kyaa koi dil lagaa ke kahe sher ai 'qalaq' — Asad Ali Khan Qalaq

ai be-khudi-e-dil mujhe ye bhi khabar nahin
kis din bahaar aai main divaana kab huaa

adaa se dekh lo jaataa rahe gila dil kaa
bas ik nigaah pe Thahraa hai faisla dil kaa

sindur us ki maang mein detaa hai yuun bahaar
jaise dhanak nikalti hai abr-e-siyaah mein

phir mujh se is tarah ki na kijegaa dil-lagi
khair is ghaDi to aap kaa main kar gayaa lihaaz

tilaai rang jaanaan kaa agar mazmun likhun khat mein
to haala gird harfon ke bane sone ke paani kaa

yuun ruuh thi adam mein miri bahr-e-tan udaas
ghurbat mein jis tarah ho gharib-ul-vatan udaas

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

vo gham ataa kiyaa dil-e-divaana jal gayaa
aisi bhi kyaa sharaab ki paimaana jal gayaa

har qadam raah mein milte hain shanaasaa chehre
har qadam raah mein milti hai nai tanhaai

hain kushtagaan-e-sadaa aakhiri kinaare par
ai khaamushi tiri tarsil hone vaali hai