'shaair' ajiib rang se guzri hai apni umr — Agha Shayar Qazalbash

pahle is mein ik adaa thi naaz thaa andaaz thaa
ruThnaa ab to tiri aadat mein shaamil ho gayaa

milnaa na milnaa ye to muqaddar ki baat hai
tum khush raho raho mire pyaare jahaan kahin

haalat pe meri un ke bhi aansu nikal paDe
dekhaa gayaa na yaas mein aalam nigaah kaa

is liye kahte the dekhaa munh lagaane kaa maza
aaina ab aap kaa madd-e-muqaabil ho gayaa

baDe sidhe-saadhe baDe bhole-bhaale
koi dekhe is vaqt chehraa tumhaaraa

abru na sanvaaraa karo kaT jaaegi ungli
naadaan ho talvaar se khelaa nahin karte

kam-umri mein sunet hain
mar jaate hain achchhe log

zindagi tu bhi hamein vaise hi ik roz guzaar
jis tarah ham tujhe barson se guzaare hue hain

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

balaa-e-jaan thi jo bazm-e-tamaashaa chhoD di main ne
khushaa ai zindagi khvaabon ki duniyaa chhoD di main ne

bas ek pal ki tamannaa-e-vasl ki khaatir
tamaam 'umr lagaa di gai sanvarne mein

daam-e-gham-e-hayaat mein uljhaa gai umiid
ham ye samajh rahe the ki ehsaan kar gai