Ghazal

"bataa kyaa kyaa tujhe ai shauq-e-hairaan yaad aataa hai vo jaan-e-aarzu vo raahat-e-jaan yaad aataa hai pareshaan-khaatiri had se guzarti hai to vahshat ko kisi kaa aalam-e-zulf-e-pareshaan yaad aataa hai guzartaa hai kabhi jab chaudhvin kaa chaand badli se mahin aanchal mein un kaa ru-e-taabaan yaad aataa hai andheri raat mein jugnu chamakte hain to rah rah kar dupaTTe ke sitaaron kaa charaaghaan yaad aataa hai ufuq par phailti hain surkhiyaan jab subh-e-taaza ki koi siina pas-e-chaak-e-garebaan yaad aataa hai kali ko phuul bante dekh kar ahd-e-bahaaraan mein koi chehra bahut nau-khez-o-khandaan yaad aataa hai ghazal jab chheD detaa hai koi ahd-e-javaani ki kisi kaa jism-e-mauzun-o-ghazal-khvaan yaad aataa hai vo tufaan karvaTein letaa thaa jo ik jism-e-raaanaa mein vo tufaan ham-kinaari kaa vo tufaan yaad aataa hai vo armaan jo kisi ke shokh honTon par machaltaa thaa vo armaan bosa-e-lab kaa vo armaan yaad aataa hai vufur-e-shauq se khud haath apne chuum letaa huun vufur-e-shauq mein jab un kaa daamaan yaad aataa hai bahut kuchh yaad aataa hai 'rais' un ki judaai mein magar jaise koi khvaab-e-pareshaan yaad aataa hai"

"dayaar-e-shaahid-e-bilqis-adaa se aayaa huun main ik faqir huun shahr-e-sabaa se aayaa huun jahaan-e-nau ki talab aur is kharaabe mein savaad-e-istakhr-o-nainvaa se aayaa huun shab-e-siyaah-e-khizaan ke sumum-o-sar-sar tak nigaar-khaana-e-shubh-o-sabaa se aayaa huun abhi kahaan hai mujhe nauha-o-navaa kaa shuur ki ek naahiya-e-be-navaa se aayaa huun mire rumuz kaa irfaan kise nasib ki main sarosh-e-ruh-e-azal huun samaa se aayaa huun damak rahi hai zamaan-o-makaan ki peshaani sitaara-e-abadi huun khalaa se aayaa huun tumhaare ghuncha-o-gul se gharaz nahin mujh ko idhar ishaara-e-baad-e-sabaa se aayaa huun"

"ye faqat shorish-e-havaa to nahin koi mujh ko pukaartaa to nahin bol ai akhtar-e-ghunuda-e-subh koi raaton ko jaagtaa to nahin sun ki ye madd-o-jazr-e-saahil-e-bahr maajraaon kaa maajraa to nahin zehn par ek khurduri si lakir kankhajure kaa raastaa to nahin ret par chaDh rahi hai ret ki tah baabul o misr o nainvaa to nahin nok-e-har-khaar-o-khas hai khun-aalud ruh-e-sahraa barahna-paa to nahin ai miri jaan-e-mubtalaa ke sukun tu koi jaan-e-mubtalaa to nahin tere jism-e-hasin mein khvaabida baagh-e-jannat kaa azhdahaa to nahin"

"tiraa khayaal ki khvaabon mein jin se hai khushbu vo khvaab jin mein miraa paikar-e-khayaal hai tu sataa rahi hain mujhe bachpane ki kuchh yaadein vo garmiyon ke shab-o-roz dopahar ki vo lu pachaas saal ki yaadon ke naqsh aur naqshe vo koi nisf sadi qabl kaa zamaana-e-hu vo garm-o-khushk mahine vo jeTh vo baisaakh ki haafize mein kabhi aah hain kabhi aansu vo zaaein zaaein ke kitne muhib zanaaTe? fazaa kaa haul havaa ki vo vahshatein har su vo saaein saaein ke kitne ajiib sannaaTe? vo sansani vo pur-asraar ek aalam-e-hu vo dopahar vo habuDe vo seingi baai kuuT fazaa-e-shoala-bajaan o havaa-e-aatish-e-khu vo khiDkiyon mein havaaon ki sar-kashi tundi vo baam-o-dar pe musallat jahannami jaadu vo pech-o-taab bagulon kaa mere aangan main chuDelein ghar mein ghus aai hain khaul kar gesu vo lu kaa zor ki saare kivaaD bajte hain ki jaise lashkar-e-jinnaat kaa amal har su vo shor jaise bagulon mein bhuut hon raqsaan vo qaah-qaah vo haa-haa vo honk vo hu-hu guzar rahaa hai tasavvur se jeTh kaa mausam aur is samay mein mujhe yaad aa rahaa hai tu"

"siyaah hai dil-e-giti siyaah-tar ho jaae khudaa kare ki har ik shaam be-sahar ho jaae kuchh is ravish se chale baad-e-barg-e-rez-e-khizaan ki duur tak saf-e-ashjaar be-samar ho jaae bajaae rang rag-e-ghunchaa se lahu Tapke khile jo phuul to har barg-e-gul sharar ho jaae zamaana pi to rahaa hai sharaab-e-daanish ko khudaa kare ki yahi zahr kaargar ho jaae koi qadam na uThe su-e-manzil-e-maqsud duaa karo ki har ik raah pur-khatar ho jaae ye log rah-guzar-e-zist se bhaTak jaaein ajal qavaafil-e-hasti ki ham-safar ho jaae ba-qadr yak-do-nafs bhi giraan hai zahmat-e-zist hayaat-e-nau-e-bashar aur mukhtasar ho jaae"

"'rais' ham jo su-e-kucha-e-habib chale hamaare saath hazaaron balaa-nasib chale rafaaqaton ki saaadat liye rafiq aae raqaabaton ki nahusat liye raqib chale jo qaafile ki hamaari talab mein nikle the kabhi baiid se guzre kabhi qarib chale aqab mein haadisa-e-subh-o-shaam ke ifrit jilau mein gardish-e-ayyaam ke naqib chale jahaan ko jin ke nasibe pe rashk aataa thaa nikal ke apne gharon se vo bad-nasib chale ye chal-chalaav ajib-o-gharib thaa ai dost gharib log su-e-aalam-e-ajib chale"

"gard mein aT rahe hain ehsaasaat dhime dhime baras rahi hai raat jal uThaa ik charaagh-e-shaam to kyaa bujh gae be-shumaar imkaanaat haae maazi ki dil-nashin yaadein haae khunkhaar bheDiyon ki baraat chyunTiyaan jaise zehan par reingein uf ye mere latif ehsaasaat bhuut ban kar mujhe Daraati rahin meri naa-aafrida takhliqaat kaun aayaa mire taaaqub mein vahi fikr-o-khayaal ke jinnaat dafatan kis ne qahqaha maaraa ye andhere mein kaun hai mire saat sarsar-e-shab kahaan ki patton mein karb-e-gham se karaahti hai hayaat mujh se mujh ko na chhin kar le jaae shaahzaadi-e-kishvar-e-zulmaat subh jaagaa to yaad bhi na rahaa raat thi chaandni ki chaandni raat tuda-e-reg o nakhl-e-khushk-e-chinaar chhup gai kis ki oT mein barsaat ye darakht-e-kuhan lisaan-ul-ghaib aur ye shaakh-e-khushk barg-e-nabaat kyaa yahi hai 'rais'-amrohvi uD ke aae hain duur se zarraat"

"habs ke aalam mein mahbas ki fazaa bhi kam nahin rauzan-e-divaar-e-zindaan ki havaa bhi kam nahin shorish-e-zanjir-e-paa par hain agar paabandiyaan halke halke jumbish-e-zanjir-e-paa bhi kam nahin gar sar-e-maqtal na ho zikr-e-butaan kaa hausla hujra-e-taarik mein yaad-e-khudaa bhi kam nahin rahrav-e-shab kyuun charaagh-e-mah se daryuza-gari raat andheri ho to jugnu ki ziyaa bhi kam nahin laakh mohkam ho hisaar-e-marhabi-o-antari ghaaziyon kaa baazu-e-khaibar-kushaa bhi kam nahin ahd-e-gul se saazish-e-baad-e-khizaan bhi kam na thi shaakh-e-gul se sozish-e-barq-e-balaa bhi kam nahin kyaa huaa gar vaaiz-o-mullaa ke dil hain be-charaagh gosha-e-masjid mein nanhaa saa diyaa bhi kam nahin lazzat-e-baada hai jaan-parvar magar ai ahl-e-zauq zahr-e-ashk-o-qatra-e-khun kaa mazaa bhi kam nahin"

"ye shahr shahr-e-balaa bhi hai kina-saaz ke saath nikal chalo kisi mahbub-e-dil-navaaz ke saath yahi navaa-e-adam hai yahi navaazish-e-kun khushaa hikaayat-e-nai harf-e-nai-navaaz ke saath su-e-nigaar-o-su-e-shahr-e-zar-nigaar chalein qalandraan-e-havasnaak-o-paak-baaz ke saath salaam ham-nafaso al-firaaq ham-safaro safar hai duur kaa vo bhi rah-e-daraaz ke saath ye khirqa-posh faqiraan-e-khaariq-ul-aadaat hamaare qaafila-haa-e-niyaaz-o-naaz ke saath ye jangalon ki masaafat ye naghma-e-daf-o-chang ye vaadiyon mein iqaamat surud-o-saaz ke saath vo vajd-o-haal kaa aalam vo raqs-e-darveshaan shahaan-e-naaz-o-gadaayaan-e-be-niyaaz ke saath khushaa vo baang-e-azaan vo taraana-e-naaqus vo bandagi-e-sanam bandaa-e-namaaz ke saath har ik faqir ke lab par ye naara-e-mastaan chale chalo adab-o-izz-o-imtiyaaz ke saath"

"hijr se vasl is qadar bhaari subh se dil pe haul hai taari apni uftaad-e-taba kyaa kahiye! vahi derina dil ki bimaari un ke chehre pe fath ke baa-vasf infiaal-e-shikast hai taari dil kai roz se dhaDaktaa hai hai kisi haadse ki tayyaari baaz auqaat azm-e-tark-e-vafaa ain min-jumla-e-vafaadaari un ko taklif-e-naaz detaa huun haae ye khu-e-dost-aazaari jaan-levaa sahi jaraahat-e-ishq aql kaa zakhm hai bahut kaari kaash mujh ko hisaar mein le le mere ghar ki chahaar-divaari"

"buland-o-past mein manzil hamein kahin na mili jo aasmaan se naazil hue zamin na mili gila nahin ki tiraa sang-e-aastaan na milaa! ye hai ki dida-e-tar ko vo aastin na mili kabhi jo shaana-e-uqda-kushaa nasib huaa to us ki zulf-e-girah-gir o ambarin na mili bajaa ki jaan-e-zulekhaa the misr mein yusuf magar jo baat thi kanaan mein vo kahin na mili mile jo arsh pe khuld-e-barin to kyaa haasil? ki is zamin pe hamein jannat-e-zamin na mili 'rais' daad khudaavand-e-aafrinash ko! agar mili to ba-juz harf-e-aafrin na mili"

"main jo tanhaa rah-e-talab mein chalaa meraa saaya mire aqab mein chalaa subh ke qaafilon se nibh na saki main akelaa savaad-e-shab mein chalaa jab ghane jangalon ki saf aai ek taaraa mire aqab mein chalaa aage aage koi bagulaa saa aalam-e-masti-o-tarab mein chalaa main kabhi hairat-e-talab mein rukaa aur kabhi shiddat-e-ghazab mein chalaa nahin khultaa ki kaun shakhs huun main aur kis shakhs ki talab mein chalaa ek anjaan zaat ki jaanib al-gharaz main baDe taab mein chalaa"