dil lutf-e-intizaar kaa ummid-vaar thaa — Aafreen Faheem Aafi

marne ke liye aae the ham dasht-e-balaa mein
jiine ki du'aa de gayaa darvesh hamein kyon

ye aur baat musalsal haraa rahaa lekin
darakht-e-dil pe kabhi mausami samar na lage

aarzu-e-dil-e-betaab mukammal kar de
khvaahish-e-did-e-sanam chashm mein bal khaati hai

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

pyaaso raho na dasht mein baarish ke muntazir
maaro zamin pe paanv ki paani nikal paDe

barseingi aaj rahmatein aamad hai yaar ki
naayaab hain ye ghaDiyaan tire intizaar ki

thak gae ham karte karte intizaar
ik qayaamat un kaa aanaa ho gayaa

guzar hi jaaeinge tere firaaq ke mausam
har intizaar ke aage bhi hain maqaam kai

muntazir main chaand ki aur chaand meraa muntazir
ho nahin saktaa akele mein guzaaraa chaand kaa