jaane ye hiddat chaman ko raas aae yaa nahin — Afzal Minhas

zindagi ki zulmatein apne lahu mein rach gaiin
tab kahin jaa kar hamein aankhon ki binaai mili

sath-e-dariyaa par ubharne ki tamannaa hi nahin
arsh par pahunche hue hain jab se gahraai mili

raste mein koi peD jo mil jaae to baiThun
vo baar uThaayaa hai ki dikhne lage shaane

bikharte jism le kar tund tufaanon mein baiThe hain
koi zarre ki surat hai koi Tiile ki surat hai

gir paDaa tu aakhiri ziine ko chhu kar kis liye
aa gayaa phir aasmaanon se zamin par kis liye

dil ki masjid mein kabhi paDh le tahajjud ki namaaz
phir sahar ke vaqt honTon par duaa bhi aaegi

shor din ko nahin sone detaa
shab ko sannaaTaa jagaa detaa hai

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

ye raat yunhi basar ho gai to kyaa hogaa
tire baghair sahar ho gai to kyaa hogaa

tum aake lauT gae phir bhi ho yahin maujud
tumhaare jism ki khushbu mire makaan mein hai

itni siyaah-raat mein itni si raushni
ye chaand vo nahin miraa mahtaab aur hai