Ghazal

"aa rahi hai ye tuur se aavaaz aae vo jis ko taab-e-did pe naaz ye taDap aur ye aah ruh-e-gudaaz haae hain apnaa khud nahin hamraaz hai vahin ibtidaa-e-sarhad-e-naaz ho jahaan khatm 'aql ki parvaaz vo muqarrar to dar karein apnaa DhunD legi miri jabin-e-niyaaz ek mizraab-e-gham mein TuuT gayaa kitnaa naazuk thaa zindagi kaa saaz parda-e-zist uTThaa rahaa huun main ab to uTh parda-e-harim-e-naaz un ki nichi nazar kaa ochhaa tiir dil mein hai misl-e-umr-e-khizr daraaz vaqt-e-aakhir nafas mein paataa huun teri raftaar-e-naaz ke andaaz kaisaa giryaan hai kaisaa naadim hai meri mayyat pe meraa duniyaa-saaz har zamin sair-gaah thi apni haae vo 'abr' quvvat-e-parvaaz"

"vahshat-zadon ki kitni dilchasp hain adaaein kuchh der khuun roein kuchh der muskuraaein hairaan hain kidhar ham bahr-e-talaash jaaein aati hain har taraf se un ki hi ab sadaaein gunji huiin hain mere naalon se ye fazaaein yaa kaali kaali raatein karti hain saaein saaein us vaqt khaas rahrav himmat na haar jaaein manzil qarib samjhein jab paanv Dagmagaaein ye dekhnaa hai mujh par kyaa bijliyaan giraaein badli to hain havaaein uTThi to hain ghaTaaein uf sharmgin nigaahein baarbaad-kun adaaein ye nimche kisi ke dil mein na Duub jaaein ab hichkiyaan bani hain rukh nazaa mein badal kar maayus aarzuein naakaam iltijaaein dil ki tabaahiyon par masrur hone vaale dil hi na ho to tere jalve kahaan samaaein pahle hi sochte tum aahon kaa ab gila kyaa jo bandh gaiin havaaein vo bandh gaiin havaaein main lafz-e-dost sun kar Dartaa huun dil hi dil mein vo mujh se 'abr' ki hain ahbaab ne daghaaein"

"fariyaad hai ki meri nazar se nihaan rahe aur jalva-rez aap makaan-dar-makaan rahe ghar-e-be-nishaan qafas se rihaai chaman mein barq is bebasi ke daur mein koi kahaan rahe rudaad apne ishq ki gunge kaa khvaab thaa taa-zist apne raaz ke khud raazdaan rahe tum kyon udaas ho gae maidaan-e-hashr mein kah do to dil ki dil mein miri daastaan rahe manzil thi duur raah thi gham khud shikasta-paa shauq-e-talab bataa to sahi ham kahaan rahe duniyaa ho 'abr' yaa vo adam ho ki bazm-e-hashr un ki hi justuju mein rahe ham jahaan rahe"

"qaidiyon mein na kare zikr-e-gulistaan koi le ke uD jaae na gulzaar mein zindaan koi daagh-haa-e-dil-e-viraan pe taajjub na karo bas bhi jaataa hai kisi vaqt bayaabaan koi shaayad is baat pe lab mere siye jaate hain aah ke saath nikal jaae na armaan koi shiddat-e-dard ne fitrat hi badal di dil ki naala ho jaataa hai bantaa hai jo armaan koi sakhti-e-raah-e-talab dekh ke ji chhuT gayaa 'abr' vo chhoD chalaa jaada-e-irfaan koi"

"sau zulmatein hai ishq-e-pareshaan liye hue aa jaao mashal-e-rukh-e-taabaan liye hue har mauj be-kharaash thi dariyaa-e-husn ki aanaa paDaa talaatum-e-armaan liye hue dast-e-junun ko chheD na ghairat-dah-e-bahaar daaman se jaa mile na garebaan liye hue baDh jaae aur arsa-e-mehshar zaruratan aayaa huun saath kasrat-e-isyaan liye hue ik sarmadi hayaat gale mil ke di gai thi tegh-e-naaz chashma-e-haivaan liye hue dete rahe vo husn ko dars-e-jamaal-e-tur baiThaa rahaa main dida-e-hairaan liye hue aataa hai kaun hashr mein ye jhumtaa huaa sajdon ke saath kucha-e-jaanaan liye hue tu apne tir-e-naaz kaa mujh se na zikr kar dil uD na jaae aalam-e-imkaan liye hue chhaayaa hai 'abr' mohr-e-qayaamat pe ban ke abr vo ashk thaa jo dida-e-giryaan liye hue"

"bekasi kaa haal mayyat se ayaan ho jaaegaa be-zabaan honaa miraa goyaa zabaan ho jaaegaa shauq se dil ko miTaa do lekin itnaa soch lo is ke har zarre se paidaa ik jahaan ho jaaegaa dil ke bahlaane ko aao aaj naale hi karein aasmaan ke zarf kaa bhi imtihaan ho jaaegaa vaqt khud maanus kar detaa hai ai taaza asiir chand din rah le qafas bhi aashiyaan ho jaaegaa 'abr' main kyaa kah sakungaa un se haal-e-dard-e-dil jo zabaan se lafz niklegaa fughaan ho jaaegaa"

"vahin se had mili hai jaa pahunchtaa ku-e-jaanaan tak rasaai saaliko jab aql kar le hadd-e-imkaan tak junun mein dast-e-laaghar kaa hai qabza us bayaabaan tak jahaan sau manzilein paDti hain daaman se garebaan tak mire dast-e-junun kaa zor aur phir zor bhi kaisaa ki hamraah-e-garebaan khinche laataa hai rag-e-jaan tak tumhein to khel thaa nazrein milaa kar munh chhupaa lenaa yahaan nashtar hazaaron ruk gae aa kar rag-e-jaan tak kafan mein koi dekhe aaj un haathon ki majburi rahaa karte the gardish mein jo daaman se garebaan tak"

"aap se shikva ye karnaa hai agar raaz rahe ahd mein husn ke ham kushta-e-andaaz rahe shart parda hai to ye aaj se andaaz rahe meri aavaaz mein pinhaan tiri aavaaz rahe ban gayaa dard muqaddar se mire ye varna naaz to ruh-e-mohabbat hai agar naaz rahe main jo asraar-e-mohabbat kahin zaahir kar duun ho ke har saaz se paidaa tiri aavaaz rahe aap ke gham ko chhupaa luun ye bajaa farmaayaa aur agar rang-e-rukh aamaada-e-parvaaz rahe saans mein nazaa ki hichki ko badaltaa huun main sai-e-aakhir hai agar raaz-e-vafaa raaz rahe"

"lan-taraani kaa bataane ke liye raaz mujhe kaun detaa hai sar-e-tur ye aavaaz mujhe ishq mein aur bhi divaana banaa deti hai meri aavaaz mein mil kar tiri aavaaz mujhe ruuh aazaad thi paaband-e-qafas rah na saki uD gayaa le ke miraa jazba-e-parvaaz mujhe main to jaataa hi thaa tang aa ke adam ki jaanib tum ne kyon rok liyaa de kar ik aavaaz mujhe taane sab dete hain mujh ko miri mazlumi ki kis qadar rahm-o-karam par thaa tire naaz mujhe kaun ab kashmakash-e-zist se de mujh ko najaat kar chukaa hai miraa qaatil nazar-andaaz mujhe dekhte hi unhein aahein bhi hain fariyaadein bhi 'abr' sab aa hi gae ishq ke andaaz mujhe"

"vahaan pahunchaa diyaa hai ishq ne ab marhala dil kaa jahaan sab farq miT jaataa hai bismil aur qaatil kaa judaai kaa vafaa kaa jaur kaa ulfat ki mushkil kaa rahaa hai saamnaa har sang se aaina-e-dil kaa chalo achchhaa huaa tum aa gae dam toDtaa thaa main yahi dushvaar thi saaat yahi thaa vaqt mushkil kaa palaT aataa huun main maayus ho kar un maqaamon se jahaan se silsila nazdik-tar hotaa hai manzil kaa kamaal-e-shauq mein majnun anaa lailaa kaa qaael hai agar aise mein parda khud-bakhud uTh jaae mahmil kaa araq se tar jabin khanjar mein laghzish rukh pe ghabraahaT adab ai sakht-jaan parda khulaa jaataa hai qaatil kaa khaDaa hai 'abr' dar par kuchh nahin dete na do lekin nahin dil toDte arbaab-e-himmat apne saail kaa"

"hairaan nahin hain ham ki pareshaan nahin hain ham is par bhi shaaki-e-gham-e-dauraan nahin hain ham shikva zabaan pe laaein vo insaan nahin hain ham tere sitam-ba-khair pareshaan nahin hain ham khaak apni khaak-e-kucha-e-jaanaan mein jaa mili ehsaanmand-e-gor-e-gharibaan nahin hain ham aankhon mein ashk daagh jigar mein labon pe aah sab kuchh hai paas be-sar-o-saamaan nahin hain ham gulhaa-e-ashk-e-khun se hai daaman bharaa huaa kis ne kahaa ki khuld-ba-daamaan nahin hain ham ham se gurez ham se ye be-eatinaaiyaan ai dost bul-havas kaa to armaan nahin hain ham hasrat jo aa gai vo nikal hi nahin saki vaa ho sake jo 'abr' vo zindaan nahin hain ham"

"dar-pesh shaam-e-gham hai adam kaa safar mujhe is tirgi mein raah milegi kidhar mujhe eajaaz-e-chashm-e-naaz dikhaa fitna-gar mujhe yaani miTaa diyaa hai to paidaa bhi kar mujhe majbur raaz kahne pe hamdam na kar mujhe daar-o-rasan hain saamne haq baat par mujhe saaqi huun rind-e-khaas mile tez-tar mujhe mai-khaana sab jahaan ko sharaab-e-nazar mujhe taabir is ki kyaa hai bataa chaaraagar mujhe dekhaa hai khvaab mein na milegi sahar mujhe kho de malaal hijr kaa chaahe jidhar mujhe uTThi to DhunD legi kisi ki nazar mujhe vo muskuraa rahe hain jidhar dekhtaa huun main kaisaa diyaa gayaa hai fareb-e-nazar mujhe dhoke mein tere ahd-e-mohabbat ke aa gayaa maalum ye hadis hui mo'atabar mujhe divaane ho gae hain mire saath aqrabaa samjhaa rahaa hai ishq mein sab ghar kaa ghar mujhe vo mast-e-kaif-e-naaz hain main be-khud-e-niyaaz un ki khabar unhein hai na meri khabar mujhe sayyaad bhi diyaa to muqaddar se bad-gumaan badle kai qafas jo mile chaar par mujhe kuchh un ki tegh ke bhi baDhaane the hausle kuchh khud bhi baar-e-dosh thaa ulfat mein sar mujhe ik din to aa ke saamne jalve bikher do main yaad kyaa karungaa mili thi nazar mujhe ho kar asiir yuun mire fitrat badal gai jaise kabhi mile hi na the baal-o-par mujhe ik barq thi jo ruuh pe lahraa ke gir paDi ab tak hai yaad aap ki pahli nazar mujhe maayus ho chalaa hai miraa zauq-e-justuju kuchh to pataa bataao miloge kidhar mujhe mujh ko kamaal-e-be-hunari 'abr' hai bahut yaani nahin zarurat-e-arz-e-hunar mujhe"

"khaak main ne jo uDaai thi bayaabaanon mein rasm abhi tak vo chali aati hai divaanon mein vahshiyon ko ye sabaq deti hui aai bahaar taar baaqi na rahe koi garebaanon mein jis ko hasrat ho mire dil se nikal jaane ki aisaa armaan na ho shaamil mire armaanon mein mujh se kahti hai miri ruuh nikal kar shab-e-gham dekh main huun tire nikle hue armaanon mein vahi azkaar-e-havaadis vahi gham ke qisse 'abr' kyaa is ke sivaa hai tire afsaanon mein"

"mushkil hai un ke rukh pe Thaharnaa naqaab kaa baDhne lagaa hai josh mire iztiraab kaa ai aasmaan dekh sitam koi rah na jaae main yaad kyaa karungaa zamaana shabaab kaa sar kaa ke mere munh se kafan kah rahe hain vo shikva thaa kyaa tumhin ko hamaare hijaab kaa duniyaa kaa zarra zarra badaltaa hai karvaTein sab par asar hai ik dil-e-pur-iztiraab kaa haan dekh 'abr' aah tiri kaam kar gai sarkaa rahe hain rukh se vo gosha naqaab kaa"

"barsaae jitne phuul qafas par bahaar ne sab chun liye vo mere dil-e-be-qaraar ne dam toDne se pahle judaai na ki pasand kitnaa diyaa hai saath shab-e-intizaar ne ubhre hain dil ki daagh bhi mausam ke saath saath chamkaa diyaa bahaar ko aa kar bahaar ne ik daagh tak kafan pe na niklaa ba-roz-e-hashr rakhaa samajh ke teri amaanat mazaar ne ai 'abr' meraa toD diyaa rishta-e-hayaat ho kar shikast vaada-e-be-e'tibaar ne"

"nishaan apnaa miTaataa jaa rahaa huun tire nazdik aataa jaa rahaa huun main apne zauq-e-ulfat ke tasadduq sitam par muskuraataa jaa rahaa huun musalsal baj rahaa hai barbat-e-jaur vafaa ke giit gaataa jaa rahaa huun fasaana nazaa mein naakaamiyon kaa nigaahon se sunaataa jaa rahaa huun mohabbat hoti jaati hai mukammal musibat mein samaataa jaa rahaa huun mazaaq-e-justuju hai apnaa apnaa unhein gum ho ke paataa jaa rahaa huun yahaan to hairatein hi hairatein hain ye kis mahfil mein aataa jaa rahaa huun miri aahon ke hain duniyaa mein charche jahaan par 'abr' chhaataa jaa rahaa huun"

"labrez ho chukaa hai paimaana zindagi kaa sun jaao ab bhi aa kar afsaana zindagi kaa jab haal aap hi ne puchhaa na zindagi kaa phir kis ko ham sunaaein afsaana zindagi kaa ab ham hain aur zaalim teri gali ke chakkar gardish mein aa gayaa hai paimaana zindagi kaa kyaa aap sun sakeinge rudaad-e-yaas-o-hasrat kyaa aap ko sunaaun afsaana zindagi kaa aao ki be-tumhaare dam ruk gayaa hai lab par kyon tuul kar rahi ho afsaana zindagi kaa khud mere chaaraagar kaa chehra utar chalaa hai ab de fareb mujh ko duniyaa na zindagi kaa aao ki aa rahe hain ab nazaa ke pasine yaani chhalak chalaa hai paimaana zindagi kaa tum bhi ho kuchh khajil se meraa bhi ruk chalaa dam kah do to khatm kar duun afsaana zindagi kaa daaman pe gir rahe hain ai 'abr' ashk-e-rangin likhtaa huun khun-e-dil se afsaana zindagi kaa"