Ghazal

"koi achchhaa nahin hotaa hai bari chaalon se lab-e-baam aa ke khaDe ho na khule baalon se roz-o-shab kis liye rahtaa huun ilaahi betaab na to goron se mohabbat na mujhe kaalon se josh-e-vahshat mein jo jangal ki taraf jaa niklaa tap chaDhi sher-e-niyastaan ko mire naalon se koi kuchh ishq kaa kartaa hai bayaan koi kuchh tang aayaa huun main is qaziya ke dallaalon se beshtar subh-e-shab-e-vasl se ham guzreinge zor-e-adbaar chalegaa na khush-iqbaalon se mast haathi hai tiri chashm-e-siyah mast ai yaar saf-e-mizhgaan use ghere hue hai bhaalon se ru-e-khubaan se milegaa hamein bosa ki nahin haal in shaklon kaa kuchh puchhiye rammaalon se aarzi husn se nafrat ye hui hai dil ko rutba zulfon ko nahin makDiyon ke jaalon se khat-e-shab-gun ne nikal kar abas andher kiyaa kaafiristaan to vo rukh aage hi thaa khaalon se do jahaan hashr ke din hoveinge baaham maujud muttafiq honge idhar vaale udhar vaalon se dil hasinon ke tasavvur se banaayaa khaali aaina-khaanon mein kasrat rahi timsaalon se kuchh to halkaa karein khaar-e-rah sahraa-e-junun bojh langar kaa hue hain kaf-e-paa chhaalon se in ke boson ki tamannaa hai labon ko 'aatish' aaina kasb-e-safaa karte hain jin gaalon se"

"khaar matlub jo hove to gulistaan maangun bijli girne ko jo ji chaahe to baaraan maangun shama gul hove jo subh-e-shab-e-hijraan maangun os paDni bhi ho mauquf jo yaaraan maangun khaak mein bhi jo milun main to kisi sahraa mein tum se miTTi bhi na ai gabr o musalmaan maangun bakht-e-vaazhun ne zabaan ko ye asar bakhshaa hai talkhi-e-marg mazaa de jo namakdaan maangun khaana-e-dil mein karun daagh-e-mohabbat ko talab raushni ke liye is ghar ke jo mehmaan maangun paadshaahi se faqiri kaa hai paayaa baalaa boriyaa chhoD ke kyaa takht-e-sulaimaan maangun ranj se ishq ke hai raaht-e-duniyaa bad-tar zakhm-e-khandaan huun agar main gul-e-khandaan maangun de diyaa kijiye saudaai tumhaaraa huun miyaan sunghne ko jo kabhi zulf-e-pareshaan maangun aashiqe-e-dast-e-nigaarin huun ajab kyaa is kaa bhiik dariyaa se agar panja-e-marjaan maangun meve par baagh-e-jahaan mein ho jo dil ko raghbat shajar-e-husn se main seb-e-zanakhdaan maangun jaama-e-jism bhi rakhne kaa nahin dast-e-junun pairahan-e-khaak mein divaana-e-uryaan maangun yaas-o-hirmaan huun jo lohe ke chane bhi to chabaaun neamat-e-ishq ke qaabil lab-o-dandaan maangun milti ho maangne se baagh-e-jahaan mein jo muraad gul se bulbul ke kafan ke liye daamaan maangun kab se dar par tire saail huun main 'aatish' ki tarah vo mile mujh ko jo kuchh ai shah-e-khubaan maangun"

"sar shama saan kaTaaiye par dam na maariye manzil hazaar sakht ho himmat na haariye maqsum kaa jo hai so vo pahunchegaa aap se phailaaiye na haath na daaman pasaariye taalib ko apne rakhti hai duniyaa zalil o khvaar zar ki tamaa se chhaante hain khaak niyaariye tanhaai hai gharibi hai sahraa hai khaar hai kaun aashnaa-e-haal hai kis ko pukaariye tum faatiha bhi paDh chuke ham dafn bhi hue bas khaak mein milaa chuke chaliye sidhaariye"

"bargashta-taalai kaa tamaashaa dikhaaun main ghar ko lage jo aag to paani bujhaaun main jins-e-giraan-bahaa kaa kharidaar kaun hai yaktaa nahin ilaahi jo chori hi jaaun main laala-rukhon ke husn kaa bhukaa huun is qadar dil ho na sair laakh agar daagh khaaun main aankhein miri kare jo munavvar jamaal-e-yaar ghē ke charaagh tuur ke uupar jalaaun main murde ki tarah sote hain kaise mire nasib Thokar se paa-e-yaar ke un ko jagaaun main bosa mile kamaan kaa jo abru-e-yaar ki mehraab-e-bait-e-kaaba mein chillaa chaDhaaun main ji chaahtaa hai shauq-e-shahaadat mein qabl-e-marg banvaa ke qabr-e-laala ko us par lagaaun main ghar mein jo mujh faqir ke vo shaah-e-husn aae mizhgaan ke boriye jo khaDe hain bichhaaun main kaanTaa sukhaa ke hijr ne har-chand kar diyaa vo gul-badan mile to na phulaa samaaun main tum to gharib-khaane mein aae na ek roz farmaaiye to shab ko kisi vaqt aauun main baarik-bin huun shaaer-e-naazuk-khayaal huun mazmun jahaan kamar kaa mile baandh laaun main 'aatish' ghulaam-e-saaqi-e-kausar huun chaahiye firdaus kaa khulaa huaa darvaaza paaun main"

"qad-e-sanam saa agar aafrida honaa thaa na sarv-e-baagh ko itnaa kashida honaa thaa huaa hai zulf se gustaakh kis qadar shaana hamaare paas bhi dast-e-burida honaa thaa na khinchnaa thaa zulekhaa ko daaman-e-yusuf usi kaa parda-e-ismat darida honaa thaa diyaa na saath jo sabr-o-qaraar ne na diyaa ravaana mulk-e-adam ko jarida honaa thaa miTaae se koi miTtaa hai baatilon ke haq kuchh ikhtiyaar se kyaa barguzida honaa thaa na jaantaa thaa ghazab hai nigah kaa tiir ai dil tujhi ko saamne aafat-rasida honaa thaa rulaataa shaam-o-sahar kis tarah na taale-e-past buland sar se mire aab-dida honaa thaa gurez-e-yaar ne barbaad kar diyaa ham ko ghubaar-e-raah ghazaal-e-ramida honaa thaa na aai daaman-e-daaya mein niind ai 'aatish' darun-e-daaman-e-khaak aaramida honaa thaa"

"naaz-o-adaa hai tujh se dil-aaraam ke liye ye jaama qata hai tire andaam ke liye vahshat mein kaabe ko jo gayaa ku-e-yaar se latte junun ne jaama-e-ehraam ke liye aashiq huun har tarah se gunahgaar huun tiraa haajat qusur ki nahin ilzaam ke liye kyaa kyaa japegi kaisaa raTegi zabaan use tasbih ham ne li hai tire naam ke liye tifli ke girye kaa ye khulaa haal vaqt-e-marg aaghaaz hi mein rote the anjaam ke liye achchhaa nahin muqaabla us chashm-e-shokh se ik din shikast-e-faash hai baadaam ke liye vo naunihaal aae ilaahi muraad par haasil ho pukhtagi samar-e-khaam ke liye har-chand apnaa naama-e-isyaan siyaah ho hogaa safed subh hai har shaam ke liye naamard aur mard mein itnaa hi farq hai vo naan ke liye mare ye naam ke liye misl-e-kamand apni rasaai hui agar ai qasr-e-yaar bose lab-e-baam ke liye kyaa chashm-e-mast-e-yaar se tashbih dijiye kaifiyyat-e-nigaah nahin jaam ke liye rakhvaa ke zulfein yaar ne laakhon hi murgh-e-dil paidaa kiye hain kashmakash-e-daam ke liye dil mein sivaae yaar jagah ho na ghair ki khalvat saraa-e-khaas nahin aam ke liye jaataa hai bahr-e-ghusl jo ai khush-dimaagh tu jaltaa hai uud garmi-e-hammaam ke liye 'aatish' jo chaahe paae tavakkul ke mahkame jo subh ko mile na rahe shaam ke liye"

"gham nahin go ai falak rutba hai mujh ko khaar kaa aaftaab ik zard pattaa hai mire gulzaar kaa zulf ke halqe mein uljhaa sabza gosh-e-yaar kaa ho gayaa sang-e-zamurrad khaal chashm-e-maar kaa naakhudaa hai maut jo dam hai so hai baad-e-muraad 'azm hai kashti-e-tan ko bahr-e-hasti yaar kaa khaana-e-zanjir se misl-e-sadaa Dartaa huun ab yaad aataa hai kaf-e-paa mein khaTaknaa khaar kaa josh-e-girya ne kiyaa hai naa-tavaan itnaa mujhe TuTnaa mumkin nahin hai aansuon ke taar kaa khaa gai aakhir mujhe chashm-e-siyaah-e-surmagin zarq qismat ne kiyaa hai zangi aadam-khvaar kaa sa'i-e-laa-haasil mudaavaa-e-mariz-e-ishq hai thaamnaa mumkin nahin girti hui divaar kaa haath qaatil kaa garebaan tak pahunch saktaa nahin aur fart-e-shauq hai yaan zakhm daaman-daar kaa phuul jo hai apne gulshan kaa sipar kaa phuul hai har shajar is baagh mein laataa hai phal talvaar kaa khatt-e-ru-e-yaar se iizaa uThaai hai zi-bas sabza se hotaa hai sadma mere dil ko khaar kaa garche pesh-e-taaq-e-abru-e-sanam gesu nahin kaa'ba par nargha huaa hai lashkar-e-kuffaar kaa ai sanam teri karanji aankh se saabit huaa rang uD jaataa hai ru-e-mardum-e-bimaar kaa yaad mein teri raqib-e-ru-siyah jaagaa to kyaa martaba 'aali na ho khuffaash-e-shab-bedaar kaa us pari-ru ke jo kuche kaa guzartaa hai khayaal ban ke jin saaya lipTaa hai mujhe divaar kaa uTh ke divaar-e-lahad se murde Takraate hain sar ik qayaamat hai sanam 'aalam tiri raftaar kaa kham nadaamat se kiyaa mehraab mein kaa'ba ke sar gardan-e-zaahid se bojh uTThaa na jab zunnaar kaa zindagi mein be-adab hone na de tu ro'b-e-husn khaak hai meri pas-az-marg aur daaman yaar kaa ai sanam 'aashiq se ruposhi nahin laazim tujhe parda muusaa se nahin allaah ko didaar kaa bu-e-gul 'aatish' kahin hoti hai mahsus-e-nazar iftiraa hai roz-e-mahshar yaar ke didaar kaa"

"turra use jo husn-e-dil-aazaar ne kiyaa andher gesu-e-siyah-e-yaar ne kiyaa gul se jo saamnaa tire rukhsaar ne kiyaa mizhgaan ne vo kiyaa ki jo kuchh khaar ne kiyaa naaz-o-adaa ko tark mire yaar ne kiyaa ghamza nayaa ye turk sitamgaar ne kiyaa afshaan se kushta abru-e-khamdaar ne kiyaa jauhar se kaam yaar ki talvaar ne kiyaa qaamat tiri dalil qayaamat ki ho gai kaam aaftaab-e-hashr kaa rukhsaar ne kiyaa meri nigah ke rashk se rauzan ko jaan di rakhna ye qasr-e-yaar ki divaar ne kiyaa saudaa-e-zulf mein mujhe aayaa khayaal-e-rukh mushtaaq raushni kaa shab-e-taar ne kiyaa hasrat hi bosa-e-lab-e-shirin ki rah gai miThaa na munh ko tere namak-khvaar ne kiyaa fursat mili na girya se ik lahza ishq mein paani mire lahu ko is aazaar ne kiyaa simaab ki tarah se shagufta huaa mizaaj iksir mujh ko mere kharidaar ne kiyaa qad mein to kar chukaa thaa vo ahmaq baraabari majbur sarv ko tiri raftaar ne kiyaa hairat se paa-ba-gil hue rauzan ko dekh kar divaar ham ko yaar ki divaar ne kiyaa patthar ke aage sajda kyaa tu ne brahman kaafir tujhe tire but-e-pindaar ne kiyaa kaavish mizha ne ki rukh-e-dilbar ki diid mein paa-e-nigaah se bhi khalish khaar ne kiyaa 'aashiq ki tarah main jo lagaa karne bandagi aazaad daagh de ke kharidaar ne kiyaa e'jaaz kaa 'ajab lab-e-jaan-bakhsh se nahin paighambar us ko mushaf-e-rukhsaar ne kiyaa turra ki tarah se dil-e-aashiq ko pech mein kis kis lapeT se tiri dastaar ne kiyaa aankhon ko band kar ke tasavvur mein baagh ke gulshan qafas ko murgh-e-giraftaar ne kiyaa naalaan huaa main us rukh-e-rangin ko dekh kar bulbul mujhe nazaara-e-gulzaar ne kiyaa haklaa ke mujh se baat jo us dil-rubaa ne ki kis husn se adaa use takraar ne kiyaa ulTaa udhar naqaab to parde paDe idhar aankhon ko band jalva-e-didaar ne kiyaa lazzat ko tark kar to ho duniyaa kaa ranj duur parhez bhi davaa hai jo bimaar ne kiyaa naa-saaf aaina ho to bad-tar hai sang se raushan ye haal ham ko jalaakaar ne kiyaa halqa ki naaf-e-yaar ke taa'rif kyaa karun gol aisaa daaera nahin parkaar ne kiyaa divaan-e-husn-e-yaar ki 'aatish' jo sair ki divaana bait abru-e-khamdaar ne kiyaa"

"aisi vahshat nahin dil ko ki sanbhal jaaungaa surat-e-pairahan-e-tang nikal jaaungaa vo nahin huun ki rukhaai se jo Tal jaaungaa aaj jaataa thaa to zid se tiri kal jaaungaa shaam-e-hijraan kisi surat se nahin hoti subh munh chhupaa kar main andhere mein nikal jaaungaa khinch kar tegh kamar se kise dikhlaate ho naaf-e-maashuq nahin huun jo main Tal jaaungaa shab-e-hijr apni siyaahi kise dikhlaati hai kuchh main laDkaa to nahin huun ki dahal jaaungaa kucha-e-yaar kaa saudaa hai mire sar ke saath paanv thak thak ke hon har-chand ki shal jaaungaa zabt-e-betaabi-e-dil ki nahin taaqat baaqi koh-e-sabr ab ye sadaa detaa hai Tal jaaungaa taal-e-bad ke asar se ye yaqin hai mujh ko teri hasrat hi mein ai husn-e-'amal jaaungaa chaar din ziist ke guzreinge taassuf mein mujhe haal-e-dil par kaf-e-afsos main mal jaaungaa shoala-ruyon ko na dikhlaao mujhe ai aankho mom se narm miraa dil hai pighal jaaungaa haal-e-piri kise maa'lum javaani mein thaa kyaa samajhtaa thaa main do din mein badal jaaungaa vahi divaangi meri hai bahaar aane do dekh kar laDkon ki surat ko bahal jaaungaa sher Dhalte hain miri fikr se aaj ai 'aatish' mar ke kal gor ke saanche mein main Dhal jaaungaa"

"qudrat-e-haq hai sabaahat se tamaashaa hai vo rukh khaal-e-mushkin dil-e-firaun yad-e-baizaa hai vo rukh nuur jo us mein hai khurshid mein vo nuur kahaan ye agar husn kaa chashma hai to dariyaa hai vo rukh phuTe vo aankh jo dekhe nigah-e-bad se use aaine se dil-e-aarif ke musaffaa hai vo rukh bazm-e-aalam hai tavajjoh se usi ke aabaad shahr viraan hai agar jaanib-e-sahraa hai vo rukh saamri chashm-e-fusun-gar ki fusun-saazi se lab-e-jaan-bakhsh ke hone se masihaa hai vo rukh dam-e-nazzaara laDe marte hain aashiq us par daulat-e-husn ke pesh aane se duniyaa hai vo rukh saaya karte hain humaa uD ke paron se apne tere rukhsaar se dilchasp ho anqaa hai vo rukh gul ghalat laala ghalat mahr ghalat maah ghalat koi saani nahin laa-saani hai yaktaa hai vo rukh kaun saa us mein takalluf nahin paate har-chand na murassaa na mozahhab na mutallaa hai vo rukh khaal-e-hindu hain parastish ke liye aae hain putliyaan aankhon ki do but hain kalisaa hai vo rukh kaun saa dil hai jo divaana nahin hai us kaa khat-e-shab-rang se sarmaaya-e-saudaa hai vo rukh us ke didaar ki kyun-kar na hon aankhein mushtaaq dil-rubaa shai hai ajab surat-e-zebaa hai vo rukh taa-kujaa sharh karun husn ke us ke 'aatish' mahr hai maah hai jo kuchh hai tamaashaa hai vo rukh"

"vo naaznin ye nazaakat mein kuchh yagaana huaa jo pahni phulon ki baddhi to dard-e-shaana huaa shahid naaz-o-adaa kaa tire zamaana huaa uDaayaa mehndi ne dil chor kaa bahaana huaa shab us ke afai-e-gesu kaa jo fasaana huaa havaa kuchh aisi bandhi gul charaagh-e-khaana huaa na zulf-e-yaar kaa khaaka bhi kar sakaa maani har ek baal mein kyaa kyaa na shaakhsaana huaa tavangaron ko mubaarak ho sham-e-kafuri qadam se yaar ke raushan gharib-khaana huaa gunaahgaar hain mehraab-e-tegh ke saajid jhukaayaa sar to adaa farz-e-panj-gaana huaa ghurur-e-ishq ziyaada ghurur-e-husn se hai idhar to aankh bhari dam udhar ravaana huaa dikhaa de zaahid-e-maghrur ko bhi ai sanam aankh jamaal-e-hur kaa had se sivaa fasaana huaa bharaa hai shisha-e-dil ko mai-e-mohabbat se khudaa kaa ghar thaa jahaan vaan sharaab-khaana huaa havaae tund na chhoDe mire ghubaar kaa saath ye gard-e-raah kahaan khaak-e-aastaana huaa khudaa ke vaaste kar yaar chin-e-abru duur baDaa hi aib lagaa jis kamaan mein khaana huaa huaa jo din to huaa us ko paas rusvaai jo raat aai to phir niind kaa bahaana huaa na puchh haal miraa chob-e-khushk-e-sahraa huun lagaa ke aag mujhe kaarvaan ravaana huaa nigaah-e-naaz-e-butaan se na chashm-e-rahm bhi rakh kisi kaa yaar nahin fitna-e-zamaana huaa asar kiyaa tapish-e-dil ne aakhir us ko bhi raqib se bhi miraa zikr ghaaebaana huaa havaae tund se pattaa agar koi khaDkaa samand-e-baad-e-bahaari kaa taaziyaana huaa zabaan-e-yaar khamoshi ne meri khulvaai main qufl ban ke kalid-e-dar-e-khazaana huaa kiyaa jo yaar ne kuchh shaghl-e-barq-andaazi charaagh-e-zindagi-e-khizar tak nishaana huaa rahaa hai chaah-e-zaqan mein miraa dil-e-vahshi kunein mein jangali kabutar kaa aashiyaana huaa khudaa daraaz kare umr-e-charkh-e-nili ko ye be-kason ke mazaaron kaa shaamiyaana huaa nahin hai misl-e-sadaf mujh saa dusraa kam-bakht nasib-e-ghair mire munh kaa aab-o-daana huaa hinaai haathon se choTi ko kholtaa hai yaar kahaan se panjaa-e-marjaan harif-e-shaana huaa dikhaai chashm-e-ghazaalaan ne halqa-e-zanjir hamein to gosha-e-sahraa bhi qaid-khaana huaa hamesha shaam se ham-saae mar rahe 'aatish' hamaaraa naala-e-dil gosh ko fasaana huaa"

"vahshat-e-dil ne kiyaa hai vo bayaabaan paidaa saikDon kos nahin surat-e-insaan paidaa sahar-e-vasl karegi shab-e-hijraan paidaa sulb-e-kaafir hi se hotaa hai musalmaan paidaa dil ke aaine mein kar jauhar-e-pinhaan paidaa dar-o-divaar se ho surat-e-jaanaan paidaa khaar daaman se ulajhte hain bahaar aai hai chaak karne ko kiyaa gul ne garebaan paidaa nisbat us dast-e-nigaarin se nahin kuchh is ko ye kalaai to kare panja-e-marjaan paidaa nashsha-e-mai mein khuli dushmani-e-dost mujhe aab-e-angur ne ki aatish-e-pinhaan paidaa baagh sunsaan na kar in ko pakaD kar sayyaad baad muddat hue hain murgh-e-khush-ilhaan paidaa ab qadam se hai mire khaana-e-zanjir aabaad mujh ko vahshat ne kiyaa silsila-jumbaan paidaa ro ke aankhon se nikaalun mein bukhaar-e-dil ko kar chuke abr-e-mizha bhi kahin baaraan paidaa naara-zan kunj-e-shahidaan mein ho bulbul ki tarah aab-e-aahan ne kiyaa hai ye gulistaan paidaa naqsh un kaa na kisi laal se lab par baiThaa mere munh mein hue the kis liye dandaan paidaa khauf naa-fahmi-e-mardum se mujhe aataa hai gaav khar hone lage surat-e-insaan paidaa ruuh ki tarah se daakhil ho jo divaana hai jism-e-khaaki samajh is ko jo ho zindaan paidaa be-hijaabon kaa magar shahr hai aqlim-e-adam dekhtaa huun jise hotaa hai vo uryaan paidaa ik gul aisaa nahin hove na khizaan jis ki bahaar kaun se vaqt huaa thaa ye gulistaan paidaa mojid us ki hai siyah-rozi hamaari 'aatish' ham na hone to na hoti shab-e-hijraan paidaa"

"kyaa kyaa na rang tere talabgaar laa chuke maston ko josh sufiyon ko haal aa chuke hasti ko misl-e-naqsh-e-kaf-e-paa miTaa chuke aashiq naqaab-e-shaahid-e-maqsud uThaa chuke kaabe se dair dair se kaabe ko jaa chuke kyaa kyaa na is do-raahe mein ham pher khaa chuke gustaakh haath tauq-e-kamar yaar ke hue hadd-e-adab se paanv ko aage baDhaa chuke kanaan se shahr-e-misr mein yusuf ko le gae baazaar mein bhi husn ko aakhir dikhaa chuke pahunche taDap taDap ke bhi jallaad tak na ham taaqat se haath paanv ziyaada hilaa chuke hoti hai tan mein ruuh payaam-e-ajal se shaad din vaada-e-visaal ke nazdik aa chuke paimaana meri umr kaa labrez ho kahin saaqi mujhe bhi ab to pyaala pilaa chuke divaana jaante hain tiraa hoshyaar unhein jaame ko jism ke bhi jo purze uDaa chuke be-vajh har dam aaina pesh-e-nazar nahin samjhe ham aap aankhon mein apni samaa chuke us dilrubaa se vasl huaa de ke jaan ko yusuf ko mol le chuke qimat chukaa chuke uTThaa naqaab chehra-e-zebaa-e-yaar se divaar darmiyaan jo thi ham us ko Dhaa chuke zer-e-zamin bhi taDpeinge ai aasmaan-e-husn betaab tere gor mein bhi chain paa chuke aaraaish-e-jamaal balaa kaa nuzul hai andher kar diyaa jo vo missi lagaa chuke do abru aur do lab-e-jaan-bakhsh yaar ke zindon ko qatl kar chuke murde jilaa chuke majbur kar diyaa hai mohabbat ne yaar ki baahar ham ikhtiyaar se hain apne jaa chuke sadmon ne ishq-e-husn ke dam kar diyaa fanaa 'aatish' sazaa gunaah-e-mohabbat ki paa chuke"

"naa-fahmi apni parda hai didaar ke liye varna koi naqaab nahin yaar ke liye nur-e-tajalli hai tire rukhsaar ke liye aankhein mari kalim hain didaar ke liye fidye bahut us abru-e-khamdaar ke liye chu rang ki kami nahin talvaar ke liye qaul apnaa hai ye subha-o-zunnaar ke liye do phande hain ye kaafir-o-din-daar ke liye lutf-e-chaman hai bulbul-e-gulzaar ke liye kaifiyat-e-sharaab hai mai-khvaar ke liye seri na hogi tishna-e-didaar ke liye paani nahin chah-e-zaqan-e-yaar ke liye utni hi hai numud miri yaar ke liye shohra hai jis qadar mare ash’aar ke liye dasht-e-adam se aate hain baagh-e-jahaan mein ham be-daagh laala-o-gul-e-be-khaar ke liye shamshaad apne turre ko beche to lijiye us laala ro ki lipaTti dastaar ke liye do aankhein chehre par nahin tere faqir ke do Thekre hain bhiik ke didaar ke liye surma lagaayaa kijiye aankhon mein mehrbaan iksir ye sufuf hai bimaar ke liye halqe mein zulf-e-yaar ki moti piroiye dandaan zarur hain dahan-e-maar ke liye guft-o-shunid mein huun basar din bahaar ke gul ke liye hai gosh zabaan khaar ke liye be-yaar sar paTakne se hiltaa hai ghar miraa rahtaa hai zalzala dar-o-divaar ke liye baiThaa jo us ke saae mein divaana ho gayaa saaya pari kaa hai tiri divaar ke liye bulbul hi ko bahaar ke jaane kaa gham nahin har barg haath maltaa hai gulzaar ke liye ai shaah-e-husn zulf o rukh o gosh chashm o lab kyaa kyaa 'ilaaqe hain tiri sarkaar ke liye chaal abr ki chalaa jo gulistaan mein jhuum kar taaus ne qadam tire rahvaar ke liye aayaa jo dekhne tire husn-o-jamaal ko pakDaa gayaa vo 'ishq ki begaar ke liye haajat nahin banaao ki ai naaznin tujhe zevar hai saadgi tire rukhsaar ke liye bimaar tandurust ho dekhe jo roe yaar kyaa chaashni hai sharbat-e-didaar ke liye is baadshaah-e-husn ki manzil mein chaahiye baal-e-humaa ki par-chhati divaar ke liye saudaa-e-zulf-e-yaar mein kaafir huaa huun mein sumbul ke taar chaahiyein zunnaar ke liye zanjir o tauq jo ki hai baazaar-e-dahr mein saudaa hai us pari ke kharidaar ke liye chunaa baneinge baad-e-fanaa apne ustukhvaan daulat saraae yaar ki divaar ke liye maa'shuq ki zabaan se hai dushnaam dil pazir shirini zahr hai tiri guftaar ke liye jaan se 'aziz tar hai mare dil ko daagh 'ishq mahtaab hai lahad ki shab-e-taar ke liye vo mast khvaab chashm hai koi balaa-e-bad kyaa martaba hai fitna-e-bedaar ke liye khalvat se anjuman kaa kahaan yaar ko dimaagh vo jins be-bahaa nahin baazaar ke liye pahnaa hai jab se tu ne shab-e-maah mein use kyaa kyaa shagufe phulte hain haar ke liye chhakDaa hue hain soch ke raah-e-vafaa mein paanv pahiye lagaaiye unhein raftaar ke liye jo mushtari hai banda hai us khush-jamaal kaa yusuf bane ghulaam kharidaar ke liye sone ke patte hovein har ik gul ke kaan mein maqdur ho jo bulbul-e-gulzaar ke liye gul-haa-e-zakhm se huun shahaadat-talab nihaal taufiq-e-khair ho tiri talvaar ke liye andher hai jo dam ki na is ke ho raushni yusuf miraa charaagh hai baazaar ke liye ehsaan jo ibtidaa se hai 'aatish' vahi hai aaj kuchh intihaa nahin karam-e-yaar ke liye"

"ai sanam jis ne tujhe chaand si surat di hai usi allaah ne mujh ko bhi mohabbat di hai tegh be-aab hai ne baazu-e-qaatil kamzor kuchh giraan-jaani hai kuchh maut ne fursat di hai is qadar kis ke liye ye jang-o-jadal ai gardun na nishaan mujh ko diyaa hai na tu naubat di hai saanp ke kaaTe ki lahrein hain shab-o-roz aatin kaakul-e-yaar ke saude ne aziyyat di hai aai iksir ghani dil nahin rakhti aisaa khaaksaari nahin di hai mujhe daulat di hai shama kaa apne fatila nahin kis raat jalaa amal-e-hub ki bahut ham ne bhi daavat di hai jism ko zer zamin bhi vahi pahunchaa degaa ruuh ko jis ne falak sair ki taaqat di hai furqat-e-yaar mein ro ro ke basar kartaa huun zindagaani mujhe kyaa di hai musibat di hai yaad-e-mahbub faraamosh na hove ai dil husn-e-niyyat ne mujhe ishq se neamat di hai gosh paidaa kiye sunne ko tiraa zikr-e-jamaal dekhne ko tire, aankhon mein basaarat di hai lutf-e-dil-bastagi-e-aashiq-e-shaidaa ko na puchh do jahaan se is asiri ne faraaghat di hai kamar-e-yaar ke mazmun ko baandho 'aatish' zulf-e-khubaan si rasaa tum ko tabiat di hai"

"chaman mein shab ko jo vo shokh be-naqaab aayaa yaqin ho gayaa shabnam ko aaftaab aayaa un ankhDiyon mein agar nashsha-e-sharaab aayaa salaam jhuk ke karungaa jo phir hijaab aayaa kisi ke mahram-e-aab-e-ravaan ki yaad aai habaab ke jo baraabar kabhi habaab aayaa shab-e-firaaq mein mujh ko sulaane aayaa thaa jagaayaa main ne jo afsaana-go ko khvaab aayaa adam mein hasti se jaa kar yahi kahungaa main hazaar hasrat-e-zinda ko gaaD daab aayaa chakor husn-e-mah-e-chaar-dah ko bhuul gayaa muraad par jo tiraa aalam-e-shabaab aayaa mohabbat-e-mai-o-maashuq tark kar 'aatish' safed baal hue mausam-e-khizaab aayaa"

"ye aarzu thi tujhe gul ke ru-ba-ru karte ham aur bulbul-e-betaab guftugu karte payaambar na mayassar huaa to khuub huaa zabaan-e-ghair se kyaa sharh-e-aarzu karte miri tarah se mah-o-mehr bhi hain aavaara kisi habib ki ye bhi hain justuju karte hamesha rang-e-zamaana badaltaa rahtaa hai safed rang hain aakhir siyaah mu karte luTaate daulat-e-duniyaa ko mai-kade mein ham tilaai saaghar-e-mai nuqrai subu karte hamesha main ne garebaan ko chaak chaak kiyaa tamaam umr rafugar rahe rafu karte jo dekhte tiri zanjir-e-zulf kaa aalam asiir hone ki aazaad aarzu karte bayaaz-e-gardan-e-jaanaan ko subh kahte jo ham sitaara-e-sahari takma-e-gulu karte ye kaabe se nahin be-vajh nisbat-e-rukh-e-yaar ye be-sabab nahin murde ko qibla-ru karte sikhaate naala-e-shab-gir ko dar-andaazi gham-e-firaaq kaa us charkh ko adu karte vo jaan-e-jaan nahin aataa to maut hi aati dil-o-jigar ko kahaan tak bhalaa lahu karte na puchh aalam-e-bargashta-taalai 'aatish' barasti aag jo baaraan ki aarzu karte"

"pise dil us ki chitvan par hazaaron mu-e-be-saakhta-pan par hazaaron miri zid se huaa hai mehrbaan dost mire ehsaan hain dushman par hazaaron baraae-shukr-e-qaatil rongTon se zabaanein hain mire tan par hazaaron na aTkheli se chal hote hain sadme dil-e-shaikh-o-barahman par hazaaron huaa sar kham na zer-e-tegh jallaad rahe bojh apni gardan par hazaaron tire kushta hain ham aankhein maleinge hamaare sang-e-madfan par hazaaron na mal ai luabat-e-chin itr-e-gulzaar galaa kaaTeinge gulshan par hazaaron nahin ik mard ko duniyaa se matlab marein naamard is zan par hazaaron ajab kyaa hai agar parvaane be-shamaa jalein 'aatish' ke madfan par hazaaron"

"taaq-e-abru hain pasan-e-taba ik dil-khvaah ke umr hoti hai basar gumbad mein bismillaah ke jaaun kyun-kar bin bulaae us but-e-dil-khvaah ke be-talab koi nahin pahunchaa huzur allaah ke ru-e-nuraani kaa tere ho gayaa hai shak jo yaar raat bhar dauDaa huun kyaa kyaa pichhe pichhe maah ke shaam-e-vasl aai idhar maujud thi subh-e-firaaq kam ghaDi se bhi pahar hain is shab-e-kotaah ke daagh-e-ishq-e-husn kaa luqma nivaala hai kaDaa sair-dil hain khaane vaale is gham-e-jaan-kaah ke naa-tavaani se hai haalat ghair hijr-e-yaar mein dam nikal jaataa hai apnaa saath har ik aah ke ishq-e-but mein koh par jaa jaa ke sar paTkaa kiye paanv ko sadme rahe past-o-buland-e-raah ke saalahaa ishq-e-zanakhdaan ne lahu paani kiyaa muddaton roe hain jaa jaa kar kinaare chaah ke hashr tak yuun hi raheinge ghamza-o-andaaz-o-naaz ishq-e-aali-manzilat se husn-e-vaalaa-jaah ke jaa nikaltaa hai jo mujh saa tishna-e-didaar-e-husn zikr-e-yusuf karne lagte hain kabutar chaah ke manzil-e-maqsud mein chal kar nikaalungaa unhein aablon mein ye jo hain paivast kaanTe raah ke us but-e-be-din ki zulfon kaa ishaara hai yahi is balaa mein vo phasein aashiq hon jo allaah ke kab samaai hai nazar mein raushni-e-aaftaab chashm-e-binaa rakhte hain zarre tiri dargaah ke"

"aaina-khaana kareinge dil-e-naakaam ko ham phereinge apni taraf ru-e-dil-aaraam ko ham shaam se subh talak daur-e-sharaab aakhir hai rote hain dekh ke khandaan dahan-e-jaam ko ham yaad rakhne ki jagah hai ye tilism-e-hairat subh ko dekhte hi bhuul gae shaam ko ham aankh vo fitna-e-dauraan kise dikhlaataa hai shoabada jaante hain gardish-e-ayyaam ko ham fitna-angezi bhi chhupti hai kahin parde mein sunte hain gabr o musalmaan se tire naam ko ham khun-e-qaasid to vo saffaak samajhtaa hai halaal kisi ghammaaz se bhejvaaeinge paighaam ko ham paanv pakDe hain zamin ne ye tire kucha ki rah-e-sad-saala samajhte hain ab ik gaam ko ham dida-e-yaar kahein kyaa use kaif-e-mai mein bhuun kar roz gazak karte hain baadaam ko ham beza-e-khat se hui us ki kudurat dah-chand ab safaai ke liye DhunDeinge hajjaam ko ham yahi tahsil-e-mohabbat kaa hai aalam taa-haal pukhta karte hain hanuz aarzu-e-khaam ko ham lutf haasil ho jo zulfon mein giraftaari kaa mol lein dil ki asiri ke liye daam ko ham kucha-e-yaar mein apnaa jo guzar hotaa hai nigaraan rahte hain hasrat se dar-o-baam ko ham husn se ishq ki khaatir hai khudaa ne bhejaa karte hain 'aatish' use aae hain jis kaam ko ham"

"aakhir-e-kaar chale tiir ki raftaar qadam ghair manzil na paDe raah mein zinhaar qadam uTh gae vasl ki shab peshtar-az-yaar qadam aage ham umr-e-ravaan se bhi chale chaar qadam ku-e-maqsud se yuun rakhti hai ghaflat mujhe duur jaise so jaane se ho jaate hain be-kaar qadam ahl-e-aalam mein huun main zindon mein murdon ki tarah baDh chalein laakh magar saath hain do chaar qadam ek muddat se rah-e-kaaba mein aavaara hain kyaa khudaa kaa mujhe dikhlaaeinge didaar qadam josh-e-vahshat mein bhi main chaDh ke na us par dauDaa le gae hasrat-e-khaar-e-sar-e-divaar qadam surat-e-barg-e-khizaan jhaDte hain har gaam gunaah jab uThaate hain tiri raah mein zavvaar qadam ai junun koh-o-bayaabaan bhi dikhlaa mujh ko rahein pasti o bulandi se khabar-daar qadam kucha-gardi ye shab-o-roz ki be-vajh nahin eDiyaan ragDeinge kis ke pas-e-divaar qadam jaada-e-raah-e-mohabbat ko khat-e-mustar jaan sar ke bal misl-e-qadam chal jo hon be-kaar qadam khaak bhi huun to huun khaak-e-dar us kaa 'aatish' jis ke the dosh-e-payambar ke sazaa-vaar qadam"

"husn kis roz ham se saaf huaa gunah-e-ishq kab mu'aaf huaa le liyaa shukr kar ke saaqi se dard is mein huaa ki saaf huaa tegh-e-qaatil par apnaa khuun jam kar makhmal-e-surkh kaa ghilaaf huaa zahr parhez ho gayaa mujh ko dard darmaan se almuzaaf huaa khaaksaari ki ho chuki me'raaj siina apnaa zamin-e-saaf huaa kamar-e-yaar ne dikhaai aankh mardum-e-dida khaal-e-naaf huaa vaa'da jhuTaa nakarda mard nahin qaul se fe'l jab khilaaf huaa faatiha ko jo vo pari aai sang-e-qabr apnaa koh-e-qaaf huaa us kamar ke subut mein 'aajiz fikr kar kar ke mushigaaf huaa rind-mashrab huun mujh ko kyaa hove mazhabon mein jo ikhtilaaf huaa vo dahan huun na niklaa harf-e-ghurur vo zabaan huun na jis se laaf huaa gird is kucha ke phiraa 'aatish' haaji se kaa'ba kaa tavaaf huaa"

"is ke kuche mein masihaa har sahar jaataa rahaa be-ajal vaan ek do har raat mar jaataa rahaa ku-e-jaanaan mein bhi ab is kaa pata miltaa nahin dil miraa ghabraa ke kyaa jaane kidhar jaataa rahaa jaanib-e-kohsaar jaa niklaa jo main to kohkan apnaa tesha mere sar se maar kar jaataa rahaa ne kashish maashuq mein paataa huun nai aashiq mein jazb kyaa balaa aai mohabbat kaa asar jaataa rahaa vaah-re andher bahr-e-raushni-e-shahr-e-misr dida-e-yaaqub se nur-e-nazar jaataa rahaa nashsha hi mein yaa ilaahi mai-kashon ko maut de kyaa guhar ki qadr jab aab-e-guhar jaataa rahaa ik na ik munis ki furqat kaa falak ne gham diyaa dard-e-dil paidaa huaa dard-e-jigar jaataa rahaa husn kho kar aashnaa ham se huaa vo naunihaal pahunche tab zer-e-shajar ham jab samar jaataa rahaa ranj-e-duniyaa se faraagh izaa-dahindon ko nahin kab tap-e-shir utri kis din dard-e-sar jaataa rahaa faatiha paDhne ko aae qabr-e-'aatish' par na yaar do hi din mein paas-e-ulfat is qadar jaataa rahaa"

"shohra-e-aafaaq mujh saa kaun saa divaana hai hind mein main huun paristaan mein miraa afsaana hai said-gaah-e-murgh-e-dil rukhsaara-e-jaanaana hai daam-e-zulf-e-ambarin hai khaal-e-mushkin daana hai husn se rutba hai apne ishq-e-kaamil kaa buland aastaana par pari hai baam par divaana hai is mein rahtaa hai safaa-e-ru-e-jaanaan kaa khayaal dil nahin pahlu mein apne aaina kaa khaana hai bechtaa huun dil ko jo mahbub chaahe mol le bosa qimat hai tavajjoh ki nazar baiaana hai phuTein vo aankhein nigaah-e-bad se jo dekhein tujhe aatishin rukhsaar mijmar khaal kaalaa daana hai roz-o-shab us shama-ru ko bhejtaa huun khatt-e-shauq naama-bar din ko kabutar raat ko parvaana hai khaar khaar-e-dil ghanimat jaantaa huun ishq mein zulf-e-dud-e-aah ki aarastagi kaashaana hai sharh likkhaa chaahiye us ki bayaaz-e-subh par matla-e-khurshid bait-e-abru-e-jaanaana hai haalat-e-aaina rakhtaa hai safaa se dil miraa aashnaa se aashnaa begaana se begaana hai qatl se mujh sakht-jaan ke munkir ai qaatil na ho hujjat-e-qaate tiri talvaar kaa dandaana hai vaaste har shai ke duniyaa mein muqarrar hain mahal shahr mein jab tak hai majnun ganj-e-be-viraanaa hai baagh-e-aalam mein nahin us shokh saa koi hasin gul hai apnaa yaar yusuf sabza-e-begaana hai ab nahin ai yaar jauban ko tire bim-e-zavaal khatt-e-mushkin husn ki jaagir kaa parvaana hai haal hai jis kaa usi ke vaaste hai khushnumaa naqs hai talvaar kaa vasf arraa kaa dandaana hai yaar khinche tegh tere qatl karne ke liye sar jhukaa 'aatish' ye jaa-e-sajda-e-shukraana hai"