khaak-e-sahraa to bahut duur hai ai vahshat-e-dil — Arshad Kamal

ye maanaa sail-e-ashk-e-gham nahin kuchh kam magar 'arshad'
zaraa utraa nahin dariyaa ki banjar jaag uThtaa hai

vo aae to lagaa gham kaa mudaavaa ho gayaa hai
magar ye kyaa ki gham kuchh aur gahraa ho gayaa hai

vo zamaane kaa taghayyur ho ki mausam kaa mizaaj
be-zarar donon hain nairangi-e-aadaam ke sivaa

mujh ko talaash karte ho auron ke darmiyaan
hairaan ho rahaa huun tumhaare gumaan par

kabhi un kaa nahin aanaa khabar ke zail mein thaa
magar ab un kaa aanaa hi tamaashaa ho gayaa hai

bilaa-sabab to koi barg bhi nahin hiltaa
tu apne aaj pe asaraat kal ke dekh zaraa

main baDaa ho gayaa huun magar bachpanaa
mere dil se kabhi bhi gayaa hi nahin

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

unhein apne dil ki khabrein mire dil se mil rahi hain
main jo un se ruuTh jaaun to payaam tak na pahunche

chaand ne taan li hai chaadar-e-abr
ab vo kapDe badal rahi hogi

havaa shaakhon mein rukne aur ulajhne ko hai is lamhe
guzarte baadalon mein chaand haail hone vaalaa hai

dil-e-haris hi apnaa na ho sakaa qaane
vagarna tere karam mein to kuchh kami na rahi