shikast-e-ahd-e-sitam par yaqin rakhte hain — Ahmad Riyaz

fart-e-gham-e-havaadis-e-dauraan ke baavajud
jab bhi tire dayaar se guzre machal gae

main nukta-chin nahin huun magar ye bataaiye
vo kaun the jo hans ke gulon ko masal gae

gham-e-habib gham-e-zindagi gham-e-dauraan
kisi maqaam pe ham ji buraa nahin karte

kuchh is tarah se luTi hai mataa-e-dida-o-dil
ki ab kisi se bhi zikr-e-vafaa nahin karte

gham hai na ab khushi hai na ummid hai na yaas
sab se najaat paae zamaane guzar gae

uThaa hi laayaa sabhi raaste vo kaandhon par
yaqin us pe na kartaa to main kidhar jaataa

nahin nahin main bahut khush rahaa huun tere baghair
yaqin kar ki ye haalat abhi abhi hui hai

aise mein kis kaa bharosa kijiye
jab kisi pyaase ko paani maar de

yuun mulaaqaat kaa ye daur banaae rakhiye
maut kab saath nibhaa jaae bharosa kyaa hai

tumhaare aane ki ummid bar nahin aati
main raakh hone lagaa huun diye jalaate hue