toD bhi do ehsaas ke rishte chhoD bhi do dukh apnaane — Akhtar Imam Rizvi

thakaa huaa huun kisi saae ki talaash mein huun
bichhaD gayaa huun sitaaron se raushni ki tarah

ashk jab dida-e-tar se niklaa
ek kaanTaa saa jigar se niklaa

kam-zarf zamaane ki hiqaarat kaa gila kyaa
main khush huun miraa pyaar samundar ki tarah hai

ab bhi aati hai tiri yaad pa is karb ke saath
TuTti niind mein jaise koi sapnaa dekhaa

apnon ki chaahaton ne bhi kyaa kyaa diye fareb
rote rahe lipaT ke har ik ajnabi ke saath

mujh ko manzil bhi na pahchaan saki
main ki jab gard-e-safar se niklaa

balaa-e-jaan thi jo bazm-e-tamaashaa chhoD di main ne
khushaa ai zindagi khvaabon ki duniyaa chhoD di main ne

zindagi tu bhi hamein vaise hi ik roz guzaar
jis tarah ham tujhe barson se guzaare hue hain

kuchh chhoTe chhoTe dukh apne kuchh dukh apne azizon ke
in se hi jivan bantaa hai so jivan ban jaaegaa

idhar to tuul diyaa hai umiid ko us ne
udhar hayaat ataa ki hai mukhtasar mujh ko

tiri aarzu se bhi kyuun nahin gham-e-zindagi mein koi kami
ye savaal vo hai ki jis kaa ab koi ik javaab nahin rahaa

kyaa qayaamat hai hijr ke din bhi
zindagi mein shumaar hote hain