letaa nahin kisi kaa pas-e-marg koi naam — Asad Badayuni

bichhaD ke tujh se kisi dusre pe marnaa hai
ye tajraba bhi isi zindagi mein karnaa hai

aate hain barg-o-baar darakhton ke jism par
tum bhi uThaao haath ki mausam duaa kaa hai

jise na meri udaasi kaa kuchh khayaal aayaa
main us ke husn pe ik roz khaak Daal aayaa

chaman vahi ki jahaan par labon ke phuul khilein
badan vahi ki jahaan raat ho gavaaraa bhi

mohabbatein bhi usi aadmi kaa hissa thiin
magar ye baat puraane zamaane vaali hai

meri rusvaai ke asbaab hain mere andar
aadmi huun so bahut khvaab hain mere andar

jiinaa taDap taDap kar marnaa sisak sisak kar
fariyaad ek ji hai kyaa kyaa kharaabiyon mein

kisi ke ek ishaare mein kis ko kyaa na milaa
bashar ko ziist mili maut ko bahaana milaa

maut ke baa'd bhi marne pe na raazi honaa
yahi ehsaas to sarmaaya-e-din hotaa hai

jo kaam karne hain us mein na chaahiye taakhir
kabhi payaam ajal naa-gahaan bhi aataa hai

bad-tar hai maut se bhi ghulaami ki zindagi
mar jaaiyo magar ye gavaaraa na kijiyo

khub-o-zisht-e-jahaan kaa farq na puchh
maut jab aai sab baraabar thaa