chaand kuchh der teri chhat pe rahe — Shehzad Anjum Burhani

aaj ki raat hai bahut bhaari
aaj ki raat bas guzar jaae

dil ki hi kisi baat ko tahrir na kar paae
likhne pe jab aae the to kyaa kyaa nahin likkhaa

ye kyaa ki khayaalon se uDi jaati hai khushbu
main ne to abhi tak use sochaa bhi nahin hai

'arzi insaaf ki ham ne bhi lagaa rakkhi hai
dekhiye zill-e-ilaahi hamein kab puchhte hain

zamaana jin ki qayaadat mein gaamzan thaa vo log
bhaTak gae tiri aankhon ki rahnumaai mein

abhi se falsafa-e-reg-zaar ki baatein
abhi to 'ishq ke maktab mein haaziri hui hai

vo chaand hai to aks bhi paani mein aaegaa
kirdaar khud ubhar ke kahaani mein aaegaa

chaand hotaa nahin har ik chehra
phuul hote nahin sukhan saare

gul ghunche aaftaab shafaq chaand kahkashaan
aisi koi bhi chiiz nahin jis mein tu na ho

chaand hai paani mein yaa bhule hue chehre kaa aks
saahil-e-dariyaa pe dekho main bhi hairaani mein huun

vo shahr chhoD ke muddat hui chalaa bhi gayaa
had-e-ufuq pe magar chaand ru-ba-ru hai vahi

jo nuur bharte the zulmaat-e-shab ke sahraa mein
vo chaand taare falak se utar gae shaayad