Ghazal

"ab dimaagh-o-dil mein vo quvvat nahin vo dil nahin 'shaad' ab ashaar mere dar-khur-e-mahfil nahin tu mire ashk-e-nadaamat ki haqiqat kuchh na puchh us kaa har qatra vo dariyaa hai jahaan saahil nahin ghar khudaa kaa thaa magar but is mein aa kar bas gae ab muraqqaa hai hasinon kaa hamaaraa dil nahin nukta-chin ho meri rindaana ravish par kyuun koi main koi zaahid nahin vaaiz nahin aaqil nahin parda-daari karti hai dar-parda lailaa ishq ki jazba-e-dil qais kaa hai parda-e-mahmil nahin inqalaab-e-dahr se ulTaa zamaane kaa varaq ahl-e-mahfil vo nahin vo raunaq-e-mahfil nahin hind mein chalne lagi hai ab havaa-e-inqalaab 'shaad' sach hai ye jagah rahne ke ab qaabil nahin saaghar-e-mai pesh kar ke shaikh kahlaataa huun main hadiya-e-ahqar hai ye go aap ke qaabil nahin haq mein ab aashiq ke dekhein faisla hotaa hai kyaa ishq kaa daavaa huzur-e-husn to baatil nahin"

"fikr-e-asbaab-e-tarab gham ke muqaabil ho gayaa kulfat-e-sabr-aazmaa kyunkar miraa dil ho gayaa ye jo hasti hai tiri ye hasti-e-mauhum hai dekh kar duniyaa ki nairangi ko ghaafil ho gayaa ho gai mushtaaq lazzat-haa-e-hasrat meri aankh aur kaan-e-naa-umidi haif ye dil ho gayaa tere jalvon ki tamanna mere aankhon ko rahi ik nishaana aalam-e-hairat kaa ye dil ho gayaa thi mataaa-e-jalva arzaan jabki tu thaa jalva-gar jab khayaal-e-ghair aayaa dil bhi ghaafil ho gayaa joshish-e-fasl-e-bahaari thi javaani yaar ki dekh kar main us gul-e-raanaa ko maail ho gayaa kis tarah jalva nazar aaegaa tujh ko ai kalim darmiyaan mein jab hijaab-e-ghair haail ho gayaa muddaaa mahv-e-tamaashaa-e-shikast-e-dil huaa aaina-khaane kaa ik jalva muqaabil ho gayaa Duub kar girdaab-e-gham mein ho gai haasil najaat mauja-e-sailaab-e-tufaan mujh ko saahil ho gayaa partav-e-khurshid-e-aalam-taab idhar bhi ik nazar der kyaa hai ab to main tere muqaabil ho gayaa hai miraa sar zer-e-baar-e-minnat-e-bedaad-e-yaar us ke altaaf-o-inaayat kaa main qaael ho gayaa apni surat hi nazar aai dui kaa zikr kyaa 'shaad' jis dam aaine ke main muqaabil ho gayaa"

"aariz-e-gul mein jhalak hai shaah ke rukhsaar ki ye koi taarif hai itne baDe sarkaar ki shaah ki taarif kaa aali se aali ho bayaan ye to vo taarif hai jaise kisi dildaar ki midhat-e-shah aise lafzon mein ho ye zebaa nahin zeb de sardaar ko vo madh ho sardaar ki gar kisi ko vasf karnaa hai to laazim hai use adl ki midhat kare yaa bazl yaa talvaar ki banda-parvar aadil-o-baazil shajia-o-din-panaah hain ye taarifein hamaare rahm-dil sarkaar ki banda-parvar aise hain un kaa koi saani nahin muttafiq hai sab dakan haajat nahin izhaar ki adl kaa misl-e-dar-e-tauba hai darvaaza khulaa kuchh zarurat hi nahin izhaar ki takraar ki sher bakri mil ke paani piite hain ik ghaaT ab ye haqiqi vasf hai midhat hai is sarkaar ki is tarah ke hain sakhi qatre ko dariyaa kar diyaa ho sake kyaa midhat un ke dast-e-dariyaa-baar ki be-taassub aise jaise aaina hai be-ghubaar ho gai hai rishta-daari subha-o-zunnaar ki 'shaad' mere shaah ko rakkhe hamesha kirdgaar umr-o-azmat ho fuzun yaa-rab mire sarkaar ki"

"vahaan hain apni khud-aaraaiyaan hijaab nahin maqaam-e-jalva hai parda nahin naqaab nahin main jis jahaan mein huun maah-o-aaftaab nahin taghayyuraat nahin koi inqalaab nahin hijaab-e-ahl-e-nazar hai farogh-e-husn tiraa jo be-naqaab bhi tu hai to be-naqaab nahin vo laakh chhupte magar ham to dekh hi lete hamaari aankh jahaan hai vahaan hijaab nahin mai-e-majaaz-o-haqiqat kaa nashsha ho jis mein hamaare jaam-e-sifaali mein vo sharaab nahin tamaam raat paDaa karvaTein badaltaa huun jo mere saamne vo chashm-e-nim-khvaab nahin likhe hue hain vo sab haath se farishton ke mire gunaahon kaa kyunkar kahun hisaab nahin bikher zulf-e-siyah ko na ru-e-raushan par chhupaae abr jise ye vo aaftaab nahin abhi hai naaz uThaane kaa hausla baaqi ki dil vahi hai agar mausam-e-shabaab nahin ye un ki uThti javaani ki ik haqiqat hai ulaT na de jo qayaamat ko vo shabaab nahin lagi hai kaisi ye chup tum ko ai adam vaalo kisi savaal kaa mere koi javaab nahin nazar-navaaz adaaein hain husn-e-khud-bin ki hayaa kaa shaaiba jin mein nahin hijaab nahin qadam sanbhaal ke rakh paaemaal ho na koi zamin-e-gor-e-gharibaan hai farsh-e-khvaab nahin nazar-fareb hai duniyaa-e-dun kaa nazzaara tilism-e-vahm-o-gumaan hai faqat saraab nahin azal se vaqf-e-taghayyur nizaam-e-hasti hai zamaana rang dikhaataa hai inqalaab nahin kuchh aaj lazzat-e-dard-e-jigar kaa lutf milaa huaa sukun to kyaa kuchh ab iztiraab nahin fidaa-e-naam-e-mubaarak hai 'shaad' suufi bhi kahe na koi sanaa-khvaan-e-bu-turaab nahin"

"lutf ab aae na kyon anjuman-aaraai kaa zarre zarre mein hai jalva tiri yaktaai kaa dekhne se tan-e-ranjur mein jaan aati hai zindagi naam hai ai jaan tiri zebaai kaa tere jalve ne kiyaa donon jahaan ko raushan hausla baDhne lagaa chashm-e-tamaashaai kaa ishq ne zulfon ke mashhur kiyaa saudaai bol-baalaa hai jahaan mein miri rusvaai kaa chashmak-e-barq-e-fusun-gar hai ki ye husn-e-azal baagh-e-aalam mein hai charchaa tiri raanaai kaa munhasir dair pe kaaba pe nahin kuchh didaar hausla chaahiye hai chashm-e-tamaashaai kaa chashm-e-bad-dur tiraa husn bhi hai ek eajaaz ki mukaddar hai yahaan aaina binaai kaa le zaraa is ki khabar bahr-e-khudaa ai zaalim in dinon haal buraa hai tire shaidaai kaa bandagi ho gai maqbul mili dil ki muraad mil gayaa 'shaad' sila tujh ko jabin-saai kaa"

"baada-e-khum-e-khaana-e-tauhid kaa mai-nosh huun chuur huun masti mein aisaa be-khud-o-madhosh huun gird phirne de mujhe saaqi ye meraa farz hai misl-e-saaghar daur mein huun baada-e-sar-josh huun tarz-e-khaamoshi miri batlaati hai is raaz ko huun navaasanj-e-haqiqat laakh main khaamosh huun dardmand-e-ishq ho kar zabt kaa khugar huun main surat-e-simaab ho kar paikar-e-khaamosh huun kis ki furqat vasl kis kaa aur hai maashuq kaun 'shaad' main is aalam-e-takvin kaa ham-aaghosh huun"

"taa-chand us ke jaur ke sadme uThaae dil patthar nahin hai siine mein jo taab laae dil mashhur us kaa ho ke main badnaam ho gayaa ab rafta-rafta dekhiye kyaa kyaa dikhaae dil aae agar vo ghairat-e-gul mere baagh mein dil-shaad baaghbaan ho aur phuul jaae dil kis tarah bevafaa pe kare koi eatibaar kis tarah us se koi phir apnaa lagaae dil dar-parda apnaa kaam ye karti hai raat-din qaatil ki tegh-e-naaz se kyunkar bachaae dil ham us se kyaa mile ki bas apne se kho gae thi aashiqi mein us ki yahi to sazaa-e-dil main bechtaa huun muft jo ho mushtari koi arzaan ho is se 'shaad' kaho kyaa bahaa-e-dil"

"us but ki mohabbat mein aakhir yahi karnaa thaa apne se guzarnaa thaa sau jaan se marnaa thaa hushiyaar hue ghunche kar ho gae gosh-e-gul bulbul tujhe gulshan mein yuun shor na karnaa thaa matlub thaa kaun apnaa thaa kaun ba-juz us ke kis par hamein marnaa thaa us pe hi to marnaa thaa haalat kahein kyaa apni yuun vasl ki shab guzri bechain yahaan ham the vaan un ko sanvarnaa thaa mai-khaane mein bulvaa kar us pir-e-mughaan ko 'shaad' ehsaan ye karnaa thaa saaghar miraa bharnaa thaa"

"ai ishq-e-fitna-saamaan kar de tu hashr barpaa kyaa ye nahin qayaamat aalam hai teraa shaidaa dair-o-haram se niklo gar diid chaahte ho paidaa karo basirat phir dekh lo tamaashaa ai dard tere qurbaan kaisaa masih tu hai vo baais-e-shifaa hai hai dard naam jis kaa jis samt dekhtaa huun jalva tiraa ayaan hai meri nazar mein aalam mazhar hai ek teraa ism-o-sifaat kaa hai tere zuhur har-su is kaa yaqin hai mujh ko hai zaat teri yaktaa ranj-e-khumaar mein huun ab rahm kar tu mujh par saaqi pilaa de mujh ko phir ek jaam-e-sahbaa bas dhyaan rakh tu is kaa bas yaad rakh tu is ki ai 'shaad' duur rakkhe dil se tu hubb-e-duniyaa"

"maujud jo saaqi hai to phir kyaa nahin miltaa ham us ke hain kyaa saaghar-o-minaa nahin miltaa ye ashk kaa qatra hai mire dida-e-tar kaa aisaa to kabhi gauhar-e-yaktaa nahin miltaa kyaa khaak nazar aae sar-e-tur bhalaa ab is aankh kaa ab koi bhi muusaa nahin miltaa kyon chhaante hain khaak bayaabaan ki aashiq majnun ki tarah naaqa-e-lailaa nahin miltaa apne ko agar hai to khudaa par hai bharosa duniyaa mein koi aur sahaaraa nahin miltaa muusaa hi rahe haae na vo tuur hai baaqi ai aankh kahin ab vo tajallaa nahin miltaa is aalam-e-takvin mein ayaan jalve hain lekin ab koi inhein dekhne vaalaa nahin miltaa har zarre mein hai nuur chamaktaa huaa us kaa lekin koi ab mahv-e-tamaashaa nahin miltaa niyyat hai agar khair to phir is ko kami kyaa insaan ko kyaa rutba-e-aali nahin miltaa maange jo ba-ikhlaas koi apne khudaa se kyaa chiiz nahin detaa vo kyaa kyaa nahin miltaa ai 'shaad' agar dard-e-mohabbat nahin dil mein ye baat rahe yaad masihaa nahin miltaa"

"vo dil hai hech dard-e-mohabbat agar na ho kis kaam kaa vo dard agar chashm tar na ho kaaba ho yaa ki dair ho vo yaa kunisht ho viraan vo ghar hai jis mein ki teraa guzar na ho fariyaad hi nahin hai ye betaabi-e-firaaq mumkin nahin ki naale mein mere asar na ho aate ho dil mein tum miri aankhon ki raah se tadbir khuub hai ki kisi ko khabar na ho mashghul-e-zikr chaahiye har dam rahe ye dil ik lamha us ki yaad se tu be-khabar na ho chaahe zamaana 'shaad' se ruThe nahin khatar saaraa jahaan ho is kaa adu tu magar na ho"

"khamdaar aur gesu-e-khamdaar ho gayaa abru-e-yaar kaa ye taraf-daar ho gayaa be-ishq yak maraz thi mujhe apni zindagi achchhaa huaa jo ishq kaa aazaar ho gayaa dil us ke ishq se kabhi himmat na haartaa tegh-e-firaaq se jigar afgaar ho gayaa imaan aur kufr ke jhagDon ne ye kiyaa ik dil do aafaton mein giraftaar ho gayaa vaade ki raat aa ke vo kyaa soe mere ghar khvaabida bakht thaa miraa bedaar ho gayaa kyunkar na khaaein khaar adu is bahaar se vo rashk-e-gul gale kaa mire haar ho gayaa baiThe-biThaae ghar mein ye daulat hui nasib us maah-vash kaa khvaab mein didaar ho gayaa baazaar-e-ishq mein yahi saudaa gayaa hai aaj imaan de ke us kaa kharidaar ho gayaa kyaa us ko samjhe ho vo puraanaa hai baada-kash kab paarsaa thaa 'shaad' jo mai-khvaar ho gayaa"

"mahfil mein tere kaun thaa jo shaadmaan na thaa sab the sharik-e-bazm magar main vahaan na thaa zulfon ke dhyaan se thaa andheraa tamaam shab taarik is qadar to savaad-e-jahaan na thaa baalaa-e-baam chaand huaa kyon nahin tulua ai rashk-e-mah vo auj mein kyaa aasmaan na thaa pahunchaa falak pe naala-e-aatish-fashaan miraa kyaa barq-e-shoala-rez thi jis mein dhuaan na thaa maamur tere nuur se har ek zarra hai dair-o-haram mein jalva tiraa kab ayaan na thaa farmaayaa tu ne jabki alastu-birabbikum juz zaat-e-paak koi vahaan aur yahaan na thaa kis ne balaa kahaa thaa balaa mein jo phans gayaa lekin vahaan to koi tiraa ham-zabaan na thaa laakhon hasin dekhe hain ham ne jahaan mein tujh saa hasin koi bhi jaan-e-jahaan na thaa yusuf se koi chaah thaa khaali na dahr mein andhe hamin the koi bhi andhaa kuaan na thaa haasid ko rashk hai to isi ek baat kaa bijli jahaan giri thi miraa aashiyaan na thaa apnaa pataa lagaa to faqat teri zaat se varna jahaan mein aur koi be-nishaan na thaa teri hi ek zaat hai donon jahaan mein poshida koi ghair yahaan darmiyaan na thaa saae ki tarah rahtaa thaa har dam main tere saath tujh saa rafiq koi bhi ai jaan-e-jaan na thaa bulbul kaa aashiyaan na bachaa dast-burd se kis roz be-zabaanon pe jaur-e-khizaan na thaa jaam-e-sharaab main ne pilaayaa hai shaikh ko qaazi se puchho kyaa vo miraa mehmaan na thaa ai 'shaad' har balaa se usi ne bachaa liyaa aisaa nigaahbaan koi paasbaan na thaa"

"kasrat-e-tamaashaa ko vahdat-aashnaa paayaa hasti-e-fanaa mein bhi jalva-e-baqaa paayaa kyaa huaa khizar ne jo chashma-e-baqaa paayaa jiine par mare to kyaa jiine kaa mazaa paayaa jazba-e-nazaara hai aankh ki khataa kyaa hai kaabe mein sanam dekhaa dair mein khudaa paayaa khuun huaa tamanna kaa zulm sar-basar dekhaa dil ko imtihaan mein bhi sabr-aazmaa paayaa ho gayaa hai kasrat mein raaz aashkaar us kaa shaan har jagah dekhi jalva jaa-ba-jaa paayaa dard se huiin paidaa dil mein sau tamannaaein zindagi-e-lazzat ko dard-aashnaa paayaa parda-dar khamoshi hai be-hijaab aankhein hain raaz-e-bazm-e-dushman kaa ham ne kuchh pataa paayaa husn ki kashish hi mein rahbari ki quvvat thi gumrahaan-e-ulfat ne raah kaa pataa paayaa raaz ho gayaa ifshaa uTh gayaa hijaab aakhir aankh se chhupe to kyaa dil mein zaahiraa paayaa yaad aa gayaa dil ko phir alast kaa paimaan phir jabin ko kaaba se sajda-aashnaa paayaa ishq kyaa kiyaa ham ne sakhtiyaan sadaa jhelin dil ko har musibat mein jurat-aazmaa paayaa moajiza adab kaa hai 'shaad' har kalaam apnaa nukta-ras tabiat ne nutq kyaa rasaa paayaa"

"khaana-e-dil kaaba hai ye koi but-khaana nahin be-dhaDak aa jaao is mein koi begaana nahin naghma-e-tauhid ham se sun ke vaaiz raag kaa apni biiti hai ye kuchh ghairon kaa afsaana nahin hai ye kaashaana kisi kaa apnaa ye khaaki vajud ai barahman ye buton kaa koi but-khaana nahin aankh se us ne milaai aankh kaifiyyat hui ye nashili aankh hai pur mai se paimaana nahin zikr se rindon ke vaaiz tu abhi vaaqif nahin ye to hu-haq ki sadaa hai shor-e-rindaana nahin aap hi ke dam-qadam se ghar miraa aabaad hai khaana-e-dil aap kaa hai koi viraana nahin ain-masti mein bhi rahtaa hai use paas-e-adab haan baDaa hushiyaar hai kuchh 'shaad' divaana nahin"

"subh ko niklaa thaa garche karr-o-far se aaftaab munh phiraayaa ho khajil us ishva-gar se aaftaab aasmaan par gar gire barq-e-nigaah-e-tund-baar abr mein rah jaae chhup kar us ke Dar se aaftaab gar naqaab apni ulaT de vo rukh-e-taabinda se gir paDe betaab ho kar charkh par se aaftaab dil mein jab se dekhtaa hai vo tiri tasvir ko nuur barsaataa hai apni chashm-e-tar se aaftaab haibat-e-shaah-e-dakan se 'shaad' ye shohra hai aaj kaanptaa niklaa kare jeb-e-sahar se aaftaab"

"haT-dharmi ki kahun ki main imaan ki kahun apnaa karun bayaan ki tiri shaan ki kahun dil mein ye ab Thani hai ki imaan ki kahun kuchh kar ke mukhtasar main tiri shaan ki kahun meri jo vo sunein kabhi mauqa mujhe mile sab dil kaa haal kaifiyat armaan ki kahun paaband-e-daam-e-zulf hai aashufta dil miraa kyaa sarguzasht aise pareshaan ki kahun divaangi mein bhi rahe zarb us ke naam ki main bad-havaas ho ke bhi ausaan ki kahun kuchh diin ki sunaaun ki duniyaa ki daastaan kuchh qudsiyon ki likhkhun ki insaan ki kahun main dhyaan mein huun us ke vo hai raaz-daan miraa kuchh mezbaan ki likhkhun ki mehmaan ki kahun yaan hai bharosa haq pe vahaan aql par madaar haalat kahun gadaa ki ki sultaan ki kahun haq kahne vaalon ke liye hai daar ki sazaa ban jaae jaan par agar imaan ki kahun main huun kitaab-e-maarifat-e-haq kaa dars-yaab ab kyaa kisi se ved ki quraan ki kahun hai 'shaad' pur-bahaar ye josh-e-junun miraa daaman ki ab kahun ki garebaan ki kahun"

"kahiye ab kis se dard-e-pinhaani ik shab-e-hijr vo bhi tulaani ek baaqi rahegi us ki zaat saaraa aalam hai aani-o-faani jaam-e-jamshed be-haqiqat hai saaqiyaa de sharaab-e-raihaani dil mein us ki na hogi kyunkar chaah us kaa jalva hai husn-e-kanaani dil ke aaine mein use dekhaa baDh gai aur meri hairaani vahdahu-laa-sharika-lah ke sivaa sajda kis ko kare ye peshaani vo nigahbaan apnaa hai har dam khuub use aati hai nigahbaani us ke darbaar mein guzar kyaa ho ye faqir aur bazm-e-sultaani aate aate ba-mushkil aati hai koi aasaan nahin zabaan-daani kyaa karegaa ilaaj is kaa masih kyaa sunaaun main dard-e-pinhaani vahi mushkil karegaa aasaan 'shaad' shaadmaani mein hai sab aasaani"

"kahun kis se ba-juz tere khudaayaa aarzu dil ki muraad apni hamesha tujh se hi bas main ne haasil ki sanbhalnaa hotaa mushkil ghair haalat hoti qaatil ki bahut achchhaa huaa dekhi taDap us ne na bismil ki tu hi maabud hai meraa tu hi matlub hai meraa yahi matlub hai mujh ko tamanna hai yahi dil ki gharaz tauf-e-haram se kyaa har ik zarre mein hai jalva zarurat kuchh nahin saalik ko is viraan manzil ki agar chaahe ki auj-e-bakht haasil ho nasihat sun vafur-e-khaaksaari se ye daulat sab ne haasil ki ghazab hai imtihaan mein mere aage qatl ho koi gale par pher lungaa chhin kar talvaar qaatil ki khizaan mein dekh kar rang-e-chaman kyaa ranj hotaa hai dukhaa deti hain dil ko haae fariyaadein anaadil ki zaraa Thahro farishto kuchh to yaan aaraam lene do uThaa kar aa rahaa huun sakhtiyaan hasti ki manzil ki kabhi bechain rahtaa hai phaDaktaa hai kabhi bar mein bataaun kyaa tumhein main kaisi haalat hai mire dil ki makaan mein mere tum aae baDi ye mehrbaani ki yahi khvaahish tamanna bhi yahi thi bas mire dil ki jise sab 'shaad' kahte hain tire dar kaa bhikaari hai karegaa tu hi yaa-rab puuri haajat apne saail ki"

"aanaa ho to aa jaao bahaanaa nahin achchhaa har roz kaa mujh ko ye sataanaa nahin achchhaa piiri mein samajh aai javaani gai afsos maalum huaa dil kaa lagaanaa nahin achchhaa ik dard-rasida ki zaraa aankh lagi hai ai murgh-e-sahar-khez jagaanaa nahin achchhaa qashqa jise kahte hain vo hai daagh-e-ghulaami ai barhaman is kaa to lagaanaa nahin achchhaa jo kahnaa ho khalvat mein bulaa kar mujhe kah lo baatein ye sar-e-bazm sunaanaa nahin achchhaa bekaar ki ranjish hai lipaT jaao gale se aashiq huun mujhe itnaa sataanaa nahin achchhaa hangaama-e-mahshar mire shikvon mein nihaan hai hai zabt-e-nafas shart zamaana nahin achchhaa mil jaaiye milnaa hai agar 'shaad' se manzur har roz ye hiila ye bahaanaa nahin achchhaa"

"us ne kahaa kaaba tiraa main ne kahaa chehraa tiraa us ne kahaa chehraa tiraa main ne kahaa jalvaa tiraa us ne kahaa jiinaa tiraa main ne kahaa hasti tiri us ne kahaa marnaa tiraa main ne kahaa pardaa tiraa us ne kahaa kyaa kaam hai main ne kahaa har vaqt diid us ne kahaa kyaa shaghl hai main ne kahaa saudaa tiraa us ne kahaa kyaa kufr hai main ne kahaa gesu tire us ne kahaa islaam kyaa main ne kahaa chehraa tiraa us ne kahaa dil kyaa huaa main ne kahaa tu ne liyaa us ne kahaa kyaa chor huun main ne kahaa ghamza tiraa us ne kahaa mandir hai kyaa main ne kahaa tu hi to hai us ne kahaa qismat tiri main ne kahaa manshaa tiraa us ne kahaa khidmat tiri main ne kahaa hai bandagi us ne kahaa hai naam kyaa main ne kahaa bandaa tiraa us ne kahaa vo kaun thaa khalvat mein khvaahaan-e-visaal main ne kahaa ye 'shaad' thaa aashiq tiraa shaidaa tiraa"

"mujh ko apni khudi se nafrat hai apni hasti se hi adaavat hai kaam aataa nahin hai aur ilaaj vasl hi chaara-saaz-e-furqat hai ai falak kyaa bigaaDaa main ne tiraa mujh se kis vaaste adaavat hai main huun ai jaan vafaa-shiaar tiraa zulm karnaa to teri aadat hai ishq kar ke huaa huun main badnaam dil lagaanaa bhi ik musibat hai tu ne itnaa bhi to nahin puchhaa in dinon kaisi teri haalat hai nikal aate hain qabr se murde teri Thokar mein ik qayaamat hai tauba lab par hai dil mein shauq-e-sharaab shaikh ji kyaa buri ye illat hai ek majzub hai jo khaak-nashin arsh-e-aalaa se us ko nisbat hai ye jo kasrat hai apne pesh-e-nazar yahi vahdat ki ik alaamat hai aap ne jo mizaaj-pursi ki aap ki ye baDi inaayat hai sohbat-e-bad se ijtinaab karo varna ik roz is mein zillat hai ruuTh jaanaa zaraa si baaton par bachpane ki tumhaari aadat hai khauf kyaa dushmani se dushman ki 'shaad' par jab khudaa ki rahmat hai"

"fanaa kahte hain kis ko maut se pahle hi mar jaanaa baqaa hai naam kis kaa apni hasti se guzar jaanaa jo rokaa raah mein hur ne to shah abbaas se bole mire bhaai na ghusse mein kahin had se guzar jaanaa kahaa ahl-e-haram ne roke yuun akbar ke laashe par javaan hone kaa shaayad tum ne rakkhaa naam mar jaanaa baqaa mein thaa fanaa kaa martaba haasil shahidon ko vahaan is par amal thaa maut se pahle hi mar jaanaa na lete kaam gar sibt-e-nabi sabr-o-tahammul se lainon kaa nigaah-e-khashm se aasaan thaa mar jaanaa dikhaai jang mein surat udhar jaa pahunche vo kausar ye asghar hi ki thi raftaar idhar aanaa udhar jaanaa yahaan kaa zinda rahnaa maut se bad-tar samajhtaa huun hayaat-e-jaavidaan hai karbalaa mein jaa ke mar jaanaa"

"main samajhtaa huun tujhe meri vafaa yaad nahin tu samajhtaa hai mujhe teri jafaa yaad nahin pujtaa huun main buton ko ki khudaa yaad aae ye sitam hai ki barahman ko khudaa yaad nahin gar sakhi bhuul gayaa de ke yahi laazim thaa lene vaale ko bhi afsos liyaa yaad nahin aise bhi log hain duniyaa se nahin kaam jinhein un pe jo guzraa bhalaa thaa ki buraa yaad nahin tire divaane ko ai yaar faqat tujh se hai kaam baadshah kaun hai aur kaun gadaa yaad nahin teri hi dhun mein guzarti hai tire pyaaron ki is mein kyaa kyaa na hui un pe jafaa yaad nahin apne maulaa se jo kuchh maango abhi vo degaa 'shaad' muztar na ho kyaa koi duaa yaad nahin"