piine paDte hain sainkaDon aansu — A.R. Sahil 'Aleeg'

gulaab khvaab sitaare dhanak udaas charaagh
paDi hai fasl-e-mohabbat kaTi-kaTaai sabaa

ho na paae jab mukammal ishq kaa qissa to phir
shohratein rahne do ab gum-naamiyaan hi Thiik hain

kyaa bataaun main ki tum ne kis ko saunpi hai hayaa
is liye sochaa miri khaamoshiyaan hi Thiik hain

is qadar mujh pe marti hai pagli koi
rone lagti hai d p haTaane ke baad

shaam ke tan par saji jo surmai poshaak hai
ham charaaghon ki faqat ye raushni poshaak hai

sab ki taqriron mein vaise hai khudaa sab kaa hi ik
haan magar har dil ki apni mazhabi poshaak hai

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

paraae dard mein hotaa nahin sharik koi
ghamon ke bojh ko khud aap Dhonaa paDtaa hai

ho rahaa huun tire dukh mein tahlil
apne har dard se kaTtaa jaaun

jo teri zulf ke saae mein chand din guzre
vo gham ki dhuup mein yaad aae saaebaan ki tarah