ab bhi aati hai tiri yaad pa is karb ke saath — Akhtar Imam Rizvi

toD bhi do ehsaas ke rishte chhoD bhi do dukh apnaane
ro ro ke jivan kaaToge ro ro ke mar jaaoge

thakaa huaa huun kisi saae ki talaash mein huun
bichhaD gayaa huun sitaaron se raushni ki tarah

ashk jab dida-e-tar se niklaa
ek kaanTaa saa jigar se niklaa

kam-zarf zamaane ki hiqaarat kaa gila kyaa
main khush huun miraa pyaar samundar ki tarah hai

apnon ki chaahaton ne bhi kyaa kyaa diye fareb
rote rahe lipaT ke har ik ajnabi ke saath

mujh ko manzil bhi na pahchaan saki
main ki jab gard-e-safar se niklaa

mere khvaabon ke jharokon ko sajaate rahiye
na sahi vasl magar yaad to aate rahiye

sab ko ham bhuul gae josh-e-junun mein lekin
ik tiri yaad thi aisi jo bhulaai na gai

ajab ki sabr ki miaad baDhti jaati hai
ye kaun log hain fariyaad kyuun nahin karte

nae charaagh jalaa yaad ke kharaabe mein
vatan mein raat sahi raushni manaayaa kar

miraa akelaa khudaa yaad aa rahaa hai mujhe
ye sochtaa huaa girjaa bulaa rahaa hai mujhe

ai parindo yaad karti hai tumhein paagal havaa
roz ik nauha sar-e-shaakh shajar suntaa huun main