jise na meri udaasi kaa kuchh khayaal aayaa — Asad Badayuni

bichhaD ke tujh se kisi dusre pe marnaa hai
ye tajraba bhi isi zindagi mein karnaa hai

aate hain barg-o-baar darakhton ke jism par
tum bhi uThaao haath ki mausam duaa kaa hai

chaman vahi ki jahaan par labon ke phuul khilein
badan vahi ki jahaan raat ho gavaaraa bhi

mohabbatein bhi usi aadmi kaa hissa thiin
magar ye baat puraane zamaane vaali hai

parind kyuun miri shaakhon se khauf khaate hain
ki ik darakht huun aur saaya-daar main bhi huun

meri rusvaai ke asbaab hain mere andar
aadmi huun so bahut khvaab hain mere andar

jab ki pahlu se yaar uThtaa hai
dard be-ikhtiyaar uThtaa hai

gham hai na ab khushi hai na ummid hai na yaas
sab se najaat paae zamaane guzar gae

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

husn jalva dikhaa gayaa apnaa
ishq baiThaa rahaa udaas kahin

sab ke hote hue ik roz vo tanhaa hogaa
phir vo DhunDegaa hamein aur nahin paaegaa vo

baiThaa huaa huun lag ke dariche se mahv-e-yaas
ye shaam aaj mere baraabar udaas hai