sath-e-dariyaa par ubharne ki tamannaa hi nahin — Afzal Minhas

zindagi ki zulmatein apne lahu mein rach gaiin
tab kahin jaa kar hamein aankhon ki binaai mili

raste mein koi peD jo mil jaae to baiThun
vo baar uThaayaa hai ki dikhne lage shaane

jaane ye hiddat chaman ko raas aae yaa nahin
aag jaisi kaifiyat hai khushbuon ki lahr mein

bikharte jism le kar tund tufaanon mein baiThe hain
koi zarre ki surat hai koi Tiile ki surat hai

gir paDaa tu aakhiri ziine ko chhu kar kis liye
aa gayaa phir aasmaanon se zamin par kis liye

dil ki masjid mein kabhi paDh le tahajjud ki namaaz
phir sahar ke vaqt honTon par duaa bhi aaegi

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

kyaa hamsari ki ham se tamannaa kare koi
ham khud bhi apne qad ke baraabar na ho sake

vo haadse bhi dahr mein ham par guzar gae
jiine ki aarzu mein kai baar mar gae

kuchh to bataao ai farzaano divaanon par kyaa guzri
shahr-e-tamannaa ki galiyon mein barpaa hai kohraam bahut

us se yahi kahtaa huun vaajib ehtiraam-e-ishq hai
andar se ye khvaahish hai vo jaisaa kahe vaisaa karun

zindagi ki hansi uDaati hui
khvaahish-e-marg sar uThaati hui