koi to moajaza aisaa bhi ho apni mohabbat mein — Arshad Lateef

ajab kashish hai tire hone yaa na hone mein
gumaan ne mujh ko haqiqat se baandh rakkhaa hai

khalaa kaa masala hi mukhtalif hai
samundar is qadar gahraa nahin hai

phailti jaa rahi hai ye duniyaa
jashn-e-aavaargi manaane mein

sabhi taabir us ki likh rahe hain
kisi ne bhi use dekhaa nahin hai

jab main us aadmi se duur huaa
gham miri zindagi se duur huaa

kis ke savaal par ye dil rotaa hai saari saari raat
kaun habib hai miraa tere khayaal ke sivaa

bil-aakhir thak haar ke yaaro ham ne bhi taslim kiyaa
apni zaat se ishq hai sachchaa baaqi sab afsaane hain

na paak hogaa kabhi husn o ishq kaa jhagDaa
vo qissa hai ye ki jis kaa koi gavaah nahin

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

sabhi se jab mohabbat chaahte ho
mohabbat kyon nahin karte sabhi se

sach ishq mein hain aashiq o maashuq baraabar
jo mushkil-e-majnun hai so hai mushkil-e-lailaa

dil-e-haris hi apnaa na ho sakaa qaane
vagarna tere karam mein to kuchh kami na rahi