Ghazal

"baraabar khvaab se chehron ki hijrat dekhte rahnaa guzar chukne pe bhi vo shaam-e-rahlat dekhte rahnaa dhanak ki baarishein barfaab shahron par nahin hotin yahaan phulon kaa rasta umr bhar mat dekhte rahnaa kitaabon ki tahon mein DhunDhnaa naa-dida ashyaa kaa palaT kar phir koi khaali ibaarat dekhte rahnaa hujum-e-shahr ke sannaaTe mein gum-sum vo Tiila saa usi ko aate jaate be-zarurat dekhte rahnaa jise main chhu nahin saktaa dikhaai kyuun vo detaa hai farishton jaisi bas meri ibaadat dekhte rahnaa 'musavvir' kuchh na kahne kaa ye dukh bhi sakht zaalim hai talab kar legi lafzon ki adaalat dekhte rahnaa"

"baad-e-shimaal chalne lagi ang ang mein lipTaa hai kaun mujh se ye patjhaD ke rang mein khvaahish ke kaarobaar se bachnaa muhaal hai utregaa tu bhi saath mire is surang mein main aandhiyon mein haath bhi pakDun tiraa to kyaa ik shaakh-e-be-siper huun havaaon ki jang mein 'raanjhaa' main 'ahd-e-nau kaa qabilon mein baT gayaa to 'hir' ban ke pi na saki zahr jhang mein garmaa sakin na chaahatein teraa kaThor jism har ek jal ke bujh gai tasvir sang mein aage 'musavvir' aag 'aqab mein hai ye sadaa pichhe na muD ke dekhnaa is dasht-e-sang mein"

"yuun chup hai shahr jaise ki kuchh bhi huaa na ho shaayad ab is ke baad koi haadisa na ho kaanpaa hai barg barg saa jo be-sabab abhi ye jism aandhiyon kaa koi raasta na ho main thak chukaa huun dasht-e-masaafat ki dhuup mein koi saraab raah mari dekhtaa na ho tughyaan-e-bevafaai mein Duubaa rahun main kaash mere nasib mein tujhe ab dekhnaa na ho ubhri hai khushk patton mein ik chikh duur tak be-rahm koi paanv unhein raundtaa na ho sham-e-taraf jalaane se pahle hi dekh lo ye dasht-e-naa-muraadi-e-dil kaa diyaa na ho jo shakhs kal milaa thaa 'musavvir' ba-tarz-e-khaas us ki hi shakl kaa vo koi dusraa na ho"

"ziyaan hai jaan kaa ye kaarobaar mat karnaa sabaa se saae se khushbu se pyaar mat karnaa hamein vahaan ke bagule bane jo kahte the tavaaf-e-kucha-e-shahr-e-nigaar mat karnaa main Dhalti dhuup ki lau huun miraa bharosa kyaa nigaah-e-shaam miraa intizaar mat karnaa na khud tumhin pe kuchh ilzaam-e-vaqt aa jaae hamaaraa shikva-e-sabr-o-qaraar mat karnaa ye sach hai ishq hi saabit-qadam nahin meraa main kah rahaa huun miraa e'tibaar mat karnaa abhi hai ku-ba-ku phirnaa tujhe 'musavvir' abhi umid-e-saaya-e-divaar-e-yaar mat karnaa"

"dekho koi khvaab din Dhale kaa dariyaa ke is aakhiri sire kaa zaahir mein the pur-tapaak lamhe mausam thaa vo rishte TuTne kaa kaaghaz pe sulagte kuchh sitaare maktub saa koi shab Dhale kaa qurbat ki chhaTi jo dhund dekhaa raushan thaa charaagh faasle kaa har aankh mein DhunDhtaa huun khud ko main nuur huun bujhte ratjage kaa Tahni se giraa do barg-e-larzaan imkaan hai taaza saanehe kaa"

"lagaa hai aisaa koi kaasa-e-savaali hon ye aankh jaise miri raushni se khaali hon ye kyaa zaruri hai ham saari umr saath rahein nahin ye baat ki qadrein ye laa-zavaali hon na jaane kaun pas-e-chashm mar chukaa hogaa vo aankhein jaise kisi maqbare ki jaali hon sadaa se hain kisi naadida guunj ki taabe ye bheDein sabz pahaaDon ne jaise paa li hon hai ghaaTi ghaaTi koi zahr-khand chup ho jaao na jaane kaun se patthar yahaan jalaali hon"

"badan ke divaar-o-dar mein ik shai si mar gai hai ajiib khushbu udaasiyon ki bikhar gai hai jagaao mat riste khvaabon ki rat-jagi thakan ko ki dhuup daalaan se kabhi ki utar gai hai fasil-e-sar ko bachaae rakhtaa hai vo abhi tak zamin ki pasti to reshe reshe mein bhar gai hai na TuuT kar itnaa ham ko chaaho ki ro paDein ham dabi dabaai si choT ik ik ubhar gai hai vo raat jis mein zavaal-e-jaan kaa khatar nahin thaa vo raat gahre samundaron mein utar gai hai"

"kai zamaanon ke dariyaa-e-nil chhoD gayaa vo vaqt thaa jo mujhe laakhon miil chhoD gayaa na bhige honT bhi kam-zarf dasht o dariyaa ke miraa husain lahu ki sabil chhoD gayaa sab ek se the tulu-o-ghurub-e-jaan us ke judaai mein bhi vo naqsh-e-jamil chhoD gayaa the us ke saath zavaal-e-safar ke sab manzar vo dukhte dil ke bahut sang-e-mil chhoD gayaa main murda paaniyon mein chaand saa ravaan dekhun vo varse mein mujhe khvaahish ki jhiil chhoD gayaa main zinda sach thaa samundar ki guunj ki surat gavaahi le nahin paayaa dalil chhoD gayaa"

"chhu lene ki sab koshishein bekaar samajhnaa divaar ko bas saaya-e-divaar samajhnaa oDhe chalo dhupon mein kisi yaad ki chaadar gir jaao jahaan khema-e-ashjaar samajhnaa baa-vasf-e-shikast-e-dil-o-jaan laDtaa rahaa huun ai haarte lashkar mujhe sardaar samajhnaa ik jism samajh kar jise tum TuuT paDe ho vo tum se lipaT jaae to talvaar samajhnaa divaar mein ubhre hi chale aate hain chehre is shab ko har ik shab se pur-asraar samajhnaa"

"TuuTaa jo vo to shaam-e-shafaq-zaad khatm thi saanson mein phuul khilne ki miaad khatm thi kuchh yuun tilismi jhonkon ne aaghosh mein liyaa mismaar hote peD ki fariyaad khatm thi mujh ko sanbhaaltaa thaa koi malba-e-badan varna mire vajud ki buniyaad khatm thi shaayad gae dinon mein bhi jiinaa muhaal thaa hijrat ke haadsaat ki har yaad khatm thi bu-baas ujDe shahr ki pichhle safar mein thi ab ke safar mein nikhat-e-barbaad khatm thi sangin sher us ke khanDar ke the pahre-daar us par hi saari azmat-e-ajdaad khatm thi"

"main munharif thaa jis se harf-e-inhiraaf ki tarah khulaa vo dhire dhire bu-e-inkishaaf ki tarah ye be-samar zamin ye raaegaan falak ke silsile hain mere gird kyuun hisar-e-etakaaf ki tarah vo sardiyon ki dhuup ki tarah ghurub ho gayaa lipaT rahi hai yaad jism se lihaaf ki tarah ye lag rahaa hai sab duaaein mustajaab ho gaiin jagah jagah hai gahraa aasmaan shigaaf ki tarah saf-e-munaafiqaan mein phir vo jaa milaa to kyaa ajab hui thi sulh bhi khamosh ikhtilaaf ki tarah"

"dil mein tiri aavaaz kaa taaraa phirtaa hai is nagri mein ik banjaaraa phirtaa hai tujh ko palaT ke dekhnaa bhi ab bas mein nahin saath liye ye vaqt kaa dhaaraa phirtaa hai koi nahin khaali darvaaze chikhte hain har dar se ik dard kaa maaraa phirtaa hai kaTte hain apne hi qadam us kuche mein ham hi na jaaein shahr to saaraa phirtaa hai haae ye teraa dhyaan gham-e-dauraan mein ghiraa biich bhanvar mein koi kinaaraa phirtaa hai jaane kaisaa rog lagaa hai 'musavvir' ko raat mein tanhaa maaraa maaraa phirtaa hai"

"aankhein yuun barsin pairaahan bhiig gayaa tere dhyaan mein saaraa saavan bhiig gayaa khushk mahaazo baDh ke mujhe salaami do mere lahu ki chhinTon se ran bhiig gayaa tum ne mai pi chuur chuur main nashshe mein kis ne nichoDaa kis kaa daaman bhiig gayaa kyaa namnaak hansi divaar-o-dar par thi bachaa khuchaa sab rang o roghan bhiig gayaa sajni ki aankhon mein chhup kar jab jhaankaa bin holi khele hi saajan bhiig gayaa"

"havaa rah mein diye taaqon mein maddham ho gae hain mahaaz ab duriyon ke kitne mohkam ho gae hain hujum-e-naa-shanaasaan mein hai itnaa hi ghanimat ye rishte ajnabiyyat ke jo qaaem ho gae hain chaTTaanon se jahaan thi guftugu-e-sakht laazim vahin shirin-sukhan lahje mulaaem ho gae hain mire bachche tiraa bachpan to main ne bech Daalaa buzurgi oDh kar kaandhe tire kham ho gae hain azaabon se Tapakti ye chhatein barson chaleingi abhi se kyuun makin masruf-e-maatam ho gae hain"

"hai vahm jaise koi naqsh ye duhaai de ye zarb-e-tesha mujhe sang se rihaai de natija-e-darun-bini thaa kis qadar be-kaif kuein mein duur tak ab ret hi dikhaai de hisaar-e-gosh-e-samaaat ki dastaras mein kahaan tu vo sadaa jo faqat jism ko sunaai de ye kis talab ki havaaein mashaam-e-jaan mein chalin ki jalte gosht ki khushbu faqat sunghaai de chalo ki donon hon gardaab-e-ittisaal mein gharq na jaane vaqt kise saahil-e-judaai de haraa-bharaa hi rahegaa vo khvaahishon kaa darakht havaa hazaar use barg-e-naa-rasaai de 'musavvir' us se kaho umr bhar na mil paae baDaa hai jurm aziyyat bhi intihaai de"

"nafas nafas hai bhanvar chaDhti shab kaa manzar hai hisaar-e-jism mein ik chikhtaa samundar hai havaa-e-taaza ke maanind mat lipaT mujh se gai ruton kaa bahut zahr mere andar hai nikal ke jaaun gunah-gaar-e-tirgi se kidhar har ek haath mein ab raushni kaa patthar hai ik aag uDti hui si vahi taaaqub mein badan ki raakh abhi shaayad badan ke andar hai tu kyuun uDhaataa hai mujh ko ye raushni ki ridaa mujhe khabar hai andheraa miraa muqaddar hai salib-e-shab se 'musavvir' sahar ke maqtal tak kahaan milein ki har ik faasla baraabar hai"

"javaan ho gaiin sab buDhi aatmaaein miri Dhaki hui hain amar-bel se jaTaaein miri main piiTh moD luun ye fitrat-e-husain nahin khaDi hain mere muqaabil ye karbalaaein miri tu aasmaani farishta sahi ye qurb bhi dekh nikal rahi hain paron se tire havaaein miri main chhuptaa phirtaa huun nange badan ke saae mein darakht baiTh gae oDh ke ridaaein miri kiyaa thaa chheDne ko manaa sukhe jangal ko ab aag mil ke sabhi bastiyaan bujhaaein miri badal sake to badal apne ism-e-aazam se bichhi hui hain chaTaanon pe bad-duaaein miri"

"teri aaghosh mein niDhaal huun main bhigti raat kaa zavaal huun main jitnaa suljhaaoge aur uljhoge vaqt kaa ik baDaa savaal huun main aur pichhle-pahar gale mil le Dubti raat kaa kamaal huun main apne andar simaTtaa jaataa huun khushk dariyaa kaa ek jaal huun main faasle qarnon ke judaai mein teraa maazi huun apnaa haal huun main kyaa samajh ke hansaa hai tu mujh par tere hi aaine kaa baal huun main ye 'musavvir' bhanvar mein aa ke khulaa Dubne mein bhi be-misaal huun main"

"ghurte raston kaa aaseb banaa huun main to mujh se mil paaoge kyaa shaam-e-balaa huun main to devtaaon se na hogaa miraa darmaan-e-zavaal aasmaanon ke singhaasan se giraa huun main to jaate mausam ki tarah us se kabhi mil na sakaa ek lamhe ke taalluq ki sazaa huun main to log galiyon mein hi DhunDaa kiye aandhi ke suraagh apni aankhon ke hisaaron mein bujhaa huun main to zahr ban kar vo 'musavvir' miri nas nas mein rahaa main ne samjhaa thaa use bhuul chukaa huun main to"

"siyaah dard kaa ye saaebaan gir jaae hamin pe TuuT ke kaash aasmaan gir jaae kharaaba-e-dil-e-tanhaa na dekhaa jaaegaa hamin makin hain to ham par makaan gir jaae main is larazti si divaar-e-dil kaa nauha huun jo kahte kahte koi daastaan gir jaae sambhal sambhal ke uThaa baar-e-bekasi kaa pahaaD tire jigar pe na sar ki chaTaan gir jaae na aise laung ghumaa naak mein hasin muTiyaar jo hal chalaate hain koi kisaan gir jaae duaa-e-nim-shabi aur yaqin-e-be-asri ki jaise tiir se pahle kamaan gir jaae 'musavvir' aisi hui tang ye zamin ham par baDhin jidhar bhi vahin aasmaan gir jaae"

"jism apnaa hai koi aur na saaya apnaa jaane is ziist se hai kaun saa rishta apnaa tu ne kis moD pe chhoDaa thaa mujhe umr-e-ravaan tak rahaa huun kai sadiyon se main rasta apnaa sang-andaaz huaa shahr-e-sitam-pesha tamaam dil liye baiThaa hai shishe kaa gharaundaa apnaa ham rahe bhi to badalte hue mausam ki tarah teri aankhon mein koi aks na Thahraa apnaa jog le kar tiri khaatir liye galiyon galiyon ik mughanni ki tarah dard bhi bechaa apnaa ek be-naam taalluq bhi ab us ghar se nahin muddaton jis mein rahaa thaa kabhi charchaa apnaa ik tiraa gham thaa ba-har-rang jo shaadaab rahaa is shajar ne na giraayaa koi pattaa apnaa dil ki divaaron pe ye rang-e-shab-e-taar to dekh haadisa chhoD gayaa hai koi saaya apnaa ai gham-e-khaak-shuda jaag ba-rang-e-ashaar teri miTTi mein milaataa huun main sonaa apnaa kitne asnaam taraashe hain tiri surat ke jhaank kar dekhe zaraa mujh mein saraapaa apnaa"

"hasratein roti rahein dil mein mujaavir ki tarah dil magar chup hi rahaa lauh-e-maqaabir ki tarah khushk patton ki tarah chhuT gae yaaraan-e-kuhan phir na palTe kabhi patjhaD ke musaafir ki tarah aa tiri maang mein kuchh ashk pirotaa jaaun main to har chhaanv se guzrungaa muhaajir ki tarah main huun ik naqsh-e-qadam dasht-e-faraamoshi kaa bhuul jaaoge mujhe tum bhi musaafir ki tarah chaaragar duur na jaanaa kahin ji Dartaa hai aaj ki raat hai gahri shab-e-aakhir ki tarah dushman-e-mehr-o-vafaa se koi kartaa hai nibaah kaun chaahegaa tujhe tere 'musavvir' ki tarah"

"tah-ba-tah dariyaa ke sab asraar tak vo le gayaa lahr ik is paar se us paar tak vo le gayaa kaisaa saaya thaa ki gul ki us ne saari raushni saath apne dhund ki divaar tak vo le gayaa ek thaa bimaar qaidi ik gavaah-e-chashm-did ek hi zanjir ko darbaar tak vo le gayaa thaa charaagh-e-iltijaa lekin bujhaa is shaan se har mukhaatib se lab-e-izhaar tak vo le gayaa har sadaf mein nuur ki thi buund sharmaai hui khalvaton se khinch kar baazaar tak vo le gayaa"

"tabaah kar gayaa sab ko mire gharaane kaa vahi junun hatheli pe phuul ugaane kaa tire baghair main mar jaaungaa yahi sach hai nahin hai hausla ab jhuuT ko bachaane kaa hamaare biich mein ik aur shakhs honaa thaa jo laD paDe to koi bhi nahin manaane kaa vo reg reg se uThtaa thaa lahr lahr ki shakl main khvaab dekhtaa thaa kashtiyaan chalaane kaa havaa se bhuul hui thi ki puchh baiThi thi kabhi pataa mire harjaai ke Thikaane kaa"