Ghazal

"usi ko dost rakhaa dusraa banaayaa nahin kai banaate hain main ne khudaa banaayaa nahin ye basti raat kaa kis tarah saamnaa karegi yahaan kisi ne bhi din mein diyaa banaayaa nahin pataa karo ki ye naqqaash kis qabil kaa hai parinda jab bhi banaayaa rihaa banaayaa nahin ye log zulm kamaa kar shab aise sote hain khudaa ne jaise ki roz-e-jazaa banaayaa nahin lahu bhi jaltaa hai jhaDti hai khaak bhi meri ki sher utartaa hai lekin banaa-banaayaa nahin vo mehrbaan hai magar bhultaa nahin mujh ko vo ek kaam jo us ne miraa banaayaa nahin udaas dekhaa nahin jaataa koi mujh se 'aqil' kisi ko is liye haal-aashnaa banaayaa nahin"

"nahin ki dasht ko hijrat ziyaada mushkil hai gharon mein is se bhi vahshat ziyaada mushkil hai natija akhz kiyaa pai-ba-pai shikaston se ki dushmani se mohabbat ziyaada mushkil hai agarche takht-nashini bhi koi sahl nahin magar dilon pe hukumat ziyaada mushkil hai hayaat kaaTne vaalon ko ye nahin maalum ki is se agli masaafat ziyaada mushkil hai 'aqil' Daale the hathiyaar sab se aakhir mein hamaare saath riaayat ziyaada mushkil hai"

"galiyon mein lahu-rezi kaa kuchh hal nikal aae log is liye khud jaanib-e-maqtal nikal aae main kaasa-ba-daston ke qabile kaa huun lekin khush-qismati se haath mire shal nikal aae rone se mujhe khalq-e-khudaa rok rahi thi phir meri taraf-daari mein baadal nikal aae ik sath-e-mohabbat pe khaDaa soch rahaa huun aisaa na ho ye jhiil bhi daldal nikal aae afsos ki ab bhi hain tire daam mein kuchh kuchh ham samjhe the is baar mukammal nikal aae aabaad rahe shahr-e-khamoshaan kise maalum mujh aisaa musaafir yahaan kis pal nikal aae"

"tiraa karam ki main jab maat tak pahunch jaataa to koi haath mire haath tak pahunch jaataa main us ki bazm mein chup-chaap hi rahaa kartaa magar vo phir bhi miri baat tak pahunch jaataa main bhaav-taav agar kartaa to vo khvaab-farosh qayaas hai miri auqaat tak pahunch jaataa agar na miltaa mujhe shaam maah-e-aavaara yaqin maano main ghar raat tak pahunch jaataa main apne bhaai ko pardes kyuun bulaataa 'aqil' vo is tarah mire haalaat tak pahunch jaataa"

"ek hi dasht thaa vo bhi na khangaalaa main ne dil pe lenaa nahin thaa paanv kaa chhaalaa main ne ghar ke Dah jaane mein ghaflat miri shaamil thi magar saaraa malba dar-o-divaar pe Daalaa main ne kaash main apne azaa-daaron ko batlaa saktaa kaisaa dukh thaa vo jise maut se Taalaa main ne aakhir-e-kaar ghulaami se baghaavat kar di aur zanjir ko shamshir mein Dhaalaa main ne yuun to har shakhs yahaan aankh liye phirtaa hai par nahin dekhaa koi dekhne vaalaa main ne aur phir ik roz hamesha ke liye kho gayaa main yaani ik roz use DhunD nikaalaa main ne"

"baDi choron ko aasaani hai mujh mein kisi andhe ki nigaraani hai mujh mein miri aankhon se baahar jhaanktaa hai na-jaane kaun zindaani hai mujh mein dil-e-afsurda ne vo gul khilaae jahaan tak dekhun viraani hai mujh mein bahut bechain rahti hai miri ruuh use koi pareshaani hai mujh mein khulaa ye raaz chashm-e-tar se mujh par samundar se fuzun paani hai mujh mein khudaa ko aazmaaun lamha lamha baDi kaafir musalmaani hai mujh mein"

"koi to raah sujhaa duur tak andheraa hai kahaan hai mere khudaa duur tak andheraa hai miraa khayaal thaa kuchh aage raushni ho gi main jaantaa nahin thaa duur tak andheraa hai kisi ki khoj mein niklaa huun mehr-o-maah liye hai iltimaas-e-duaa duur tak andheraa hai na hogaa tai ye safar sirf raushan aankhon se charaagh-e-dil bhi jalaa duur tak andheraa hai nazar ke saamne the an-ginat sitaare magar faqir kahtaa rahaa duur tak andheraa hai hamaare haath ki rekhaaein kyaa bataati hain hamein bataaiye kyaa duur tak andheraa hai 'aqil' pahle to binaai ki bashaarat di phir us ne mujh se kahaa duur tak andheraa hai"

"mire dukh dard har ik aankh se ojhal paDe the shukr-sad-shukr ki bas ruuh pe hi bal paDe the kisi maqsad se tire paas nahin aae hain kahin jaanaa hi thaa so teri taraf chal paDe the ek main hi nahin shab chhat pe basar kartaa thaa chaand ke pichhe kai aur bhi paagal paDe the kaisaa nazzaaraa thaa kohsaaron ki shahzaadi kaa baam par vo khaDi thi farsh pe baadal paDe the jald-baazon ne bichhaDne mein baDi ujlat ki ek ik masale ke varna kai hal paDe the khud se khud tak kaa safar sahl nahin thaa itnaa raaste mein kai dariyaa kai jangal paDe the ijz ke ashk bahaate hue shab so gayaa main subh uTThaa to mire kaam mukammal paDe the dhyaan tayyaari kaa aayaa hi nahin ham ko 'aqil' safar-e-ishq thaa be-rakht-e-safar chal paDe the"

"khamida raah ko sidhaa ghalat bataayaa hai kisi ne andhon ko rasta ghalat bataayaa hai zarur chor thaa is marne vaale ke dil mein tabhi khazaane kaa naqsha ghalat bataayaa hai main ek baat bataataa magar buzurgon ne har ek baat bataanaa ghalat bataayaa hai yahaan pe rahtaa nahin koi qais naam kaa shakhs kisi ne aap ko sahraa ghalat bataayaa hai ye ziist vaaqai mushkil hai yaa mujhe dil ne guzaarne kaa tariqa ghalat bataayaa hai hamaari dar-badari kyuun pasand hai us ko na-jaane kyuun pataa apnaa ghalat bataayaa hai jadid daur ke darvesh hain 'aqil' hamin harif ne sag-e-duniyaa ghalat bataayaa hai"

"raah-e-vafaa pe kam hain khasaare hamaare dost hain is safar ke apne sitaare hamaare dost kuchh saanp chaahiye the khazaane ke vaaste itne mein aastin se pukaare hamaare dost ik din sambhal hi jaataa hai duniyaa se haaraa shakhs lekin jo apne-aap se haare hamaare dost dushman ki ham ko koi zarurat nahin paDi kina-ba-sina phirte hain saare hamaare dost ham ne ghazal ki oT se sab kuchh bataa diyaa lekin samajh na paae ishaare hamaare dost"