ham fanaa-nasibon ko aur kuchh nahin aataa — Anjum Irfani

charaag chaand shafaq shaam phuul jhiil sabaa
churaain sab ne hi kuchh kuchh shabaahatein teri

adaa huaa na kabhi mujh se ek sajda-e-shukr
main kis zabaan se karungaa shikaayatein teri

safar mein har qadam rah rah ke ye taklif hi dete
bahar-surat hamein in aablon ko phoD denaa thaa

lauT kar yaqinan main ek roz aaungaa
palkon pe charaaghon kaa ehtimaam kar lenaa

tesha-ba-kaf ko aaina-gar kah diyaa gayaa
jo aib thaa use bhi hunar kah diyaa gayaa

koi puraanaa khat kuchh bhuli-bisri yaad
zakhmon par vo lamhe marham hote hain

na tum hosh mein ho na ham hosh mein hain
chalo mai-kade mein vahin baat hogi

kahaan milegi misaal meri sitamgari ki
ki main gulaabon ke zakhm kaanTon se si rahaa huun

chaand kuchh der teri chhat pe rahe
phir mire jaam mein utar jaae

parde mein khamoshi ke burqe mein udaasi ke
shaayad koi aa jaae darvaaza khulaa rakhnaa

ishq phir ishq hai aashufta-sari maange hai
hosh ke daur mein bhi jaama-dari maange hai

vo kisi bhule hue naghme ki dhun ke maanind
zehn mein hai to magar yaad nahin aataa hai