koi puraanaa khat kuchh bhuli-bisri yaad — Anjum Irfani

adaa huaa na kabhi mujh se ek sajda-e-shukr
main kis zabaan se karungaa shikaayatein teri

safar mein har qadam rah rah ke ye taklif hi dete
bahar-surat hamein in aablon ko phoD denaa thaa

ham fanaa-nasibon ko aur kuchh nahin aataa
khuun sharaab kar lenaa jism jaam kar lenaa

lauT kar yaqinan main ek roz aaungaa
palkon pe charaaghon kaa ehtimaam kar lenaa

tesha-ba-kaf ko aaina-gar kah diyaa gayaa
jo aib thaa use bhi hunar kah diyaa gayaa

charaag chaand shafaq shaam phuul jhiil sabaa
churaain sab ne hi kuchh kuchh shabaahatein teri

mere khvaabon ke jharokon ko sajaate rahiye
na sahi vasl magar yaad to aate rahiye

is judaai mein tum andar se bikhar jaaoge
kisi maazur ko dekhoge to yaad aaungaa

mujhe khabar thi ki ab lauT kar na aaungaa
so tujh ko yaad kiyaa dil pe vaar karte hue

log to aur bhi akele hain
tum ko ehsaas kuchh ziyaada hai

aao puraani yaad ke shoalon mein taap lein
kitne hain haath sard mulaaqaat ki tarah

kisi ko yaad kar ke ek din khalvat mein royaa thaa
nahin maalum kyuun jab se nadaamat baDhti jaati hai