Best of Mir Taqi Mir

sirhaane 'mir' ke koi na bolo
abhi Tuk rote rote so gayaa hai

marg ik maandgi kaa vaqfa hai
yaani aage chaleinge dam le kar

kyaa kahein kuchh kahaa nahin jaataa
ab to chup bhi rahaa nahin jaataa

zer-e-shamshir-e-sitam 'mir' taDapnaa kaisaa
sar bhi taslim-e-mohabbat mein hilaayaa na gayaa

kharaab rahte the masjid ke aage mai-khaane
nigaah-e-mast ne saaqi ki intiqaam liyaa

saare aalam par huun main chhaayaa huaa
mustanad hai meraa farmaayaa huaa

'mir'-saahib zamaana naazuk hai
donon haathon se thaamiye dastaar

'mir' saahab tum farishta ho to ho
aadmi honaa to mushkil hai miyaan

zakhm jhele daagh bhi khaae bahut
dil lagaa kar ham to pachhtaae bahut

didani hai shikastagi dil ki
kyaa imaarat ghamon ne Dhaai hai

aag the ibtidaa-e-ishq mein ham
ab jo hain khaak intihaa hai ye

main jo bolaa kahaa ki ye aavaaz
usi khaana-kharaab ki si hai

kitni baatein banaa ke laaun lek
yaad rahtin tire huzur nahin

dilli mein aaj bhiik bhi milti nahin unhein
thaa kal talak dimaagh jinhein taaj-o-takht kaa

bevafaai pe teri ji hai fidaa
qahr hotaa jo baa-vafaa hotaa

sabz hoti hi nahin ye sarzamin
tukhm-e-khvaahish dil mein tu botaa hai kyaa

dil se shauq-e-rukh-e-niku na gayaa
jhaanknaa-taaknaa kabhu na gayaa

le saans bhi aahista ki naazuk hai bahut kaam
aafaaq ki is kaargah-e-shishagari kaa

dikhaai diye yuun ki be-khud kiyaa
hamein aap se bhi judaa kar chale

vasl mein rang uD gayaa meraa
kyaa judaai ko munh dikhaaungaa

husn thaa teraa bahut aalam-fareb
khat ke aane par bhi ik aalam rahaa

kuchh karo fikr mujh divaane ki
dhuum hai phir bahaar aane ki

shaam se kuchh bujhaa saa rahtaa huun
dil huaa hai charaagh muflis kaa

aavargaan-e-ishq kaa puchhaa jo main nishaan
musht-e-ghubaar le ke sabaa ne uDaa diyaa

baare duniyaa mein raho gham-zada yaa shaad raho
aisaa kuchh kar ke chalo yaan ki bahut yaad raho