jo teri zulf ke saae mein chand din guzre — Mahfuzur Rahman Adil

tumhaare bakhshe hue aansuon ke qatron se
shab-e-firaaq mein taare sajaa rahaa huun main

usi ne bakhshaa hai mujh ko shuur jiine kaa
jo mushkilon ki ghaDi baar baar aai hai

vo miri aavaaragardi vo miraa divaana-pan
vo miri taazim mein divaar-o-dar kaa jaagnaa

zindagi ko hausla dene ke khaatir
khvaahishon ko reza reza chun rahaa huun

khud mire aansu chamak rakhte hain gauhar ki tarah
meri chashm-e-aarzu mein maah-o-akhtar kuchh nahin

ek din vo zarron ko aaftaab kar leinge
dhuup ke jo khvaahaan hain raat ke andhere mein

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

milne diyaa na us se hamein jis khayaal ne
sochaa to us khayaal se sadma bahut huaa

khush hue itne ki ham se pahle
maqdam-e-yaar ko aansu nikle

aaj ki raat bhi tanhaa hi kaTi
aaj ke din bhi andheraa hogaa