Ghazal

"hai dil-e-sozaan mein tuur us ki tajalli-gaah kaa ru-e-aatishnaak har shola hai meri aah kaa vasl kyaa ham khaaksaaron ko ho is dil-khvaah kaa khaak mein aaluda honaa kab hai mumkin maah kaa nur-afshaan jab se hai dil mein khayaal us maah kaa tuur kaa shola dhuaan hai meri sham-e-aah kaa qaamat-e-mauzun nazar aae mujhe jaa-e-alif thaa shuru-e-aashiqi din meri bismillaah kaa samjhe mai-kash dekh kar abru tiri baalaa-e-chashm mai-kade se martaba aalaa hai baitullaah kaa aamad-e-khat mein to hone de nigaahon kaa guzar dekh le bachne nahin paataa hai sabza raah kaa khalq ne quraan dekhaa jab huaa maah-e-rajab ham ne dekhaa mushaf-e-rukhsaar apne maah kaa aate hi us tifl ke raushan siyah-khaana huaa shama saan jalva hai us ke qaamat-e-kotaah kaa yaar kaa 'naasikh' phaTaa hai pairahan to aib kyaa hai kataan ko chaak karnaa kaam nur-e-maah kaa"

"zaar intizaar-e-khat ne kiyaa is qadar mujhe pahchaantaa nahin hai miraa naama-bar mujhe shaakhon ki tarh saae ko rakhtaa hai dosh par gar dekhtaa hai dhuup mein koi shajar mujhe huun vo ghami ki lab na hansi se hon aashnaa divaar-e-qahqaha bhi jo aae nazar mujhe dil mein buton ke soz-e-mohabbat ne ghar kiyaa goyaa hai dakhl sang mein misl-e-sharar mujhe main sar paTak paTak ke marun yaa'ni us jagah dikhlaa diyaa qazaa ne tiraa sang-e-dar mujhe kaa'be mein jaa ke baiTh rahungaa main dekhnaa tu dair se nikaalegaa ai but agar mujhe mumkin nahin sivaae khudaa 'ilm-e-ghaib ho kyunkar sanam tiri nazar aae kamar mujhe mar jaaun peshtar main ilaahi visaal se furqat mein ziist ki ho tamanna agar mujhe sandal ki justuju hai 'abas faaeda hai kyaa ik dard-e-sar mein aur jo ho dard-e-sar mujhe thi us ke haath mein jo chhaDi aur funduqein kyaa shaakh-e-khushk mein nazar aae samar mujhe raushan dilon se rakhte hain nafrat siyaahkaar makruh jaise vasl ki shab hai sahar mujhe tere sunahre rang pe mujh ko jo hai junun atfaal karte hain hadaf-e-khisht-e-zar mujhe 'naasikh' ba-rang-e-nikhat-e-gul hai safar miraa markab huaa hai dosh-e-nasim-e-sahar mujhe"

"ab ki holi mein rahaa be-kaar rang aur hi laayaa firaaq-e-yaar rang surkh-ru kar de sharaab aai bahaar hai khizaan se zard ai khummaar rang honT uude sabz khat aankhein siyaah chehre kaa surkh-o-safed ai yaar rang ham ko saare gulshan-e-aafaaq mein bas pasand aae yahi do-chaar rang ghair se kheli hai holi yaar ne Daale mujh par dida-e-khun-baar rang kis ki holi jashn-e-nau-rozi hai aaj surkh mai se saaqiyaa dastaar rang hijr-e-jaanaan mein Thahartaa hi nahin kyaa hi mere munh se hai bezaar rang kyaa hai girgiT aasmaan ke saamne badle ik ik dam mein sau sau baar rang aati hai o qais lailaa dasht mein khun-e-paa se jild ab pur-khaar rang dhuup hai par mere roz-e-hijr kaa hai ba-rang-e-saaya-e-divaar rang ho gayaa kyuun zard 'naasikh' kyaa kahun hai zamaane kaa ajab ai yaar rang"

"qadah liye hue gul misl-e-baada-khvaar aayaa khizaan chaman se gai mausam-e-bahaar aayaa kisi tariq se dil mein agar ghubaar aayaa huaa yaqin ye mujh ko vo shah-savaar aayaa tamaam 'umr yuun hi ho gai basar apni shab-e-firaaq gai roz-e-intizaar aayaa gul-e-savaar-o-payaada shikast khaa gae sab chaman mein jab tan-e-tanhaa vo shahsavaar aayaa khabar kare koi zaahid ko aae bahr-e-madad shikast-e-tauba ko phir mausam-e-bahaar aayaa sharaab kyon na chale fasl-e-gul mein ai zaahid ki nahrein jaari huiin mausam-e-bahaar aayaa diye falak ne mire sar ko kaTte hi gul-daagh gila nahin koi paanv tale jo khaar aayaa chaman mein koi gul-e-tar jo shaakh par dekhaa to mujh ko yaad vo mahbub nai-savaar aayaa kabhi jo sair-e-chaman ko vo nai-savaar gayaa gul-e-piyaada ye samjhe ki gul-savaar aayaa lab us ke pista zaqan seb aankhein hain baadaam khule jo daant hansi mein nazar anaar aayaa jo gosh-e-gul na sune baagh mein to kyaa chaara qafas se naala-e-bulbul hazaar baar aayaa tiri savaari mein kab panj shaakhe hain ai sarv jilau mein sehn-e-gulistaan se hai chinaar aayaa shikast paai hai tauba ki tarah us ko bhi hamaare paas jo ai mai-kasho khumaar aayaa ye naazuki ke hain maa'ni ke baagh mein vo gul qarib aatish-e-gul jo gayaa bukhaar aayaa kabhi na qatra diyaa tu ne saaqiyaa mujh ko udhar na aatish-e-mai kaa koi sharaar aayaa misaal-e-sang-e-garaan jaan nahin jo baiTh rahun ki is jahaan mein huun surat-e-sharaar aayaa lagaa jo tiir tiraa sina-e-mushabbak mein main khush huaa ki mire daam mein shikaar aayaa dikhaa ke baagh mein aankhein chaDhi hui apni vo nashsha dida-e-nargis se aaj utaar aayaa"

"rif'at kabhi kisi ki gavaaraa yahaan nahin jis sar-zamin ke ham hain vahaan aasmaan nahin do roz ek vaz' pe rang-e-jahaan nahin vo kaun saa chaman hai ki jis ko khizaan nahin 'ibrat ki jaa hai laakhon hi tifl o javaan nahin piiri mein bhi khayaal ajal kaa yahaan nahin dushman agar vo dost huaa hai to kyaa 'ajab yaan e'timaad-e-dosti-e-jism-o-jaan nahin raftaar naaz mein ye lachak jaati hai ki bas goyaa tiri kamar mein sanam ustukhvaan nahin mun'im ke shukr mein bhi hilaaein kabhi kabhi tanhaa baraae-lazzat-e-duniyaa zabaan nahin pazhmurda ek hai to shagufta hai dusraa baagh-e-jahaan mein fasl-e-bahaar-o-khizaan nahin jin ke suron par aap magas-raaan rahe humaa un kaa lahad mein aaj koi ustukhvaan nahin dhokaa na khaa zuruf-e-vazu ko tu dekh kar masjid hai mai-farosh ki 'naasikh' dukaan nahin"

"haae laayaa na koi qaasid-e-dilbar kaaghaz ho gayaa gham se hamaaraa tan-e-laaghar kaaghaz naama-e-yaar ke likhne ko mujhe arzaan hai tol de gar koi sone ke baraabar kaaghaz yuun lifaafe mein hamaaraa hai kalaam-e-shirin jis tarah baandhte hain qand ke uupar kaaghaz naa-tavaani se nahin hai mujhe mumkin harakat main huun harfon ki tarah meraa hai bistar kaaghaz haal likkhaa hai jo main ne badan-e-laaghar kaa le uDaa tinke ki maanind kabutar kaaghaz main ne likkhaa hai jo apnaa ye musibat-naama mohr karne ko karun ashk se ab tar kaaghaz mere naame ko agar dast-e-hinaai mein vo le varaq-e-gul se bhi ho rang mein behtar kaaghaz haal-e-soz-e-gham-e-furqat karun tahrir to ho kabk ki chonch qalam baal samundar kaaghaz is qadar misl-e-qalam main ne jabin-saai ki ban gayaa ghis ke dar-e-yaar kaa patthar kaaghaz yaar ne khat mein jo likkhaa hai ki na aanaa hargiz ho gayaa mere liye sadd-e-sikandar kaaghaz saath naame ke gai jaan bhi su-e-jaanaan ho gayaa taair-e-jaan ke liye shahpar kaaghaz nahin tohfa khat-e-jaanaan ke baraabar koi hai mujhe qand-o-zaqan se kahin behtar kaaghaz jaa-e-jarraah ki ab naama-bar aa pahunchaa hai badle phaahe ke rakhun daagh-e-jigar par kaaghaz kyaa main iflaas mein khat yaar ko likkhun 'naasikh' na qalam hai na siyaahi na mayassar kaaghaz"

"sau qisson se behtar hai kahaani mire dil ki sun us ko tu ai jaan zabaani mire dil ki har naale mein yaan TukDe jigar hotaa hai bulbul aasaan nahin tarz uDaani mire dil ki honi hai shahid ek na ik roz tamannaa mauquf ho kyaa marsiya-khvaani mire dil ki piiri mein bhi miltaa hai jo kam-sin koi mahbub karti hai vahin uud javaani mire dil ki taqsim kiye paara-e-dil bazm-e-butaan mein har ek ke hai paas nishaani mire dil ki ik baat mein ho jaae musakhkhar vo pari-ru suntaa hi nahin sehr-bayaani mire dil ki hai abr to kyaa chaahe falak ko bhi jalaa de bijli mein kahaan shola-fishaani mire dil ki zulfon mein kiyaa qaid na abru se kiyaa qatl tu ne to koi baat na maani mire dil ki ye baar-e-gham-e-ishq samaayaa hai ki 'naasikh' hai koh se dah-chand giraani mire dil ki"

"hai mohabbat sab ko us ke abru-e-khamdaar ki hind mein kyaa aabru baaqi rahi talvaar ki vasl ki shab chaandni divaar se jaane na paae minnatein kartaa huun har khaar-e-sar-e-divaar ki usturaa phirne se ru-e-yaar par hai daur-e-khat chaal us kam-bakht ne sikhi hai kyaa parkaar ki nashsha-e-mai kaa gumaan karne lagaa vo bad-gumaan dekh kar surkhi hamaare dida-e-khun-baar ki ghar bhi meraa muntazir hai yaar kaa meri tarah rauzan-e-dar mein hai surat dida-e-bedaar ki kahte ho ham khvaab mein aate jo tu sotaa kabhi khuub ki barbaad mehnat dida-e-bedaar ki baagh-e-aalam mein kahaan hai koi mujh saa rahm-dil roz kartaa huun ayaadat nargis-e-bimaar ki daagh-e-sar hain josh-e-saudaa mein ba-rang-e-gul mujhe misl-e-gulbun paanv mein kab hai shikaayat khaar ki vo khudaa kaa dost hai aur dost hai us kaa khudaa kyuun na ho 'naasikh' mohabbat haidar-e-karraar ki"

"mujh se ab saaf bhi ho jaa yunhi yaar aap se aap jis tarah hai tiri khaatir mein ghubaar aap se aap kab kahaa aatish-e-furqat se jalaayaa tu ne hain mire naala-e-dil saaiqa-baar aap se aap khaar tadbir hai pesh-e-gul-e-taqdir 'abas vaqt par baagh mein aati hai bahaar aap se aap donon 'aalam mein agar ek nahin shoabada-baaz jam' kyuun kar hue azdaad ye chaar aap se aap nahin aataa jo vo khurshid mire ghar mein na aae subh ho jaaegi aakhir shab-e-taar aap se aap kuchh shikaayat nahin ishq-e-kamar-e-naazuk ki ho gayaa huun main sanam zaar-o-nazaar aap se aap o vajud-e-chaman-aaraa-e-azal ke munkir khud-bakhud gul hue maujud na khaar aap se aap surkh poshaak pahan kar vo sahi qad jo gayaa jal uThe sarv-e-chaman misl-e-chinaar aap se aap zulf ko chhu ke paDaa hai jo balaa mein ai dil kaaT khaataa hai kisi ko koi maar aap se aap kuchh tiri tegh-e-jafaa ki nahin taqsir ai gul surat-e-ghuncha miraa dil hai figaar aap se aap ghair kaa munh hai ki le bose tire o zaalim nilgun ho gae honge ye ezaar aap se aap naala-kash misl-e-jaras kyuun hai 'abas ai majnun sabr kar aaegi jammaaza-savaar aap se aap"

"karti hai mujhe qatl mire yaar ki raftaar talvaar ki talvaar hai raftaar ki raftaar kaj aisi na thi aage mire yaar ki raftaar sikhaa hai magar charkh-e-sitam-gaar ki raftaar sar girte hain kaT kaT ke vo rakhtaa hai jahaan paanv sikhi hai magar yaar ne talvaar ki raftaar gardish hai tiri nargis-e-bimaar ko din-raat dekhi nahin aisi kisi bimaar ki raftaar Talti nahin zulfon ke tasavvur ki tarah se hai turfa judaai ki shab-e-taar ki raftaar laghzish na ho kyuun kar rah-e-din mein mujhe zaahid yaad aa gai us kaafir-e-mai-khvaar ki raftaar zaalim tire kuche se qadam uTh nahin saktaa kyuun kar na chalun saaya-e-divaar ki raftaar kyaa maar ko nisbat tire gesu ke chalan se hai saaya-e-gesu mein sanam maar ki raftaar moti evaz-e-naqsh-e-qadam girte hain 'naasikh' aisi hai miri kilk-e-guhar-baar ki raftaar"

"yaad aati hain hamein jaan tumhaari baatein haae vo pyaar ki aavaaz vo pyaari baatein pahron chup rahte hain ham aur agar bolte hain vahi phir phir ke ulaTti hain tumhaari baatein ghair har dam mujhe baatein jo sunaa jaate hain jaantaa huun ye main ai jaan tumhaari baatein yaad aataa hai tiraa kyaa ke evaz kaa kahnaa haae phir kab main sunungaa vo ganvaari baatein hai buri baat ye aghyaar se baatein karni varna ai jaan tiri achchhi hain saari baatein is tarah bol nikalte na sune the ham ne karti hai saaf sanam teri sitaari baatein tu vo ejaaz-e-bayaan hai ki masihaa samjhein sun lein ai jaan kisi din jo juaari baatein is liye ashk bahaataa huun dam-e-fikr-e-sukhan ki hamesha rahein duniyaa mein ye jaari baatein tu vo gul hai ki agar kaan dhare gulshan mein ho zabaan mauj kare baad-e-bahaari baatein kijiye sehr-bayaani se musakhkhar kyun-kar kabhi suntaa nahin 'naasikh' vo hamaari baatein"

"jab se ki buton se aashnaa huun begaana khudaai se huaa huun kyuun kar kahun aarif-e-khudaa huun aagaah nahin ki aap kyaa huun jab hijr mein baagh ko gayaa huun main aatish-e-gul mein jal-bujhaa huun furqat mein jo sar paTak rahaa huun mashghul-e-namaaz-e-kibriyaa huun munh zard hai tinke chun rahaa huun ai vahshat kyaa main kahrubaa huun begaana huun kyuun kar aashnaa se begaanon se main bhi aashnaa huun munh un kaa nahin hai shukr varna har but kahtaa ki main khudaa huun ummid-e-visaal ab kahaan hai us gul se ba-rang-e-bu judaa huun kyuun dost na khush hon jaae maatam simaab ki tarah mar gayaa huun khilqat khush ho jo main huun paamaal gulzaar-e-jahaan mein kyaa hinaa huun hans dungaa dam mein misl-e-gul aap ghunche ki tarah se go khafaa huun aatish-qadami se jalte hain khaar ai qais main vo barahna-paa huun karte hain gurez mujh se manhus be-shubah main saaya-e-humaa huun huun qaafila-e-adam se aage is raah mein naala-e-daraa huun 'naasikh' ki ye iltijaa hai yaarab mar jaaun to khaak-e-karbalaa huun"

"hain ashk miri aankhon mein qulzum se ziyaada hain daagh mire siine mein anjum se ziyaada sau ramz ki kartaa hai ishaare mein vo baatein hai lutf khamoshi mein takallum se ziyaada juz sabr dilaa chaara nahin ishq-e-butaan mein karte hain ye zulm aur tazallum se ziyaada mai-khaane mein sau martaba main mar ke jiyaa huun hai qulqul-e-minaa mujhe qum-qum se ziyaada sau raqs se afzun hai pari-ru tiri raftaar paanv ki sadaa laakh tarannum se ziyaada taklif-e-takalluf se kiyaa ishq ne aazaad mu-e-sar-e-shorida hain qaaqum se ziyaada maashuqon se ummid-e-vafaa rakhte ho 'naasikh' naadaan koi duniyaa mein nahin tum se ziyaada"

"yuun mujhe aap se ab karti hai taqdir judaa jis tarah jang mein ho qabze se shamshir judaa mas ke zar hone se behtar hai kamaal-e-insaan khaaksaari hai judaa aur hai iksir judaa jaa-e-dandaan lab-e-sofaar hue ai qaatil dahan-e-zakhm se hogaa na tiraa tiir judaa maraz-e-ishq mein piiTh apni ye bistar se lagi na kabhi safha se jis shakl ho tasvir judaa ai junun paanv hain jab tak ye tamannaa hai mujhe kabhi maanind ragon ke na ho zanjir judaa chhoDun kyaa piiri mein shirin-dahanon ki sohbat nahin mumkin ki hon mil kar shakar-o-shir judaa kahte hain dekh ke zulf us ke rukh-e-taabaan par kabhi hotaa nahin us shama se gul-gir judaa jab judaai ke mazaamin mujhe sujhe hain harf se harf huaa hai dam-e-tahrir judaa kyuun na ho jalva-e-khurshed se saae kaa vajud kyaa tire chehre se ho zulf-e-girah-gir judaa mujh giraftaar-e-judaai ke jo paanv mein paDi ho junun halqe se har halqa-e-zanjir judaa main ne jo dard-e-judaai se kiye hain naale kijiye tan se miraa sar pa-e-taazir judaa tegh-e-aahan se sivaa hai burish-e-tegh-e-zabaan haq ko baatil se karegi tiri taqrir judaa aashnaa muttahid is darja kahaan hote hain aap dil-gir hai 'naasikh' jo hai dil-gir judaa"

"hain ashk miri aankhon mein qulzum se ziyaada hain daagh mire siine mein anjum se ziyaada sau ramz ki kartaa hai ishaare mein vo baatein hai lutf khamoshi mein takallum se ziyaada juz sabr dilaa chaara nahin ishq-e-butaan mein karte hain ye zulm aur tazallum se ziyaada mai-khaane mein sau martaba main mar ke jiyaa huun hai qulqul-e-minaa mujhe qum-qum se ziyaada sau raqs se afzun hai pari-ru tiri raftaar paaon ki sadaa laakh tarannum se ziyaada taklif-e-takalluf se kiyaa ishq ne aazaad mu-e-sar-e-shorida hain qaaqum se ziyaada maashuqon se ummid-e-vafaa rakhte hain 'naasikh' naadaan koi duniyaa mein nahin tum se ziyaada"

"jaan ham tujh pe diyaa karte hain naam teraa hi liyaa karte hain chaak karne ke liye ai naaseh ham garebaan siyaa karte hain saaghar-e-chashm se ham baada-parast mai-e-didaar piyaa karte hain zindagi zinda-dili kaa hai naam murda-dil khaak jiyaa karte hain sang-e-asvad bhi hai bhaari patthar log jo chuum liyaa karte hain kal na degaa koi miTTi bhi unhein aaj zar jo ki diyaa karte hain dafn mahbub jahaan hain 'naasikh' qabrein ham chuum liyaa karte hain"

"qaamat-e-yaar ko ham yaad kiyaa karte hain sarv ko sadqe mein aazaad kiyaa karte hain zulf-e-shab-rang ko ham yaad kiyaa karte hain shab-e-taarik mein fariyaad kiyaa karte hain nigah-e-yaar ko ham yaad kiyaa karte hain dekh kar barq ko fariyaad kiyaa karte hain kucha-e-yaar ko ham yaad kiyaa karte hain jaa ke gulzaar mein fariyaad kiyaa karte hain ghar jo be-yaar hai viraan to tasavvur mein mudaam khaana-e-dil ko ham aabaad kiyaa karte hain rashk se naam nahin lete ki sun le na koi dil hi dil mein use ham yaad kiyaa karte hain guzre hain kucha-e-kaakul se sabaa ke jhonke nikhat-e-gul ko jo barbaad kiyaa karte hain hote hain jaate hi maktab mein pari-ru khun-rez kyaa ye jallaadon ko ustaad kiyaa karte hain phunk dein naala-e-sozaan se agar chaahein qafas ham faqat khaatir-e-sayyaad kiyaa karte hain hoti hai aafat-e-khat qahr-e-khudaa se naazil ye sanam ham pe jo bedaad kiyaa karte hain malak-ul-maut agar kahiye unhein to hai bajaa qatl be-tegh pari-zaad kiyaa karte hain tu vo sayyaad hai jo vaar ke tujh par laakhon taaer-e-ruh ko aazaad kiyaa karte hain intiqaam is kaa kahin le na falak Dartaa huun jhuTe vaadon se jo vo shaad kiyaa karte hain teraa divaan hai kyaa saamne un ke 'naasikh' jo ki quraan pe iraad kiyaa karte hain"

"saaf qaasid ko vaan javaab milaa mere khat kaa yahi javaab milaa aaj zarre ko aaftaab milaa ki mujhe saaghar-e-sharaab milaa kahte hain subh-dam vo dekh ke munh jaa-e-aaina aaftaab milaa be-sabaat apni bazm-e-aish jo hai shisha-e-mai ki jaa habaab milaa bakht ne paai jab ki bedaari mere paa-e-talab ko khvaab milaa ho gayaa dil jo aabla saaqi samjhe ham shisha-e-sharaab milaa gor bhi khud rahi hai mehr ke saath aap khush ho gae khitaab milaa kab se 'naasikh' ye justuju hai mujhe aaj vo khaanumaan-kharaab milaa"

"mai se raushan rahe ayaagh apnaa gul na ho saaqiyaa charaagh apnaa hijr mein tar ho kyaa dimaagh apnaa khushk lab aap hai ayaagh apnaa nikhat-e-zulf jab se aai hai nahin miltaa hamein dimaagh apnaa kis ki ham justuju mein nikle the nahin paate kahin suraagh apnaa kyaa hai mazkur-e-marham-e-kaafur jab namak saudaa ho na daagh apnaa hai shab-e-hijr vaadi-e-vahshat dida-e-ghul hai charaagh apnaa raat-din gul-rukhon se sohbat thi yaad aataa hai khaana-baagh apnaa so rahaa jo lipaT ke vo gul-e-tar dil huaa aaj baagh-baagh apnaa barg-e-gul saaf ban gayaa phaahaa kyaa moattar huaa dimaagh apnaa"

"choT dil ko jo lage aah-e-rasaa paidaa ho sadma shishe ko jo pahunche to sadaa paidaa ho kushta-e-tegh-e-judaai huun yaqin hai mujh ko uzv se uzv qayaamat mein judaa paidaa ho ham hain bimaar-e-mohabbat ye duaa maangte hain misl-e-iksir na duniyaa mein davaa paidaa ho kah rahaa hai jaras-e-qalb ba-aavaaz-e-buland gum ho rahbar to abhi raah-e-khudaa paidaa ho kis ko pahunchaa nahin ai jaan tiraa faiz-e-qadam sang par kyuun na nishaan-e-kaf-e-paa paidaa ho mil gayaa khaak mein pis pis ke hasinon par main qabr par boein koi chiiz hinaa paidaa ho ashk tham jaaein jo furqat mein to aahein niklein khushk ho jaae jo paani to havaa paidaa ho yaan kuchh asbaab ke ham bande hi muhtaaj nahin na zabaan ho to kahaan naam-e-khudaa paidaa ho gul tujhe dekh ke gulshan mein kahein umr daraaz shaakh ke badle vahin dast-e-duaa paidaa ho bosa maangaa jo dahan kaa to vo kyaa kahne lage tu bhi maanind-e-dahan ab kahin naa paidaa ho na sar-e-zulf milaa balbe daraazi teri rishta-tul-e-amal kaa bhi siraa paidaa ho kis tarah sach hai na khurshed ko rajat ho jaae tujh saa aafaaq mein jab maah-laqaa paidaa ho abhi khurshed jo chhup jaae to zarraat kahaan tu hi pinhaan ho to phir kaun bhalaa paidaa ho kyaa mubaarak hai miraa dast-e-junun ai 'naasikh' baiza-e-bum bhi TuuTe to humaa paidaa ho"

"ji leti hai vo zulf-e-siyah-faam hamaaraa bujhtaa hai charaagh aaj sar-e-shaam hamaaraa aisaa koi gumnaam zamaane mein na hogaa gum ho vo nagin jis pe khude naam hamaaraa avval to na qaasid ko rahe ku-e-sanam yaad pahunche to faraamosh ho paighaam hamaaraa ham go ki hain divaane magar gharq-e-yam-e-ashk yunaan ke maanind huaa naam hamaaraa mai paai na piine ko to ham pi gae aansu ashkon se bhi saaqi na bharaa jaam hamaaraa kaabe mein bhi vahshat ki rahi dast-daraazi sad-chaak kiyaa jaama-e-ehraam hamaaraa tifli mein thi ik daaya hain ab chaar ke kaandhe aaghaaz se kyaa khuub hai anjaam hamaaraa ik-aadh rahe jism-e-mushabbak mein tiraa tiir khaali na kabhi said se ho daam hamaaraa kaam auron ke jaari rahein naakaam rahein ham ab aap ki sarkaar mein kyaa kaam hamaaraa 'naasikh' kahein jald aa ke kahein qaasid-e-jaanaan khat lijiye dilvaaiye inaam hamaaraa"

"maza visaal kaa kyaa gar firaaq-e-yaar na ho nahin hai nashshe ki kuchh qadr agar khumaar na ho na roe taa koi 'aashiq ye hukm hai us kaa ki sham' bhi miri mahfil mein ashk-baar na ho jo hichki aai to khush main huaa ki maut aai kisi ko yaar kaa itnaa bhi intizaar na ho zaqan hai seb to unnaab hai lab-e-shirin nahin hai sarv vo khush-qad jo meva-daar na ho vo huun main morid-e-nafrat ki darkinaar hai yaar pae fishaar kabhi gor ham-kanaar na ho na aae kunj-e-lahad mein bhi mujh ko khvaab-e-'adam agar sirhaane koi khisht-e-ku-e-yaar na ho ba-rang-e-husn-e-butaan hai dil-e-shagufta miraa jo is chaman mein khizaan ho to phir bahaar na ho gai hai kaisi zamaane se rasm-e-sar-garmi 'ajab nahin hai jo patthar mein bhi sharaar na ho na hansne se kabhi hamraaz posh vaaqif hon ba-rang-e-ghuncha jigar jab talak figaar na ho tiri mizha ki jo tashbih us se tark karein kisi ke tiir se koi kabhi figaar na ho dam-e-akhir to kar lein nazaara ji bhar ke ilaahi khanjar-e-saffaak aab-daar na ho yahi hai qulzum-e-gham mein miri du'aa yaa-rab qayaam is mein koi bhi habaab-daar na ho vo subh sina-e-sad-chaak mein hai daagh-e-junun ki jis se dida-e-khurshed bhi do-chaar na ho havas 'uruj ki le jaaein gar ye duniyaa se kabhi buland havaa se koi ghubaar na ho kamaal-e-surat-e-be-dard se tanaffur hai na dekhein ham kabhi us gul ko jis mein khaar na ho hazaaron gor ki raatein hain kaaTni 'naasikh' abhi to roz-e-siyah mein tu be-qaraar na ho"

"hamaari kaif sazaa-vaar-e-ehtisaab nahin khayaal-e-chashm hai kuchh saaghar-e-sharaab nahin vo be-naqaab huaa hai to ye tamaashaa hai do-chaar hone ki aankhon mein apni taab nahin ye mujh ko us ke taghaaful se hai yaqin ki haae javaab-naame so ai naame kaa javaab nahin samaa rahaa hai yahaan tak pari-rukhon kaa jamaal hamaari aankhon mein khaali maqaam-e-khvaab nahin buton ke parde mein ham dekhte hain nur-e-khudaa khudaa ke dekhne ki ai kalim taab nahin vufur-e-ashk se kyon hai gale talak paani hamaaraa kaasa-e-sar kaasa-e-habaab nahin main bazm-e-shaahid-o-saaqi mein kyon na vajd karun baraa-e-zohd-o-varaa aalam-e-shabaab nahin kiyaa hai daagh ne kyon us ko manzil-e-khurshid hamaaraa dil hai ye kuchh burj-e-aaftaab nahin huaa hai maan-e-didaar-e-yaar parda-e-chashm khuli jo aankh to kuchh darmiyaan hijaab nahin ye zabt-e-girya mein aalam hai be-qaraari kaa ki barq kaundti hai baarish-e-sahaab nahin bashar ke jism mein hai jaan maaya-e-ghaflat so ai dida-e-tasvir kis ko khvaab nahin dilaa hai mausam-e-piri mahal jaam-e-sharaab baghair subh koi vaqt-e-aaftaab nahin main ghash se us ke chhiDakte hi hoshiyaar huaa kisi sanam kaa pasina hai ye gulaab nahin bahut fareb se ham vahshiyon ko vahshat hai hamaare dasht mein 'naasikh' kahin saraab nahin"

"sab hamaare liye zanjir liye phirte hain ham sar-e-zulf-e-girah-gir liye phirte hain kaun thaa said-e-vafaadaar ki ab tak sayyaad baal-o-par us ke tire tiir liye phirte hain tu jo aae to shab-e-taar nahin yaan har su mishalein naala-e-shab-gir liye phirte hain teri surat se kisi ki nahin milti surat ham jahaan mein tiri tasvir liye phirte hain moatakif garche ba-zaahir huun tasavvur mein magar ku-ba-ku saath ye be-pir liye phirte hain rang-e-khubaan-e-jahaan dekhte hi zard kiyaa aap zor aankhon mein iksir liye phirte hain jo hai martaa hai bhalaa kis ko adaavat hogi aap kyuun haath mein shamshir liye phirte hain sar-kashi shama ki lagti nahin gar un ko buri log kyuun bazm mein gul-gir liye phirte hain taa gunahgaari mein ham ko koi matun na kare haath mein naama-e-taqdir liye phirte hain qasr-e-tan ko yuun hi banvaa ye bagule 'naasikh' khuub hi naqsha-e-taamir liye phirte hain"