ham ko bachpan hi se ik shauq thaa barbaadi se — Ameer Raza Mazhari

tum kisi ke bhi ho nahin sakte
tum ko apnaa banaa ke dekh liyaa

ham hain un se vo ghair se maayus
kyaa mohabbat kisi ko raas nahin

kyaa taajjub hai jo yaaron ne rifaaqat chhoDi
baiThtaa kaun hai girti hui divaar ke paas

dekhne vaale samajhte hain shanaasaa bhi nahin
aaj begaane nazar aate hain ham tum kitne

hamaare baa'd sunnaa dusron se
kahaani ye abhi puuri nahin hai

ham bane the tabaah hone ko
aap kaa ishq to bahaana thaa

main baDaa ho gayaa huun magar bachpanaa
mere dil se kabhi bhi gayaa hi nahin

chup kahin aur liye phirti thi baatein kahin aur
din kahin aur guzarte the to raatein kahin aur

dafnaa diyaa thaa jin ko gunje hain har taraf ab
meri khamoshiyon ko aavaaz mil gai hai

tum hanso to din nikle chup raho to raatein hain
kis kaa gham kahaan kaa gham sab fuzul baatein hain

haq achchhaa par us ke liye koi aur mare to aur achchhaa
tum bhi koi mansur ho jo suuli pe chaDho khaamosh raho

vo sard raaton mein aansuon ke charaagh raushan
aur un charaaghon ki lau mein jalti 'ajib si chup