ashkon ko aarzu-e-rihaai hai roiye — Abbas Qamar

haalat-e-haal se begaana banaa rakkhaa hai
khud ko maazi kaa nihaan-khaana banaa rakkhaa hai

khush hain to phir musaafir-e-duniyaa nahin hain aap
is dasht mein bas aabla-paai hai roiye

mere kamre mein udaasi hai qayaamat ki magar
ek tasvir puraani si hansaa karti hai

inhein aankhon ne bedardi se be-ghar kar diyaa hai
ye aansu qahqaha banne ki koshish kar rahe the

ham hain asir-e-zabt ijaazat nahin hamein
ro paa rahe hain aap badhaai hai roiye

khamoshi kah rahi hai ab ye do-aabaa ravaan hogaa
havaa chup ho to baarish ke shadid aasaar hote hain

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

ye mere saathi hain pyaare saathi magar inhein bhi nahin gavaaraa
main apni vahshat ke maqbare se nai tamannaa ke khvaab dekhun

abhi hain qurb ke kuchh aur marhale baaqi
ki tujh ko paa ke hamein phir tiri tamannaa hai

tiraa visaal baDi chiiz hai magar ai dost
visaal ko miri duniyaa-e-aarzu na banaa

us ko fursat bhi nahin mujh ko tamannaa bhi nahin
phir khalish kyaa hai ki rah rah ke vafaa DhunDhti hai

dil mein hai mulaaqaat ki khvaahish ki dabi aag
mehndi lage haathon ko chhupaa kar kahaan rakkhun