vasl mein rang uD gayaa meraa — Mir Taqi Mir

jab ki pahlu se yaar uThtaa hai
dard be-ikhtiyaar uThtaa hai

maarka garm to ho lene do khun-rezi kaa
pahle shamshir ke niche hamin jaa baiTheinge

ijz-o-niyaaz apnaa apni taraf hai saaraa
is musht-e-khaak ko ham masjud jaante hain

dil ki yak qatra khuun nahin hai besh
ek aalam ke sar balaa laayaa

mire saliqe se meri nibhi mohabbat mein
tamaam umr main naakaamiyon se kaam liyaa

chalte ho to chaman ko chaliye kahte hain ki bahaaraan hai
paat hare hain phuul khile hain kam-kam baad-o-baaraan hai

mar mar ke agar shaam to ro ro ke sahar ki
yuun zindagi ham ne tiri duuri mein basar ki

alag alag si hai samton kaa ab safar darpesh
tumhaaraa haath mire haath se judaa bhi nahin

rahnaa tum chaahe jahaan khabron mein aate rahnaa
ham ko ehsaas-e-judaai se bachaate rahnaa

ye alag baat ki chalte rahe sab se aage
varna dekhaa hi nahin teri talab se aage

ye vasl ki rut hai ki judaai kaa hai mausam
ye gulshan-e-dil hai ki bayaabaan kahin kaa

us mehrbaan nazar ki inaayat kaa shukriya
tohfa diyaa hai eid pe ham ko judaai kaa