meri aankhein aur didaar aap kaa — Aasi Ghazipuri

subh tak vo bhi na chhoDi tu ne ai baad-e-sabaa
yaadgaar-e-raunaq-e-mahfil thi parvaane ki khaak

itnaa to jaante hain ki aashiq fanaa huaa
aur us se aage baDh ke khudaa jaane kyaa huaa

vo yahaan tak jo aa nahin sakte
kyaa mujhe bhi bulaa nahin sakte

lab-e-naazuk ke bose luun to missi munh banaati hai
kaf-e-paa ko agar chumun to mehndi rang laati hai

bimaar-e-gham ki chaaragari kuchh zarur hai
vo dard dil mein de ki masihaa kahein jise

kis ko dekhaa un ki surat dekh kar
ji mein aataa hai ki sajda kijiye

mere khvaabon ke jharokon ko sajaate rahiye
na sahi vasl magar yaad to aate rahiye

hasin khvaab ko sachchaa samajh rahaa hai koi
faqat gumaan ko duniyaa samajh rahaa hai koi

shab-haae-aish kaa vo zamaana kidhar gayaa
vo khvaab kyaa huaa vo fasaana kidhar gayaa

jise ishrat-kada-e-dahr samajhtaa thaa main
aakhir-e-kaar vo ik khvaab-e-pareshaan niklaa

puraane khvaabon se reza reza badan huaa hai
ye chaahtaa huun ki ab nayaa koi khvaab dekhun

khvaab galiyon mein phir rahe the aur
log apne gharon mein soe the