aaghosh mein mahkoge dikhaai nahin doge — Ahmad Nadeem Qasmi

gham-e-jaanaan gham-e-dauraan ki taraf yuun aayaa
jaanib shahar chale dukhtar-e-dahqaan jaise

zindagi shama ki maanind jalaataa huun 'nadim'
bujh to jaaungaa magar subah to kar jaaungaa

kis tavaqqoa pe kisi ko dekhein
koi tum se bhi hasin kyaa hogaa

ik safina hai tiri yaad agar
ik samundar hai miri tanhaai

mujh se kaafir ko tire ishq ne yuun sharmaayaa
dil tujhe dekh ke dhaDkaa to khudaa yaad aaya

aakhir duaa karein bhi to kis muddaaa ke saath
kaise zamin ki baat kahein aasmaan se ham

shor din ko nahin sone detaa
shab ko sannaaTaa jagaa detaa hai

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

khushbu kaa qaafila ye bahaaron kaa silsila
pahunchaa hai shahr tak to mire ghar bhi aaegaa

din bhi Duubaa ki nahin ye mujhe maalum nahin
jis jagah bujh gae aankhon ke diye raat hui

jab vo hain bure to phir achchhaai kareinge kyon
khushbu ki tamanna tum kyon karte ho khaaron se