Ghazal

"baashinde haqiqat mein hain ham mulk-e-baqaa ke kuchh roz se mehmaan hain is daar-e-fanaa ke dil khuun ho shab-e-vasl bhi hasrat mein na kyun-kar dekhein na vo khalvat mein bhi jab aankh uThaa ke farmaaiye ham se thi yahi shart-e-mohabbat khuub aap ne rusvaa kiyaa ghairon mein bulaa ke kuche mein na aae koi main jaan gayaa huun farmaate ho mujh se ye raqibon ko sunaa ke dil haath se kho jaataa hai kis taur se zaahid to aap zaraa dekh le us kuche mein jaa ke khaak-e-dar-e-jaanaan hai libaas-e-tan-e-uryaan aashiq tire mohtaaj nahin aur qabaa ke ham sar ke bal aaeinge jo bulvaaoge saahab gar ho na yaqin dekh lo tum chaaho bulaa ke ho saaya-e-divaar tumhaaraa jo mayassar phir kyaa karein farmaaiye saae ko humaa ke dil khol ke kar lijiye ai hazrat-e-dil sair ham phir ke na phir aaeinge is bazm se jaa ke tan khaak mein mil jaaegaa ik roz hamaaraa ji tan se nikal jaaegaa maanind havaa ke"

"kar diyaa zaar gham-e-ishq ne aisaa mujh ko maut aai bhi to bistar pe na paayaa mujh ko kabhi jangal kabhi basti mein phiraayaa mujh ko aah kyaa kyaa na kiyaa ishq ne rusvaa mujh ko dushman-e-jaan huaa dar-parda miraa jazba-e-ishq munh chhupaane lage vo jaan ke shaidaa mujh ko roz-e-raushan ho na kyunkar miri aankhon mein siyaah hai tire gesu-e-shab-rang kaa saudaa mujh ko ik pari-ru ki mohabbat kaa main huun divaana na pari kaa na kisi jin kaa hai saaya mujh ko roz-o-shab shokh ne kyaa kyaa na dikhaae nairang rukh dikhaayaa kabhi gesu-e-chalipaa mujh ko din bhale aae to aadaa sabab-e-khair hue bad-duaa ne kiyaa aghyaar ki achchhaa mujh ko fakhr se bazm-e-butaan mein vo kahaa karte hain pyaar kuchh roz se ab karte hain 'raanaa' mujh ko"

"tegh-e-nigah-e-dida-e-khun-khaar nikaali kyuun aap ne ushshaaq pe talvaar nikaali bhule hain ghazaalaan-e-haram raah khataa se tum ne ajab andaaz ki raftaar nikaali dhaDkaa mire naale kaa rahaa murgh-e-sahar ko aavaaz shab-e-vasl na zinhaar nikaali har ghar mein kahe rakhte hain kohraam paDegaa gar laash hamaari sar-e-baazaar nikaali aakhir miri turbat se ugi hai gul-e-nargis kyaa baad-e-fanaa hasrat-e-didaar nikaali main vasl kaa saail huun na vaade kaa talab-gaar baaton mein abas aap ne takraar nikaali jal jaaegaa ye khirman-e-hasti abhi ai dil siine se agar aah-e-sharar-baar nikaali dil le ke bhi 'raanaa' kaa kiyaa paas na afsos kuchh hasrat-e-dil tu ne na ayyaar nikaali"

"gai jo tifli to phir aalam-e-shabaab aayaa gayaa shabaab to ab mausam-e-khizaab aayaa main shauq-e-vasl mein kyaa rail par shitaab aayaa ki subh hind mein thaa shaam panj-aab aayaa kaTaa thaa roz-e-musibat khudaa khudaa kar ke ye raat aai ki sar pe mire 'azaab aayaa kahaan hai dil ko 'abas DhunDhte ho pahlu mein tumhaare kuche mein muddat se us ko daab aayaa kisi ki tegh-e-taghaaful kaa main vo kushta huun na jaagaa neze pe sau baar aaftaab aayaa nazar paDi na miri ro'b-e-husn se rukh par agarche saamne mere vo be-naqaab aayaa hamesha surat-e-anjum khuli rahin aankhein firaaq-e-yaar mein kis roz mujh ko khvaab aayaa huaa yaqin ki zamin par hai aaj chaand-gahan vo maah chehre pe jab Daal kar naqaab aayaa hue jo dida-e-girya se apne ashk ravaan gumaan huaa ki barastaa huaa sahaab aayaa banaa tasavvur-e-lailaa ba-surat-e-tasvir kabhi jo qais ki aankhon mein shab ko khvaab aayaa vo zud-ranj hai us ko na chheDnaa 'raa'naa' maloge haath agar bar-sar-e-itaab aayaa"

"kar chukaa qaid se jis vaqt ki aazaad mujhe haath maltaa hi rahaa dekh ke sayyaad mujhe umr bhar yuun to kabhi li bhi na karvaT pas-e-marg haif rah-rah ke kiyaa karte hain ab yaad mujhe hukm darbaan ko hai zinhaar na aane paae ghair ke saamne karte hain magar yaad mujhe baaghbaan gulshan-e-aalam kaa main vo bulbul huun taaer-e-sidra kahaa kartaa hai ustaad mujhe ham-safiron ko miraa haal khulegaa pas-e-marg dekhnaa dil mein kareinge vo bahut yaad mujhe sahn-e-gulshan mein mire phuul kareinge gulchin roegaa suunaa qafas dekh ke sayyaad mujhe raah-e-ulfat mein mulaaqaat hui kis kis se dasht mein qais milaa koh mein farhaad mujhe ghaib se hote hain ilqaa mire dil mein mazmun dekh faizaan sukhan kaa hai khudaa-daad mujhe sabz baagh aataa hai duniyaa kaa nazar jab 'raanaa' yaad aati hai bahut hasrat-e-shaddaad mujhe"

"gai fasl-e-bahaar gulshan se bulbulon uD chalo nasheman se faatiha bhi paDhaa na turbat par jaa ke lauT aae meri madfan se mujh ko kaafi thi qaid-e-halqa-e-zulf beDiyaan kyuun banaain aahan se zulf ke pech se na rah ghaafil dosti kar dilaa na dushman se ho garebaan kaa chaak khaak rafu taar haath aae jab na daaman se naaz-o-ishva nayaa nahin sikhaa shokh tarraar hai laDakpan se chhoD kar tum agar gae tanhaa ji nikal jaaegaa mire tan se hai kai din se muntazir 'raanaa' jalva dikhlaao aa ke chilman se"

"pise hain dil ziyaada-tar hinaa se chalaa do gaam bhi jab vo adaa se vo but aae idhar bhi bhuul kar raah duaa ye maangtaa huun main khudaa se hijaab us kaa huaa shab maane-e-did naqaab ulTi na chehre ki hayaa se ishaara khanjar-e-abru kaa bas thaa mujhe maaraa abas tegh-e-jafaa se bahut bal khaa rahi hai zulf-e-jaanaan bachegi jaan kyuun kar is balaa se hai behtar ik karishme mein hon do kaam madine jaaun raah-e-karbalaa se khudaa jab be-talab bar laae maqsad uThaaun kyuun na haath apne duaa se 'nizaam' ab uqda-e-dil kyuun na hal hon mohabbat hai tujhe mushkil-kushaa se"

"vaah kyaa husn kaisaa joban hai kaisi abru hain kaisi chitvan hai jis ko dekho vo nuur kaa buqa ye paristaan hai ki london hai abas un ko masih kahte hain maar rakhne kaa un mein lachchhan hai husn dikhlaa rahaa hai jalva-e-haq ru-e-taabaan se saaf raushan hai rasm ulTi hai khub-ruyon mein dost jis ke bano vo dushman hai haal ushshaaq ko bataate hain aur abhi khair se laDakpan hai"

"vo masihaa qabr par aataa rahaa main mue par roz ji jaataa rahaa zindagi ki ham ne mar-mar ke basar vo but-e-tarsaa jo tarsaataa rahaa vaah bakht-e-naa-rasaa dekhaa tujhe naama-bar se khat kahin jaataa rahaa raah takte takte aakhir jaan gai vo taghaaful-kesh bas aataa rahaa dil to dene ko diyaa par ham-nashin haath main mal mal ke pachhtaataa rahaa dekh us ko ho gayaa main be-khabar dil yakaayak haath se jaataa rahaa kyaa kahun kis tarah furqat mein jiyaa khun-e-dil piitaa to gham khaataa rahaa raat bhar us barq-vash ki yaad mein sail-e-ashk aankhon se barsaataa rahaa DhunDhtaa phirtaa huun us ko jaa-ba-jaa dil khudaa jaane kidhar jaataa rahaa us masihaa ki umid-e-vasl mein shaam jiitaa subh mar jaataa rahaa ishq kaa 'raanaa' maraz hai laa-davaa kab sunaa tu ne ki vo jaataa rahaa"

"hijr-e-jaanaan mein ji se jaanaa hai bas yahi maut kaa bahaana hai kyuun na barsaaein ashk dida-e-tar aatish-e-ishq kaa bujhaanaa hai ho adu jis pe kijiye ehsaan kuchh ajab tarah kaa zamaana hai yaad dilvaa ke daastaan-e-visaal aashiq-e-zaar ko rulaanaa hai rakh dilaa roz-o-shab umid-e-visaal ranj-e-furqat agar bhulaanaa hai jaan jaati hai jis jagah sab ki usi kuche mein apnaa jaanaa hai koi dam mein adam ko huun raahi aa agar tujh ko ab bhi aanaa hai khaak-saari na chhoDnaa 'raanaa' ek din khaak hi mein jaanaa hai"

"jis ko sab kahte hain samundar hai qatra-e-ashk-e-dida-e-tar hai abru-e-yaar dil kaa khanjar hai mizha-e-yaar nok-e-nashtar hai chashm-e-aashiq se do bahe dariyaa ek tasnim ek kausar hai khaana-e-dil hai ghair se khaali shauq se aao aapkaa ghar hai qatai aaj faisla hogaa teri talvaar hai miraa sar hai ab to dhuni ramaa ke baiThe hain dar-e-jaanaan pe apnaa bistar hai tamaa har ik kaa din-o-imaan hai jis ko dekho vo banda-e-zar hai khuub dil khol kar jafaa kar lo banda muddat se is kaa khugar hai baam par jalva-gar hai vo shaayad ku-e-jaanaan mein shor-e-mahshar hai kartaa aalam ko aah se barham lek 'raanaa' ko yaar kaa Dar hai"

"le qazaa ehsaan tujh par kar chale ham tire aane se pahle mar chale kucha-e-jaanaan mein jaanaa hai zarur chaahe aaraa sar pe yaa khanjar chale bas ye hai ku-e-butaan ki sarguzisht sar pe mere saikDon patthar chale ku-e-jaanaan kaa na paayaa kuchh nishaan khizr ke ham-raah ham din bhar chale paai tere dar pe aa kar zindagi o masihaa khaa ke ham Thokar chale dekhiye dekheinge kyaa roz-e-jazaa yaan bashar aae vahaan baa-shar chale ho khizaan kyun-kar na gulshan ki bahaar jab yahaan baad-e-sabaa sar-sar chale bazm se jaate ho duzdida-nazar nim-bismil kar chale kyaa kar chale qaul-e-vaaiz ne na kuchh taasir ki kushta-e-kaakul pe kab mantar chale khuun tiri tirchhi nigaahon ne kiyaa laakh khanjar ek kushte par chale farsh par hai yuun khiraamaan rashk-e-maah arsh par jaise koi akhtar chale kab hui saudaa-e-mizhgaan se shifaa nashtaron par saikDon nashtar chale"