyon amar nahin kartaa nahin basaataa jo aa kar bhi shahr-e-dil meraa yahaan se jaa ke bhi us ko khanDar nahin kartaa idhar ki mujh se chhupaataa nahin hai baat koi vo meri baatein kabhi bhi udhar nahin kartaa ajiib taur tariqe hain us ke bhi 'haidar' vo mujh se pyaar to kartaa hai par nahin kartaa"

"jo bas mein hai vo kar jaanaa zaruri ho gayaa hai tiri chaahat mein mar jaanaa zaruri ho gayaa hai hamein to ab kisi agli mohabbat ke safar par nahin jaanaa thaa par jaanaa zaruri ho gayaa hai sitaaraa jab miraa gardish se baahar aa rahaa hai to phir dil kaa Thahar jaanaa zaruri ho gayaa hai darakhton par parinde lauT aanaa chaahte hain khizaan-rut kaa guzar jaanaa zaruri ho gayaa hai andheraa is qadar gahraa gayaa hai dil ke andar koi suraj ubhar jaanaa zaruri ho gayaa hai bahut mushkil huaa andar ke rezon ko chhupaanaa so ab apnaa bikhar jaanaa zaruri ho gayaa hai tujhe main apne har dukh se bachaanaa chaahtaa huun tire dil se utar jaanaa zaruri ho gayaa hai nae zakhmon kaa haq bantaa hai ab is dil pe 'haidar' puraane zakhm bhar jaanaa zaruri ho gayaa hai"

"aap logon ke kahe par hi ukhaD jaate hain log to jhuuT bhi sau tarah ke ghaD jaate hain aankh kis tarah khule meri ki main jaantaa huun aankh khulte hi sabhi khvaab ujaD jaate hain gham tumhaaraa nahin jaanaan hamein dukh apnaa hai tum bichhaDte ho to ham khud se bichhaD jaate hain log kahte hain ki taqdir aTal hoti hai ham ne dekhaa hai muqaddar bhi bigaD jaate hain vo jo 'haidar' mire munkir the mire zikr pe ab chaunk uThte hain kisi soch mein paD jaate hain"

"lafz teri yaad ke sab be-sadaa kar aae hain saare manzar aainon se khud miTaa kar aae hain jal chuke saari mahakti khvaahishon ke jab gulaab mausamon ke dukh nigaahon mein jalaa kar aae hain ek lamhe mein kai sadiyon ke naate toD kar sochte hain apne haathon se ye kyaa kar aae hain raaste to kho chuke the apni har pahchaan tak ham janaaze manzilon ke khud uThaa kar aae hai saare rishte jhuuT hain saare taalluq par fareb phir bhi sab qaaem rahein ye bad-duaa kar aae hain har chhalakte ashk mein tasvir jhalkegi tiri naqsh paani par tiraa anmiT banaa kar aae hain maut se pahle jahaan mein chand saanson kaa azaab zindagi jo qarz teraa thaa adaa kar aae hain saare shikve bhuul kar aao milein 'haidar' unhein vo gae lamhon ko phir vaapas bulaa kar aae hain"

"andar ki duniyaaein milaa ke ek nagar ho jaaein yaa phir aao mil kar TuTein aur khanDar ho jaaein ek naam paDhein yuun donon aur duaa yuun maangein yaa sajde se sar na uThein yaa lafz asar ho jaaein khair aur shar ki aamezish aur aavezish se nikhrein bhuul aur tauba karte saare saans basar ho jaaein ham azali aavaara jin kaa ghar hi nahin hai koi lekin jin raston se guzrein raste ghar ho jaaein ek gunah jo faani kar ke chhoD gayaa dharti par vahi gunah dobaara kar lein aur amar ho jaaein suufi saadhu ban kar teri khoj mein aise niklein khud hi apnaa rasta manzil aur safar ho jaaein rizq ki tangi ishq kaa rog aur log munaafiq saare aao aise shahr se 'haidar' shahr-badar ho jaaein"

"ab ke us ne kamaal kar Daalaa ik khushi se niDhaal kar Daalaa chaand ban kar chamakne vaale ne mujh ko suraj-misaal kar Daalaa pahle gham se nihaal kartaa thaa ab khushi se nihaal kar Daalaa ik haqiqat ke ruup mein aa kar mujh ko khvaab-o-khayaal kar Daalaa dukh-bhare dil se dukh hi chhin liye aur jiinaa vabaal kar Daalaa ek khush-khat se shakhs ne 'haidar' ham ko bhi khush-khayaal kar Daalaa"

"us darbaar mein laazim thaa apne sar ko kham karte varna kam-az-kam apni aavaaz hi maddham karte is ki anaa taskin nahin paati khaali lafzon se shaayad kuchh ho jaataa asar tum girya-e-paiham karte siikh liyaa hai aakhir ham ne ishq mein khush khush rahnaa dard ko apni davaa banaate zakhm ko marham karte kaam hamaare hisse ke sab kar gayaa thaa divaana kaun saa aisaa kaam thaa baaqi jis ko ab ham karte har jaane vaale ko dekh ke rakh liyaa dil par patthar kis kis ko rote aakhir kis kis kaa maatam karte dil to hamaaraa jise patthar se bhi sakht huaa thaa patthar paani ho gayaa sukhi aankhon ko nam karte ban jaataa tiryaaq usi kaa zahr agar tum 'haidar' koi aayat pyaar ki paDhte aur us par dam karte"

"khamosh aankhon se kartaa rahaa savaal mujhe vo aa ke kah na sakaa apne dil kaa haal mujhe kabhi to khud ko bhi pahchaanne ki koshish kar hisaar-e-zaat se aa kar kabhi nikaal mujhe ye be-yaqini kaa gahraa sukut to TuuTe fareb de koi khush-fahmiyon mein Daal mujhe vo naam likkhun to lafzon se khushbuein uTThein vo de gayaa jo mahakte hue khayaal mujhe gae zamaane liye phir vo aa gayaa 'haidar' bikhar na jaaun kahin phir zaraa sanbhaal mujhe"