Best of Faiz Ahmad Faiz

uTh kar to aa gae hain tiri bazm se magar
kuchh dil hi jaantaa hai ki kis dil se aae hain

raat yuun dil mein tiri khoi hui yaad aai
jaise viraane mein chupke se bahaar aa jaae

dil naa-umid to nahin naakaam hi to hai
lambi hai gham ki shaam magar shaam hi to hai

dil se to har moaamla kar ke chale the saaf ham
kahne mein un ke saamne baat badal badal gai

jaantaa hai ki vo na aaeinge
phir bhi masruf-e-intizaar hai dil

fareb-e-aarzu ki sahl-angaari nahin jaati
ham apne dil ki dhaDkan ko tiri aavaaz-e-paa samjhe

haan nukta-varo laao lab-o-dil ki gavaahi
haan naghmagaro saaz-e-sadaa kyuun nahin dete

na jaane kis liye ummid-vaar baiThaa huun
ik aisi raah pe jo teri rahguzar bhi nahin

gham-e-jahaan ho rukh-e-yaar ho ki dast-e-adu
suluk jis se kiyaa ham ne aashiqaana kiyaa

shaikh saahab se rasm-o-raah na ki
shukr hai zindagi tabaah na ki

zindagi kyaa kisi muflis ki qabaa hai jis mein
har ghaDi dard ke paivand lage jaate hain

na gul khile hain na un se mile na mai pi hai
ajiib rang mein ab ke bahaar guzri hai

maqaam 'faiz' koi raah mein jachaa hi nahin
jo ku-e-yaar se nikle to su-e-daar chale

aae to yuun ki jaise hamesha the mehrbaan
bhule to yuun ki goyaa kabhi aashnaa na the

vo baat saare fasaane mein jis kaa zikr na thaa
vo baat un ko bahut naa-gavaar guzri hai

khair dozakh mein mai mile na mile
shaikh-saahab se jaan to chhuTegi

apni nazrein bikher de saaqi
mai ba-andaaza-e-khumaar nahin

jo nafas thaa khaar-e-gulu banaa jo uThe the haath lahu hue
vo nashaat-e-aah-e-sahr gai vo vaqaar-e-dast-e-duaa gayaa

be-dam hue bimaar davaa kyuun nahin dete
tum achchhe masihaa ho shifaa kyuun nahin dete

har chaaraagar ko chaaragari se gurez thaa
varna hamein jo dukh the bahut laa-davaa na the

duniyaa ne teri yaad se begaana kar diyaa
tujh se bhi dil-fareb hain gham rozgaar ke

ik tarz-e-taghaaful hai so vo un ko mubaarak
ik arz-e-tamannaa hai so ham karte raheinge

na tan mein khuun faraaham na ashk aankhon mein
namaaz-e-shauq to vaajib hai be-vuzu hi sahi

bahut milaa na milaa zindagi se gham kyaa hai
mataa-e-dard baham hai to besh-o-kam kyaa hai

in mein lahu jalaa ho hamaaraa ki jaan o dil
mahfil mein kuchh charaagh farozaan hue to hain