kaise kaise main bhulaa huun — Abdurrahman Momin

abhi se tujh ko paDi hai visaal ki miri jaan
abhi to hijr ne unvaan hi nahin paayaa

yaad aate hain ve din bahut
kyon na ve din dobaaraa karein

aaj suraj ne kah diyaa 'momin'
tu jalegaa to raushni hogi

ve saamne se jaa chukaa to ye khulaa
vo khvaab lag rahaa thaa khvaab thaa nahin

jaane kyaa kah rahaa thaa vo mujh se
main ne bhi kah diyaa ki khush huun main

us ne vaada nahin liyaa mujh se
aur kahtaa hai main mukar rahaa huun

mere khvaabon ke jharokon ko sajaate rahiye
na sahi vasl magar yaad to aate rahiye

chalo baanT lete hain apni sazaaein
na tum yaad aao na ham yaad aaein

naghmon ki ibtidaa thi kabhi mere naam se
ashkon ki intihaa huun mujhe yaad kijiye

jab jaam diyaa thaa saaqi ne jab daur chalaa thaa mahfil mein
ik hosh ki saaat kyaa kahiye kuchh yaad rahi kuchh bhuul gae

main ne jin ke liye raahon mein bichhaayaa thaa lahu
ham se kahte hain vahi ahd-e-vafaa yaad nahin

ham ko jannat ki fazaa se bhi ziyaada hai aziiz
yahi be-rang si duniyaa yahi be-mehr se log